केरळचे राज्यपाल राजेंद्र आर्लेकर यांची क्रांतिवीर चापेकर राष्ट्रीय संग्रहालयाला सदिच्छा भेट!
“तरुणांनी चापेकर बंधूंकडून देशभक्तीची प्रेरणा घ्यावी” – राज्यपाल आर्लेकर यांचे आवाहन; महापालिकेच्या वतीने अतिरिक्त आयुक्त प्रदीप जांभळे पाटील यांनी केले स्वागत
पिंपरी, प्रतिनिधी शाम सोनवणे, ऑक्टोबर २०२५मॅक्स मंथन डेली न्यूज:
केरळ राज्याचे राज्यपाल राजेंद्र आर्लेकर यांनी आज ( ऑक्टोबर २०२५) चिंचवड येथील क्रांतिवीर चापेकर बंधू राष्ट्रीय संग्रहालयाला सदिच्छा भेट देऊन स्मारकाची पाहणी केली. चापेकर बंधूंच्या शौर्य, प्रखर देशभक्ती आणि त्यागाच्या गोष्टी चलचित्रांद्वारे प्रत्यक्ष पाहिल्यानंतर त्यांनी देशातील तरुणांना चिंचवड येथे येऊन प्रेरणा घेण्याचे आवाहन केले.
चापेकर स्मारकाची पाहणी करून हुबेहूब दिसणारी शिल्पे आणि चलचित्रपटाद्वारे हुतात्मा चापेकर बंधूंचा इतिहास जाणून घेतल्यानंतर राज्यपाल आर्लेकर यांनी आपल्या प्रतिक्रिया व्यक्त केल्या.
राज्यपाल आर्लेकर यांचे गौरवोद्गार
राज्यपाल आर्लेकर म्हणाले, “आम्ही क्रांतिवीर चापेकर बंधूंच्या शौर्याच्या, प्रखर देशभक्ती व त्यागाच्या गोष्टी इतिहासात वाचत होतो, त्याचे प्रत्यक्ष दर्शन आज चलचित्राद्वारे आम्हाला घडले आहे.”
ते पुढे म्हणाले, “हुतात्मा चापेकर वाड्यामध्ये परंपरा, संस्कृतीच्या अनेक सुंदर छटा पहावयास मिळाल्या. चापेकर बंधूंनी देशाच्या स्वातंत्र्यासाठी दिलेले बलिदान आणि त्याग याची छोटीशी झलक बघता आली. देशांतील तरुणांनी चिंचवडमध्ये येऊन चापेकरांच्या स्मृतींना अभिवादन करावे व त्यांच्याकडून देशभक्तीची प्रेरणा घ्यावी आणि भारत मातेच्या उत्कर्षासाठी कायम प्रयत्न करत रहावेत.”
स्वागत आणि सन्मान
- महापालिकेकडून स्वागत: पिंपरी चिंचवड महानगरपालिकेच्या वतीने अतिरिक्त आयुक्त प्रदीप जांभळे पाटील यांनी राज्यपाल राजेंद्र आर्लेकर यांचे स्वागत केले.
- चापेकर स्मारक समितीकडून सत्कार: चापेकर स्मारक समितीच्या वतीने राज्यपालांना सन्मानचिन्ह आणि शाल देऊन त्यांचा सत्कार करण्यात आला.
यावेळी महानगरपालिकेचे जनता संपर्क अधिकारी प्रफुल्ल पुराणिक तसेच क्रांतिवीर चापेकर स्मारक समितीचे कोषाध्यक्ष रवींद्र नामदे, मुकुंदराव कुलकर्णी, सदस्य डॉ शकुंतला बन्सल, सुहास पोफळे, अतुल आडे, मैथिली कुलकर्णी, सतिश अवचार, नरेंद्र पेंडसे, हेमंतराव हरहरे आणि संग्रहालयातील कर्मचारी उपस्थित होते.
© मॅक्स मंथन डेली न्यूज. सर्व हक्क राखीव.
