अकोला जिल्हा पोलीस क्रीडा स्पर्धा २०२५ चा थाटात समारोप

पोलिस दलातील शिस्त, उत्साह आणि खिलाडूवृत्तीचे मान्यवरांकडून कौतुक

अकोला, प्रतिनिधी : विलास सावळे, २० सप्टेंबर २०२५, मॅक्स मंथन डेली न्यूज:

अकोला जिल्हा पोलीस क्रीडा स्पर्धा २०२५ चा समारोप नुकताच मोठ्या उत्साहात पार पडला. १७ ते १९ सप्टेंबर या कालावधीत पोलीस मुख्यालय, अकोला येथे आयोजित या स्पर्धांमध्ये पोलीस दलातील अधिकारी आणि कर्मचाऱ्यांनी मोठ्या संख्येने सहभाग घेतला. या समारोप कार्यक्रमात विजेते आणि उपविजेते संघांना आणि वैयक्तिक विजेत्यांना बक्षिसे देऊन सन्मानित करण्यात आले.

विविध खेळांचा थरार

या कार्यक्रमाला पोलीस अधीक्षक अर्चित चांडक, अपर पोलीस अधीक्षक चंद्रकांत रेड्डी आणि विशेष अतिथी म्हणून राज्य पुरस्कार प्राप्त बॉक्सर हरिवंश टावरी उपस्थित होते. मान्यवरांच्या हस्ते विविध स्पर्धांचे आयोजन करण्यात आले. यामध्ये लहान मुलांसाठी ५० आणि १०० मीटर धावण्याची स्पर्धा, अधिकाऱ्यांसाठी रस्सीखेच आणि महिलांसाठी संगीत खुर्ची स्पर्धा घेण्यात आली. त्यानंतर अकोला पोलीस दलातील सर्व खेळाडूंनी शिस्तबद्ध संचलन केले.

खेळाडूवृत्तीचे कौतुक

जनरल चॅम्पियनशिपचे विजेतेपद पोलीस मुख्यालय संघाने पटकावले, तर शहर विभाग संघ उपविजेता ठरला.

यावेळी बोलताना हरिवंश टावरी यांनी पोलीस दलाच्या शिस्तबद्धतेचे कौतुक केले. ते म्हणाले, “पोलीस दल केवळ कायदा-सुव्यवस्था राखणारे नसून, समाजात सकारात्मक ऊर्जा देणारे आदर्श आहेत. खेळांमुळे शरीरात चैतन्य आणि कामात उत्साह निर्माण होतो. अशा स्पर्धांमुळे पोलीस दलाची तंदुरुस्ती आणि बांधिलकी अधिक मजबूत होईल.”

पोलीस अधीक्षक अर्चित चांडक यांनीही खेळाडूंचा उत्साह पाहून आनंद व्यक्त केला. ते म्हणाले, “पोलीस दलाचे काम कठीण असते, अशा वेळी अशा स्पर्धांमुळे शारीरिक तंदुरुस्ती आणि संघभावना वाढीस लागते.” त्यांनी सर्व विजेत्यांचे अभिनंदन केले.

कार्यक्रमासाठी राखीव पोलीस निरीक्षक गणेश जुमनाके, गुलाब पाटणकर आणि गेम इन्चार्ज रवी ठाकूर यांनी विशेष परिश्रम घेतले. आभार प्रदर्शन अपर पोलीस अधीक्षक चंद्रकांत रेड्डी यांनी केले, तर सूत्रसंचालन पोलीस हवालदार गोपाल मुकुंदे यांनी केले.

© 2025 मॅक्स मंथन डेली न्यूज. सर्व हक्क राखीव.