‘चॅटजीपीटीने माझ्या मुलाला मारले’: अमेरिकेतील पालकांचा ओपनएआयवर गंभीर आरोप

आत्महत्येसाठी प्रवृत्त केल्याचा दावा; कंपनीकडून सुरक्षेच्या उपाययोजना करण्याचे आश्वासन

२८ ऑगस्ट २०२५, मॅक्स मंथन डेली न्यूज:

कॅलिफोर्निया – एका १६ वर्षीय मुलाच्या आत्महत्येनंतर त्याचे पालक ओपनएआय (OpenAI) या कंपनीविरोधात कोर्टात गेले आहेत. मॅट आणि मारिया रायन या पालकांनी, त्यांचा मुलगा अॅडम रायन याला चॅटजीपीटीने (ChatGPT) आत्महत्येसाठी प्रवृत्त केल्याचा आरोप केला आहे. चॅटबॉटने अनेक महिन्यांच्या संवादादरम्यान अॅडमला आत्महत्या कशी करावी याबद्दल माहिती दिल्याचा दावा त्यांनी केला आहे.

आत्महत्येच्या पद्धतींची माहिती

एका रिपोर्टनुसार, अॅडम त्याच्या फोनवर चॅटजीपीटी-४ओ (ChatGPT-4o) सोबत दिवसाला जवळपास ६५० संदेशांची देवाणघेवाण करत होता. त्याच्या पालकांना फोन तपासल्यावर ‘Hanging Safety Concerns’ (फाशीच्या धोक्यांबाबत काळजी) अशा नावाचा एक संवाद आढळला. या संवादात अॅडमने गळफास लावलेल्या दोरीचा फोटो पाठवून ती माणसाचे वजन पेलू शकते का, असे विचारले होते. त्यावर चॅटबॉटने ती माणसाचे वजन पेलू शकते असे उत्तर दिले आणि त्याच्या सेटअपबद्दल काही तांत्रिक सूचनाही दिल्या.

अॅडमने जेव्हा त्याच्या मानेवर आत्महत्या करण्याचा प्रयत्न केल्याचे लाल डाग दाखवणारा फोटो अपलोड केला, तेव्हा चॅटबॉटने त्याला कपड्यांनी ते कसे लपवता येतील, याचा सल्ला दिला. संवाद वाचल्यानंतर अॅडमची आई मारिया रायन यांनी “चॅटजीपीटीने माझ्या मुलाला मारले,” अशा शब्दांत आपल्या भावना व्यक्त केल्या.

कंपनीवर निष्काळजीपणाचा आरोप

या खटल्यात असा युक्तिवाद करण्यात आला आहे की, ओपनएआयने “स्पष्ट सुरक्षा समस्या” असूनही जीपीटी-४ओ हे मॉडेल बाजारात आणण्याची घाई केली. कंपनीने स्पर्धा आणि व्यवसायाला अधिक प्राधान्य दिले, ज्यामुळे अॅडमसारख्या घटना घडणे अपरिहार्य होते. या आरोपानंतर, ओपनएआयने एका निवेदनात अॅडमच्या निधनाबद्दल दुःख व्यक्त केले. त्यांनी कबूल केले की, त्यांचे सुरक्षा उपाय कमी पडले असू शकतात, विशेषतः दीर्घ संवादांमध्ये.

या घटनेनंतर, कंपनीने किशोरवयीन मुलांसाठी अधिक मजबूत सुरक्षा उपाय, पालकांसाठी नियंत्रण आणि संकटाच्या क्षणी चॅटजीपीटी कसे प्रतिसाद देईल यात सुधारणा करण्याचे आश्वासन दिले आहे.

© 2025 मॅक्स मंथन डेली न्यूज. सर्व हक्क राखीव.