आपत्कालीन परिस्थितीत नागरिकांना जलद प्रतिसाद: महापालिका अग्निशमन विभाग अधिक सक्षम

अतिरिक्त आयुक्त प्रदीप जांभळे पाटील यांचे नियंत्रण कक्षाच्या कामकाजाचा आढावा; गणेशोत्सव व पूरस्थितीसाठी सज्जतेचे निर्देश

२८ ऑगस्ट २०२५, मॅक्स मंथन डेली न्यूज:

पिंपरी, प्रतिनिधी शाम सोनवणे – पिंपरी-चिंचवड महापालिका आपत्कालीन परिस्थितीत नागरिकांना अधिक जलद प्रतिसाद देण्यासाठी अग्निशमन विभागाचा नियंत्रण कक्ष सक्षम करत आहे. महापालिकेचे अतिरिक्त आयुक्त प्रदीप जांभळे पाटील यांनी अग्निशमन विभागाच्या मुख्य कार्यालयाला भेट देऊन कामकाजाचा सखोल आढावा घेतला. या वेळी त्यांनी गणेशोत्सव व पूरस्थितीच्या पार्श्वभूमीवर यंत्रणा सज्ज ठेवण्याचे निर्देश दिले.

नियंत्रण कक्षात नवीन तंत्रज्ञानाचा वापर

यावेळी अतिरिक्त आयुक्त जांभळे पाटील यांनी नियंत्रण कक्षातील सिस्टिमची माहिती घेतली. आपत्कालीन फोन आल्यानंतर किती वेळेत प्रतिसाद मिळतो, कोणत्या प्रकारची माहिती घेतली जाते, आणि ही माहिती बचाव पथकापर्यंत किती वेळात पोहोचते, याची त्यांनी तपासणी केली. नागरिकांकडून येणाऱ्या आपत्कालीन फोनसाठी एक डिजिटल फॉर्म वापरला जातो, ज्यात घटनेचे ठिकाण, प्रकार आणि संपर्क क्रमांक अशा महत्त्वाच्या बाबींची त्वरित नोंद होते. ही माहिती तात्काळ जवळच्या अग्निशमन केंद्राला पाठवली जाते, जेणेकरून बचाव पथक त्वरित घटनास्थळी रवाना होऊ शकेल. या नवीन तंत्रज्ञानाचा वापर करण्याचे प्रशिक्षण कर्मचाऱ्यांना देण्याचे निर्देश त्यांनी दिले.

गणेशोत्सव आणि पूरस्थितीसाठी विशेष तयारी

गणेशोत्सवाच्या काळात होणारी गर्दी, मिरवणुका आणि मंडपांमुळे संभाव्य आपत्कालीन घटना लक्षात घेऊन, अग्निशमन विभागाने सर्व उपकरणे कार्यरत ठेवावीत असे निर्देश त्यांनी दिले. मंडपांच्या उभारणीत अग्निसुरक्षेचे नियम पाळले आहेत की नाही, याची तपासणी करण्याचेही त्यांनी सांगितले. या प्रसंगी सहाय्यक आयुक्त उमेश ढाकणे,  व इतर अधिकारी आणि कर्मचारी उपस्थित होते.

तसेच, शहरातील पवना, इंद्रायणी आणि मुळा नद्यांमध्ये पूरजन्य परिस्थिती उद्भवण्याची शक्यता लक्षात घेऊन, जांभळे पाटील यांनी अग्निशमन विभागाच्या ‘जलपरी’ या विशेष वाहनाची पाहणी केली. बोटी, लाईफ जॅकेट आणि इतर बचाव साहित्याची कार्यक्षमता तपासणी केली. पूरग्रस्त भागातील नागरिकांच्या सुरक्षिततेसाठी आधीच नियोजन करण्याची सूचना त्यांनी केली, आणि आपत्कालीन परिस्थितीत जीवितहानी होऊ नये, यासाठी प्रत्येक क्षण महत्त्वाचा असल्याचे स्पष्ट केले.

या आढावा बैठकीत सहाय्यक आयुक्त उमेश ढाकणे, सहशहर अभियंता अनिल भालसाकळे, उपअग्निशमन अधिकारी ऋषीकांत चिपाडे, कार्यकारी अभियंता महेश कावळे आणि इतर अधिकारी व कर्मचारी उपस्थित होते.

© 2025 मॅक्स मंथन डेली न्यूज. सर्व हक्क राखीव.