पिंपरी-चिंचवडमध्ये अनधिकृत बांधकामे, नळ जोडण्या आणि अतिक्रमणांवर पालिकेचा हातोडा; आयुक्त डॉ. विजय सूर्यवंशी यांचा इशारा

पिंपरी चिंचवड प्रतिनिधी आकाश कांबळे, २८ एप्रिल २०२६ मॅक्स मंथन डेली न्यूज:

पिंपरी: पिंपरी-चिंचवड शहरात स्वच्छता आणि शिस्त राखण्यासाठी महानगरपालिका प्रशासन आता अत्यंत कडक पावले उचलणार आहे. “शहरातील अनधिकृत जाहिराती, फूटपाथवरील अतिक्रमणे, बेकायदेशीर नळ जोडण्या आणि विनापरवाना सुरू असलेल्या बांधकामांवर तीव्र कारवाई करा,” असे स्पष्ट निर्देश आयुक्त डॉ. विजय सूर्यवंशी यांनी सर्व क्षेत्रीय अधिकाऱ्यांना दिले आहेत.

प्रशासकीय प्रमुख आणि क्षेत्रीय अधिकाऱ्यांसोबत घेतलेल्या आढावा बैठकीत आयुक्त बोलत होते. यावेळी त्यांनी स्पष्ट केले की, शहराचे सौंदर्य विद्रुप करणाऱ्यांवर आणि नियमांचे उल्लंघन करणाऱ्यांवर कोणतीही दयामाया दाखवली जाणार नाही.

नागरिकांना चालण्यासाठी सुरक्षित मार्ग मिळावा यासाठी महापालिकेने ‘अतिक्रमणमुक्त फूटपाथ’ मोहीम अधिक तीव्र करण्याचा निर्णय घेतला आहे. क्षेत्रीय स्तरावर यासाठी विशेष पथके कार्यरत राहतील. तसेच, शहरातील भिंती, विजेचे खांब आणि डीपी बॉक्सवर लावलेले अनधिकृत बॅनर तात्काळ हटवून, त्यावरील मोबाईल क्रमांकांच्या आधारे संबंधित व्यक्तींना नोटिसा बजावण्याचे आदेशही त्यांनी दिले आहेत.

शहरातील पाणीपुरवठा व्यवस्था सुरळीत ठेवण्यासाठी बेकायदेशीर नळ जोडण्यांवर थेट कारवाई केली जाणार आहे. पाणी चोरी करणाऱ्यांचे नळ कनेक्शन तोडण्याचे आदेश देण्यात आले असून, पाणी टंचाईच्या काळात असा गैरप्रकार खपवून घेतला जाणार नाही, असेही प्रशासनाने स्पष्ट केले आहे.

अनधिकृत बांधकामांबाबत आयुक्तांनी नागरिकांना महत्त्वाचे आवाहन केले आहे. “ज्या बांधकामांना महापालिकेची अधिकृत परवानगी नाही, अशा ठिकाणच्या सदनिका किंवा घरे नागरिकांनी खरेदी करू नयेत. अशी अनधिकृत बांधकामे महापालिका निष्कासित (पाडणार) करणार आहे. त्यामुळे कष्टार्जित पैसा गुंतवताना बांधकामाची अधिकृतता तपासूनच निर्णय घ्यावा,” असे आवाहन डॉ. सूर्यवंशी यांनी केले आहे.

आगामी स्वच्छ सर्वेक्षणामध्ये पिंपरी-चिंचवड शहराला देशात अव्वल स्थान मिळवून देण्यासाठी कचरा संकलन, विलगीकरण आणि व्यवस्थापनावर विशेष लक्ष केंद्रित करण्यात आले आहे. शहराला कचरामुक्त करण्यासाठी नागरिकांनीही प्रशासनाला सहकार्य करावे, असे यावेळी सांगण्यात आले.

या बैठकीला अतिरिक्त आयुक्त कुलदीप जंगम, तृप्ती सांडभोर, विक्रांत बगाडे, मुख्य अभियंता प्रमोद ओंभासे, जनता संपर्क अधिकारी प्रफुल्ल पुराणिक आणि सर्व क्षेत्रीय अधिकारी उपस्थित होते.

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवडला विधान परिषदेची संधी मिळावी; योगेश बहल यांच्या नावाचा कार्यकर्त्यांकडून आग्रह

पिंपरी चिंचवड प्रतिनिधी लक्ष्मण प्रधान, २८ एप्रिल २०२६ मॅक्स मंथन डेली न्यूज:

पिंपरी: पिंपरी-चिंचवड शहराच्या सर्वांगीण विकासासाठी आणि राष्ट्रवादी काँग्रेस पक्षाची ताकद वाढवण्यासाठी आगामी विधान परिषद निवडणुकीत शहराला प्रतिनिधित्व मिळावे, अशी आग्रही मागणी शहराच्या वतीने करण्यात आली आहे. या अनुषंगाने ज्येष्ठ नगरसेवक आणि माजी महापौर योगेश बहल यांचे नाव एकमताने सुचवण्यात आले असून, या मागणीचे निवेदन राज्याच्या उपमुख्यमंत्री तथा पक्षाच्या राष्ट्रीय अध्यक्षा सुनेत्रा पवार आणि राज्यसभा खासदार पार्थ पवार यांना देण्यात आले.

सोमवारी (दि. २७ एप्रिल २०२६) पिंपरी-चिंचवडमधील आजी-माजी नगरसेवक आणि पदाधिकाऱ्यांच्या शिष्टमंडळाने मुंबई येथील ‘देवगिरी’ निवासस्थानी ही भेट घेतली. यावेळी शहराच्या राजकीय सद्यस्थितीवर सविस्तर चर्चा करण्यात आली.

योगेश बहल हे सन १९९२ पासून आजतागायत सलग सात वेळा नगरसेवक म्हणून निवडून आले आहेत. त्यांनी महापौर, सभागृह नेते, स्थायी समिती अध्यक्ष आणि शहराध्यक्ष अशा विविध महत्त्वाच्या पदांची जबाबदारी यशस्वीपणे सांभाळली आहे. शहरातील सर्व जाती-घटकांना सोबत घेऊन काम करणारा आणि प्रशासकीय कामाचा दांडगा अनुभव असलेला नेता म्हणून त्यांची ओळख आहे. राष्ट्रवादी काँग्रेस पक्षाच्या वाढीसाठी आणि महापालिकेत सत्ता आणण्यासाठी त्यांनी आजवर मोलाचे कार्य केले असून, ते अजितदादांचे अत्यंत विश्वासू आणि एकनिष्ठ कार्यकर्ते मानले जातात.

• अनुभवाला न्याय: पिंपरी विधानसभा मतदारसंघ अनेक वर्षांपासून आरक्षित असल्याने खुल्या प्रवर्गातील अनेक निष्ठावान कार्यकर्त्यांना संधी मिळालेली नाही. बहल यांच्या रूपाने या अनुभवाला न्याय मिळावा, अशी कार्यकर्त्यांची भावना आहे.

• विकासाला गती: शहरात सध्या राष्ट्रवादीचा एकच आमदार (पिंपरी मतदारसंघ) आहे. संपूर्ण शहराच्या विकासासाठी आणि प्रशासनाकडून प्रभागातील कामे करून घेण्यासाठी विधान परिषदेचे बळ असणे आवश्यक असल्याचे निवेदनात म्हटले आहे.

• कॉस्मोपॉलिटन शहराला संदेश: पिंपरी-चिंचवड ही औद्योगिक आणि आयटी नगरी असून येथे सर्वधर्मीय नागरिक राहतात. अशा ‘कॉस्मोपॉलिटन’ शहरात बहल यांच्यासारख्या अल्पसंख्याक समाजातील अनुभवी व्यक्तीला संधी दिल्यास संपूर्ण शहरात सकारात्मक संदेश जाईल.

यावेळी डॉ. वैशाली घोडेकर, डब्बू आसवाणी, शाम लांडे, सीमा सावळे, वैशाली काळभोर, अतुल शितोळे, जितेंद्र ननावरे, फजल शेख, संतोष बारणे, राजेंद्र जगताप, प्रकाश सोमवंशी, निकिता कदम, विकास साने, राजू बनसोडे, शेखर चिंचवडे, वर्षा जगताप, उज्वला ढोरे, प्रियंका कुदळे, अरुणा लंगोटे, अश्विनी वाबळे, सारिका मासुळकर, प्रतीक्षा जवळकर-लांघी, दीप्ती कांबळे, ज्ञानेश्वर कांबळे, सारंग कामतेकर, तानाजी खाडे, माऊली मोरे, रवींद्र ओव्हाळ, युसूफ कुरेशी, दीपक साकोरे, राजू लोखंडे, निलेश शिंदे, अंबरनाथ कांबळे यांच्यासह अनेक पदाधिकारी व कार्यकर्ते मोठ्या संख्येने उपस्थित होते.

या निवेदनावर उपमुख्यमंत्री सुनेत्रा पवार यांनी सकारात्मक विचार करण्याचे आश्वासन दिले असून, यामुळे शहरातील राजकीय हालचालींना वेग आला आहे.

© २०२६ मॅक्स मंथन डेली न्यूज. सर्व हक्क राखीव.

चाकण पोलिसांची मोठी कारवाई: प्रधानमंत्री आवास योजनेच्या साईटवरून साहित्य चोरणारी टोळी गजाआड; ३१ लाखांचा मुद्देमाल जप्त

पिंपरी चिंचवड प्रतिनिधी लक्ष्मण प्रधान, २८ एप्रिल २०२६ मॅक्स मंथन डेली न्यूज:

चाकण: चाकण नगरपरिषद हद्दीतील राक्षेवाडी येथे सुरू असलेल्या प्रधानमंत्री आवास योजनेच्या गृहप्रकल्पाच्या साईटवरून २० लाख रुपये किमतीच्या ॲल्युमिनियम शटरिंग प्लेट्स चोरणाऱ्या टोळीचा चाकण पोलिसांनी पर्दाफाश केला आहे. या कारवाईत पोलिसांनी चार मुख्य आरोपी आणि चोरीचा माल विकत घेणाऱ्या तीन आरोपींना अटक केली असून, त्यांच्याकडून एकूण ३१ लाख १० हजार रुपयांचा मुद्देमाल जप्त केला आहे.

राक्षेवाडी येथे प्रधानमंत्री आवास योजनेअंतर्गत २१० घरांचे बांधकाम सुरू आहे. १० एप्रिल ते १६ एप्रिल २०२६ च्या दरम्यान अज्ञात चोरट्यांनी बांधकाम साईटवरून २० लाख रुपये किमतीच्या २८० स्क्वेअर मीटर ॲल्युमिनियम शटरिंग प्लेट्स चोरून नेल्या होत्या. याप्रकरणी १८ एप्रिल रोजी चाकण पोलीस ठाण्यात गुन्हा (क्र. ३४०/२०२६) दाखल करण्यात आला होता.

गुन्ह्याचा तपास करत असताना पोलिसांना घटनास्थळ परिसरात एक बेवारस मोटारसायकल मिळून आली. या दुचाकीचा तांत्रिक तपास करून मूळ मालकाचा शोध घेण्यात आला. तसेच परिसरातील सीसीटीव्ही कॅमेऱ्यांचे बारकाईने निरीक्षण केले असता, मुख्य आरोपी रामरक्षा ऊर्फ राजू धर्मराज पासवान (वय ४०, रा. सुसगाव, मुळ रा. उत्तर प्रदेश) हा पोलिसांच्या जाळ्यात अडकला.

रामरक्षा पासवानच्या चौकशीतून त्याचे इतर साथीदार निष्पन्न झाले, ज्यांना येलवाडी (ता. खेड) येथून ताब्यात घेण्यात आले:

१) रामरक्षा ऊर्फ राजू धर्मराज पासवान (वय ४०)

२) स्वराज शांताराम कालापाड (वय २३)

३) स्वप्नील शांताराम कालापाड (वय २५)

४) अक्रम रफीकउल्ला खान (वय २८)

या चौघांशिवाय चोरीचा मुद्देमाल विकत घेणाऱ्या आणखी तीन आरोपींनाही पोलिसांनी जेरबंद केले आहे.

पोलिसांनी आरोपींकडून चोरीसाठी वापरलेली दोन चारचाकी वाहने, दोन मोटारसायकली आणि चोरीला गेलेल्या सर्व ॲल्युमिनियम शटरिंग प्लेट्स असा एकूण ३१ लाख १० हजार रुपयांचा मुद्देमाल जप्त केला आहे.

ही कामगिरी पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपायुक्त (परिमंडळ ३) मारुती जगताप, सहायक पोलीस आयुक्त सचिन कदम यांच्या मार्गदर्शनाखाली चाकण पोलीस ठाण्याचे वरिष्ठ पोलीस निरीक्षक जितेंद्र कदम, पोलीस निरीक्षक (गुन्हे) विनोद पाटील, तपास पथकाचे उपनिरीक्षक चंद्रशेखर मोरखंडे, पोलीस अंमलदार यादव, डमडरे, कोळेकर, कोळी, लोखंडे आणि जगताप यांनी केली आहे.

© २०२६ मॅक्स मंथन डेली न्यूज. सर्व हक्क राखीव.

सांगवी पोलिसांची मोठी कारवाई; ३७ लाखांचा ७४ किलो गांजा जप्त, शिरूरच्या तस्कराला बेड्या

पिंपरी चिंचवड प्रतिनिधी बालाजी नवले, २८ एप्रिल २०२६ मॅक्स मंथन डेली न्यूज:

सांगवी: सांगवी परिसरात गांजा विक्रीसाठी आलेल्या एका तस्कराला सांगवी पोलिसांनी अटक केली असून, त्याच्याकडून एकूण ३७ लाख ९ हजार रुपये किमतीचा ७४.१८ किलो ग्रॅम गांजा जप्त केला आहे. या कारवाईत पोलिसांनी एका आरोपीला बेड्या ठोकल्या असून त्याचा साथीदार फरार झाला आहे.

दिनांक १६ एप्रिल २०२६ रोजी रात्री सांगवी तपास पथकातील अधिकारी व अंमलदार परिसरात गस्त घालत होते. यावेळी एका काळया रंगाच्या ‘शाईन’ मोटारसायकलवर एक तरुण पांढऱ्या रंगाचे पोते बांधून निर्जनस्थळी उभा असल्याचे दिसून आले. पोलिसांना पाहताच तो पळून जाऊ लागला, मात्र पथकाने पाठलाग करून त्याला शिताफीने पकडले.

अटक करण्यात आलेल्या आरोपीचे नाव गणेश कैलास चव्हाण (वय ३०, रा. गणेशगाव खलसा, ता. शिरूर) असे आहे. त्याच्या मोटारसायकलवरील पोत्याची झडती घेतली असता ७ लाख रुपये किमतीचा १४ किलो गांजा मिळून आला. याप्रकरणी सांगवी पोलीस ठाण्यात एनडीपीएस ॲक्टनुसार गुन्हा दाखल करण्यात आला.

आरोपी गणेश चव्हाणची पोलीस कोठडीत कसून चौकशी केली असता, त्याने हा माल त्याचा साथीदार विनोद ज्ञानेश्वर झरे याने दिल्याचे सांगितले. विनोद झरे याने दौंड तालुक्यातील पाटेठाण येथील आपल्या राहत्या घराजवळील म्हशीच्या गोठ्यात आणखी गांजा लपवून ठेवल्याची माहिती तपासात समोर आली. त्यानुसार पोलिसांनी पाटेठाण येथे छापा टाकून गोठ्यातून ३० लाख ९ हजार रुपये किमतीचा ६०.१८ किलो गांजा जप्त केला. या संपूर्ण कारवाईत आतापर्यंत ७४.१८ किलो गांजा हस्तगत करण्यात आला आहे.

ही कामगिरी पोलीस आयुक्त विनयकुमार चौबे, सह पोलीस आयुक्त शशिकांत महावरकर, अपर पोलीस आयुक्त सारंग आव्हाड, पोलीस उपायुक्त (परिमंडळ १) संदीप आटोळे, सहायक पोलीस आयुक्त सचिन हिरे यांच्या मार्गदर्शनाखाली सांगवी पोलीस ठाण्याचे वरिष्ठ पोलीस निरीक्षक जितेंद्र कोळी, पोलीस निरीक्षक (गुन्हे) अमोल नांदेकर, उपनिरीक्षक महादेव भालेराव, रोहित पाटील, सुरेश हिंगे आणि पथकातील अंमलदार शिंदे, काळभोर, ढवळे, सुपे, गोडे, बनकर, खंडागळे, पाटील यांनी केली आहे.

© २०२६ मॅक्स मंथन डेली न्यूज. सर्व हक्क राखीव.

मराठी भाषेच्या ऐतिहासिक निर्णयाबद्दल परिवहन मंत्री प्रताप सरनाईक यांचा मंत्रालयात विशेष गौरव

पिंपरी चिंचवड प्रतिनिधी आकाश कांबळे, २८ एप्रिल २०२६ मॅक्स मंथन डेली न्यूज:

मुंबई: महाराष्ट्राची अस्मिता असलेल्या मराठी भाषेचा सन्मान राखण्यासाठी आणि परिवहन विभागांतर्गत ऑटो-टॅक्सी चालक-मालकांना मराठी भाषा सक्तीची करण्याचा धाडसी निर्णय घेतल्याबद्दल राज्याचे परिवहन मंत्री ना. प्रताप सरनाईक यांचा मुंबई मंत्रालयातील त्यांच्या दालनात भव्य सत्कार करण्यात आला.

महाराष्ट्र रिक्षा पंचायत व ऑटो टॅक्सी चालक-मालक संघटना संयुक्त कृती समितीच्या वतीने कष्टकरी जनतेचे नेते डॉ. बाबा कांबळे यांच्या हस्ते सरनाईक यांना जगद्गुरु संत तुकाराम महाराज यांची पगडी, उपरणे आणि पवित्र ‘गाथा’ देऊन सन्मानित करण्यात आले.

यावेळी डॉ. बाबा कांबळे यांनी संयुक्त महाराष्ट्राच्या लढ्याचा उल्लेख करत सांगितले की, १०७ हुतात्म्यांच्या बलिदानातून हा महाराष्ट्र मराठी भाषेच्या आधारावर निर्माण झाला आहे. मुंबईत मराठी भाषेला होणारा विरोध दुर्दैवी असून, अशा परिस्थितीत प्रताप सरनाईक यांनी घेतलेला मराठी सक्तीचा निर्णय ऐतिहासिक आहे. या निर्णयाची अंमलबजावणी सुरू केल्याबद्दल कष्टकरी समाजाच्या वतीने हा सन्मान करण्यात आला.

सत्कार सोहळ्यानंतर झालेल्या बैठकीत परिवहन मंत्र्यांनी रिक्षा आणि टॅक्सी चालकांच्या विविध समस्यांवर सकारात्मक चर्चा केली:

• ॲग्रीगेटर कंपन्यांवर लगाम: ओला-उबरसारख्या कंपन्यांकडून वाहन चालकांचे होणारे शोषण थांबवण्यासाठी लवकरच ‘ॲग्रीगेटर पॉलिसी’ला मान्यता देऊन दर निश्चित करण्यात येतील, असे आश्वासन मंत्र्यांनी दिले.

• कल्याणकारी महामंडळ: रिक्षा चालक-मालक कल्याणकारी महामंडळाच्या कामाला गती देऊन चालकांचा आरोग्य आणि विम्याचा प्रश्न प्राधान्याने सोडवण्यात येईल.

• मुक्त परवाना धोरण: रिक्षा व्यवसायातील अनियंत्रित स्पर्धा रोखण्यासाठी ‘ओपन परमिट’ पद्धत बंद केल्याबद्दल संघटनेने मंत्र्यांचे आभार मानले.

• सीएनजी हायड्रो टेस्टिंग: रिक्षाचालकांवरील सीएनजी बाटला टेस्टिंगचा आर्थिक भार कमी करण्याबाबत संबंधित अधिकाऱ्यांना तातडीने आदेश दिले.

याप्रसंगी संघटनेचे अनिल शिरसाट (प्रमुख, रिक्षा ब्रिगेड), शुभम तांदळे (मुख्य संघटक), विशाल ससाने (पिंपरी-चिंचवड शहर युवक अध्यक्ष), प्रदीप आय्यार (विद्यार्थी वाहतूक विभाग), प्रकाश यशवंत (सचिव, टपरी-पाथरी पंचायत) यांसह इतर पदाधिकारी उपस्थित होते.

“परिवहन मंत्री प्रताप सरनाईक यांनी मराठी भाषेबाबत घेतलेली भूमिका स्वाभिमान वाढवणारी आहे. या बैठकीमुळे राज्यातील लाखो रिक्षाचालकांच्या प्रश्नांना खऱ्या अर्थाने न्याय मिळेल.”

— डॉ. बाबा कांबळे, नेते, महाराष्ट्र रिक्षा पंचायत

© २०२६ मॅक्स मंथन डेली न्यूज. सर्व हक्क राखीव.

शहरातील सर्व प्रकल्प वेळेत पूर्ण करून नागरिकांना मूलभूत सुविधा द्या – नगरविकास राज्यमंत्री माधुरी मिसाळ

पिंपरी चिंचवड प्रतिनिधी लक्ष्मण प्रधान , २८ एप्रिल २०२६ मॅक्स मंथन डेली न्यूज:

पिंपरी: “पिंपरी चिंचवड शहराच्या विकासकामांमध्ये गुणवत्ता आणि पारदर्शकता राखणे अत्यंत महत्त्वाचे आहे. महापालिका, पीएमआरडीए आणि पीएमपीएल यांनी परस्परांमध्ये समन्वय ठेवून प्रलंबित कामे प्राधान्याने पूर्ण करावीत आणि नागरिकांना मूलभूत सुविधा अधिक प्रभावीपणे उपलब्ध करून द्याव्यात,” असे निर्देश राज्याच्या नगरविकास राज्यमंत्री माधुरी मिसाळ यांनी दिले.

पिंपरी चिंचवड महानगरपालिकेच्या दिवंगत महापौर मधुकरराव पवळे सभागृहात शहरातील विविध महत्त्वाच्या विकासकामांची आढावा बैठक सोमवारी पार पडली. यावेळी राज्यमंत्री मिसाळ बोलत होत्या.

बैठकीत आयुक्त डॉ. विजय सूर्यवंशी यांनी संगणकीय सादरीकरणाद्वारे पाणीपुरवठा (अमृत २.०), घनकचरा व्यवस्थापन, रस्ते विकास, मेट्रो वाहतूक, प्रधानमंत्री आवास योजना, नदी सुधार प्रकल्प आणि चापेकर वाडा यांसारख्या विविध प्रकल्पांची माहिती दिली. राज्यमंत्री मिसाळ यांनी प्रत्येक प्रकल्पाची सद्यस्थिती, कामाचा वेग आणि तांत्रिक अडचणींचा सविस्तर आढावा घेऊन गृहनिर्माण प्रकल्पातील लाभार्थ्यांना वेळेत घरे देण्याचे आदेश दिले.

• आमदार महेश लांडगे: इंद्रायणी नदी स्वच्छतेसाठी उगमस्थानापासून एसटीपी प्रकल्प राबवावा. तसेच चिखली-घरकुल प्रकल्पातील सुविधांच्या अभावामुळे तेथील सदनिकाधारकांचा आतापर्यंतचा मिळकत कर माफ करावा.

• आमदार शंकर जगताप: मेट्रो प्रकल्पाला गती द्यावी, रेड झोन पॉलिसी कार्यान्वित करावी आणि शहराच्या भविष्यातील पाण्याची गरज पूर्ण करण्यासाठी पवना बंदिस्त जलवाहिनी प्रकल्पासाठी पुढाकार घ्यावा.

• आमदार अमित गोरखे व उमा खापरे: सर्वसामान्यांना परवडणाऱ्या घरांमध्ये दर्जेदार मूलभूत सुविधा द्याव्यात आणि पाणीपुरवठ्यासाठी विशेष निधी उपलब्ध करून द्यावा.

या बैठकीस महापौर रवी लांडगे, विधान परिषद सदस्य उमा खापरे, अमित गोरखे, आमदार महेश लांडगे, शंकर जगताप, उपमहापौर शर्मिला बाबर, स्थायी समिती सभापती अभिषेक बारणे, सत्तारूढ पक्षनेते प्रशांत शितोळे, विरोधी पक्षनेते भाऊसाहेब भोईर आणि महापालिकेचे विविध विभागांचे वरिष्ठ अधिकारी उपस्थित होते.

कार्यक्रमाचे सूत्रसंचालन जनता संपर्क अधिकारी प्रफुल्ल पुराणिक यांनी केले, तर आभार महापौर रवी लांडगे यांनी मानले.

© २०२६ मॅक्स मंथन डेली न्यूज. सर्व हक्क राखीव.

महाराष्ट्रालाच नव्हे तर संपूर्ण भारताला हेवा वाटेल असे स्मारक उभारू – अण्णा बनसोडे

पिंपरी चिंचवड प्रतिनिधी बालाजी नवले, २७ एप्रिल २०२६ मॅक्स मंथन डेली न्यूज:

पिंपरी: “पिंपरी येथे उभारण्यात येत असलेला त्यागमूर्ती माता रमाई भीमराव आंबेडकर सृष्टी प्रकल्प हा शहरातील आंबेडकरी जनतेच्या तब्बल २२ वर्षांच्या संघर्षलढ्याचे मोठे यश आहे. केवळ महाराष्ट्रच नाही, तर संपूर्ण भारताला हेवा वाटेल असे भव्य आणि प्रेरणादायी स्मारक याठिकाणी उभारले जाईल,” असे प्रतिपादन राज्याच्या विधानसभेचे उपाध्यक्ष अण्णा बनसोडे यांनी केले.

माता रमाई भीमराव आंबेडकर सृष्टी प्रकल्पाचे भूमिपूजन मंगळवारी (२८ एप्रिल) होत आहे. या पार्श्वभूमीवर अण्णा बनसोडे यांनी आज प्रत्यक्ष स्मारकस्थळाला भेट देऊन कामाचा सविस्तर आढावा घेतला. यावेळी अतिरिक्त आयुक्त कुलदीप जंगम, सह शहर अभियंता मनोज सेठीया, मुख्य सुरक्षा अधिकारी उदय जरांडे, विशेष अधिकारी किरण गायकवाड आणि कार्यकारी अभियंता विजय जाधव उपस्थित होते.

पाहणी दरम्यान बनसोडे म्हणाले की, “हे स्मारक म्हणजे आंबेडकरी चळवळीच्या इतिहासातील अत्यंत महत्त्वाचा अध्याय आहे. माता रमाईंचा त्याग आणि त्यातून उभे राहिलेले डॉ. बाबासाहेब आंबेडकरांचे विश्व याचे प्रभावी दर्शन या स्मारकातून घडेल. हा प्रकल्प दर्जेदार होण्यासाठी आवश्यक तो सर्व निधी उपलब्ध करून दिला जाईल आणि कामात कोणतीही उणीव राहू दिली जाणार नाही.” हे स्मारक भावी पिढ्यांसाठी प्रेरणास्थान ठरेल, असा विश्वासही त्यांनी यावेळी व्यक्त केला.

पिंपरी चौकात सुमारे २४९८.९७ चौरस मीटर क्षेत्रावर साकारणाऱ्या या प्रकल्पासाठी २४ महिन्यांचा कालावधी देण्यात आला आहे. या स्मारकाचे वैशिष्ट्ये खालीलप्रमाणे असतील:

• आरसीसी स्ट्रक्चर व म्युरल्स: मजबूत बांधकाम आणि कलात्मक म्युरल्सद्वारे माता रमाईंच्या जीवनातील प्रसंग साकारले जातील.

• आधुनिक सोयीसुविधा: लँडस्केप गार्डन, कारंजे, आकर्षक प्रवेश कमान आणि संपूर्ण परिसरात अत्याधुनिक रोषणाई.

• डिजिटल अनुभव: क्युआर कोड आणि बहुभाषिक ऑडिओ प्रणालीमुळे नागरिकांना डिजिटल स्वरूपात माहिती उपलब्ध होईल.

• समावेशकता: दिव्यांगांसाठी रॅम्प, लिफ्ट आणि नागरिकांच्या सोयीसाठी स्वतंत्र स्वच्छतागृह व बसण्याची व्यवस्था.

अण्णा बनसोडे यांनी संबंधित अधिकाऱ्यांना स्मारकाचे काम नियोजनबद्ध आणि उच्च दर्जाचे राखण्याचे निर्देश दिले आहेत. या स्मारकाच्या उभारणीमुळे शहराच्या सांस्कृतिक वैभवात मोलाची भर पडणार आहे.

© २०२६ मॅक्स मंथन डेली न्यूज. सर्व हक्क राखीव.

पावसाळ्यातील आपत्ती व्यवस्थापनासाठी पिंपरी पालिकेची मोठी तयारी; नियंत्रण व नोडल अधिकाऱ्यांची नियुक्ती

पिंपरी चिंचवड प्रतिनिधी लक्ष्मण प्रधान, २७ एप्रिल २०२६ मॅक्स मंथन डेली न्यूज:

पिंपरी: पावसाळ्यात उद्भवू शकणाऱ्या संभाव्य नैसर्गिक आपत्ती आणि पूरस्थितीचा सामना करण्यासाठी पिंपरी-चिंचवड महानगरपालिका प्रशासनाने कंबर कसली आहे. नागरिकांना आपत्कालीन परिस्थितीत तात्काळ मदत मिळावी यासाठी आयुक्त डॉ. विजय सूर्यवंशी यांनी क्षेत्रीय कार्यालय स्तरावर नियंत्रण अधिकारी आणि नोडल अधिकाऱ्यांच्या नियुक्तीचे आदेश आज जारी केले आहेत.

या नियोजनानुसार, प्रत्येक क्षेत्रीय कार्यालयासाठी उपआयुक्त पदावरील अधिकाऱ्यांची नोडल अधिकारी म्हणून, तर अतिरिक्त आयुक्त पदावरील अधिकाऱ्यांची नियंत्रण अधिकारी म्हणून नियुक्ती करण्यात आली आहे.

नियुक्त करण्यात आलेल्या नोडल अधिकाऱ्यांनी पावसाळ्यापूर्वीची नालेसफाई आणि इतर प्रतिबंधात्मक कामे वेळेत पूर्ण करून घेण्याचे आदेश दिले आहेत. तसेच, आपत्ती व्यवस्थापन विभागाच्या पूरनियंत्रण आराखड्यानुसार स्थापत्य, पाणीपुरवठा, आरोग्य, अग्निशमन, वैद्यकीय आणि विद्युत विभागाशी समन्वय साधून आपत्कालीन सेवा सुरळीत ठेवण्याची जबाबदारी त्यांच्यावर सोपवण्यात आली आहे.

क्षेत्रीय कार्यालयानिहाय नियंत्रण अधिकारी (अतिरिक्त आयुक्त):

क्षेत्रीय कार्यालयानिहाय नियुक्त नोडल अधिकारी (उपआयुक्त):

शहरात अतिवृष्टीमुळे पूरस्थिती निर्माण झाल्यास नागरिकांच्या मालमत्तेचे रक्षण करणे आणि जीवितहानी टाळणे हे प्रशासनाचे मुख्य उद्दिष्ट असल्याचे आयुक्तांनी स्पष्ट केले आहे. नागरिकांनी आपत्कालीन परिस्थितीत संबंधित क्षेत्रीय कार्यालयातील या अधिकृत क्रमांकांवर संपर्क साधावा, असे आवाहन पालिकेच्या वतीने करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.

दापोडी ते निगडी या राष्ट्रीय महामार्गाला अण्णासाहेब मगर यांचे नाव देणार – महापौर रवी लांडगे

पिंपरी चिंचवड प्रतिनिधी बालाजी नवले, २७ एप्रिल २०२६ मॅक्स मंथन डेली न्यूज:

पिंपरी: पिंपरी-चिंचवड शहराचे शिल्पकार आणि कै. खासदार अण्णासाहेब मगर यांच्या कार्याचा गौरव म्हणून महापालिकेच्या अखत्यारीत असलेल्या दापोडी ते निगडी या राष्ट्रीय महामार्गाला त्यांचे नाव देण्यात येईल, अशी महत्त्वपूर्ण घोषणा महापौर रवी लांडगे यांनी आज येथे केली.

अण्णासाहेब मगर यांच्या १०७ व्या जयंतीनिमित्त अंशुल प्रकाशनच्या वतीने त्यांच्या दुर्मिळ छायाचित्रांच्या प्रदर्शनाचे आयोजन करण्यात आले होते. या प्रदर्शनाच्या उद्घाटनप्रसंगी महापौर बोलत होते. दापोडी ते निगडी हा महामार्ग सध्या देखभाल आणि दुरुस्तीसाठी महापालिकेच्या ताब्यात असल्याने नामकरणाचा निर्णय घेण्यास कोणतीही तांत्रिक अडचण येणार नाही. प्रशासनाशी चर्चा करून लवकरच याबाबत अधिकृत निर्णय घेतला जाईल, असेही त्यांनी स्पष्ट केले.

या सोहळ्याला खासदार श्रीरंग बारणे, आमदार शंकर जगताप, आमदार अमित गोरखे, स्थायी समिती अध्यक्ष अभिषेक बारणे, विरोधी पक्षनेते भाऊसाहेब भोईर, भाजप शहराध्यक्ष शत्रुघ्न काटे, नगरसेवक शितल शिंदे, अनंत कोऱ्हाळे, अमित गावडे, नगरसेविका अरुणा लंगोटे आणि माजी नगरसेवक अरुण बोऱ्हाडे यांसह अनेक मान्यवर उपस्थित होते.

अंशुल प्रकाशनचे संचालक विजय जगताप आणि लेखिका डॉ. सीमा काळभोर यांनी या प्रदर्शनाचे आयोजन केले आहे. अण्णासाहेबांच्या जीवनातील विविध दुर्मिळ प्रसंग आणि त्यांच्या कार्याची सुमारे ४५ छायाचित्रे या प्रदर्शनात मांडण्यात आली आहेत.

खासदार श्रीरंग बारणे यांनी यावेळी अण्णासाहेबांच्या भाषणांच्या आठवणींना उजाळा दिला, तर आमदार शंकर जगताप यांनी आपले वडील ह.भ.प. पांडुरंग जगताप यांना अण्णासाहेबांचा लाभलेला सहवास आणि त्या काळातील पंचायत समितीच्या कामाच्या आठवणी सांगितल्या.

आमदार अमित गोरखे यांनी अण्णासाहेबांचे कार्य शालेय विद्यार्थ्यांपर्यंत पोहोचवण्यासाठी शाळांमध्ये अशा प्रदर्शनांचे आयोजन करण्याची आणि त्यांच्या जीवनावर निबंध व वक्तृत्व स्पर्धा घेण्याची सूचना केली. अभिषेक बारणे, भाऊसाहेब भोईर आणि शत्रुघ्न काटे यांनीही अण्णासाहेबांच्या कार्याचा गौरव केला.

हे प्रदर्शन येत्या २९ एप्रिलपर्यंत सर्वांसाठी विनामूल्य खुले राहणार आहे. कार्यक्रमाच्या यशस्वीतेसाठी संभाजी बारणे, नंदू भोगले आणि वेदांत काळभोर यांनी परिश्रम घेतले. आभार प्रदर्शन डॉ. सीमा काळभोर यांनी केले.

© २०२६ मॅक्स मंथन डेली न्यूज. सर्व हक्क राखीव.

घरफोडीचा गुन्हा २४ तासांत उघड; महाळुंगे पोलिसांकडून ३८ वर्षीय महिलेला अटक, १३.८७ लाखांचा मुद्देमाल जप्त

पिंपरी चिंचवड प्रतिनिधी आकाश कांबळे, २७ एप्रिल २०२६ मॅक्स मंथन डेली न्यूज:

महाळुंगे: दक्षिण महाळुंगे एमआयडीसी पोलीस ठाण्याच्या हद्दीत झालेली दिवसाची घरफोडी उघड करण्यात पोलिसांना अवघ्या २४ तासांत यश आले आहे. या प्रकरणात पोलिसांनी एका ३८ वर्षीय महिलेला अटक केली असून, तिच्याकडून १० तोळे सोन्याचे दागिने (किंमत १३,८७,००० रुपये) असा १०० टक्के मुद्देमाल जप्त केला आहे.

दिनांक २२ एप्रिल २०२६ रोजी दक्षिण महाळुंगे परिसरात दिवसा घरफोडी झाल्याची तक्रार दाखल झाली होती. फिर्यादीच्या घरातून कपाटात ठेवलेले १० तोळे सोन्याचे दागिने अज्ञात चोरट्याने लांबवले होते. या प्रकरणी भारतीय न्याय संहिता कलम ३३१(१), ३०५(+) अन्वये गुन्हा दाखल करण्यात आला होता.

पोलीस उपायुक्त (परिमंडळ ४) श्वेता खेडकर आणि सहाय्यक पोलीस आयुक्त सचिन कदम यांच्या मार्गदर्शनाखाली तपास पथकाने परिसरातील सीसीटीव्ही फुटेजची तपासणी केली. तपासात एका संशयित महिलेचा वावर दिसून आला. तांत्रिक तपासाच्या आधारे पोलिसांनी सारिका संतोष भुजबळ (वय ३८, रा. पवार चाळ, तळेगाव दाभाडे, मावळ) हिला ताब्यात घेतले.

पोलीस खाक्या दाखवताच तिने गुन्ह्याची कबुली दिली. विशेष म्हणजे, आरोपी महिला ही फिर्यादीच्या ओळखीची असून तिला घरातील दागिन्यांबाबत माहिती होती. तिने घराच्या बनावट चावीचा वापर करून दिवसा घर उघडले आणि चोरी केली होती.

वरिष्ठ पोलीस निरीक्षक विजय धुमाळ, पोलीस निरीक्षक (गुन्हे) अनिल देवडे, सहाय्यक पोलीस निरीक्षक भास्कर पुल्ली, उपनिरीक्षक भारत करे आणि पथकातील अंमलदार युवराज बिराजदार, विश्वास नाणेकर, किशोर सांगळे, चेतन सावंत, महिला पोलीस अश्विनी महाडीक, वैष्णवी बालपांडे व इतर सहकाऱ्यांनी ही कामगिरी केली. या गुन्ह्याचा पुढील तपास पोलीस हवालदार किशोर सांगळे करत आहेत.

पोलीस आयुक्त विनय कुमार चौबे आणि वरिष्ठ अधिकाऱ्यांनी तपास पथकाच्या या वेगवान कामगिरीचे कौतुक केले आहे.

© २०२६ मॅक्स मंथन डेली न्यूज. सर्व हक्क राखीव.