चिखलीत ‘गॅस चोरी’चा मोठा पर्दाफाश! ज्योतीबानगर येथे अवैध रिफिलिंग रॅकेट उघडकीस
घरातून व्यावसायिक सिलेंडरमध्ये गॅस चोरताना दोघे आरोपी जेरबंद; २.२९ लाखांचा मुद्देमाल जप्त
पिंपरी चिंचवड प्रतिनिधी बालाजी नवले, दि. १२ नोव्हेंबर २०२५, मॅक्स मंथन डेली न्यूज:
पिंपरी-चिंचवड शहरातील चिखली-तळवडे परिसरात नागरिकांच्या जीविताला धोका निर्माण करणारे अवैध घरगुती गॅस रिफिलिंग रॅकेट (Illegal Gas Refilling Racket) उघडकीस आले आहे. चिखली पोलिसांनी ११ नोव्हेंबर २०२५ रोजी केलेल्या धडक कारवाईत घरातून व्यावसायिक वापराच्या सिलेंडरमध्ये गॅसची चोरी करणाऱ्या दोन आरोपींना अटक केली असून, सुमारे २ लाख २९ हजार ५००/- रुपये किमतीचा मुद्देमाल जप्त केला आहे.
- गुन्हा दाखल: भारतीय न्याय संहिता (भा.न्या.सं.) कलम २८७, २८८ सह जीवनावश्यक वस्तूंचा कायदा १९५५ चे कलम ३, ७ सह स्फोटक पदार्थ अधिनियम १९०८ चे कलम ५ प्रमाणे.
- घटनास्थळ व वेळ: ११ नोव्हेंबर २०२५ रोजी सकाळी ०९.५८ वाजता, ज्योतीबा मंदिर जवळ, सोहम भालेकर यांच्या रूममध्ये, ज्योतीबानगर, तळवडे, चिखली, पुणे.
- आरोपींची नावे:
- राहुल गयाप्रसाद ठाकूर, वय-२९ वर्षे, मूळ रा. इख्तर्रागोला, जिल्हा आग्रा, राज्य उत्तरप्रदेश.
- कमल पुरुषोत्तम ठाकूर, वय-३२ वर्षे, मूळ रा. इख्तर्रागोला, जिल्हा आग्रा, राज्य उत्तरप्रदेश.
चिखली पोलिसांनी टाकलेल्या छाप्यात दोन्ही आरोपी घरगुती वापरासाठी भरलेले गॅस सिलेंडर वापरून रिफिलिंग उपकरणांच्या साहाय्याने व्यावसायिक सिलेंडरमध्ये गॅस चोरताना रंगेहाथ पकडले गेले. हा अत्यंत धोकादायक व्यवसाय कोणत्याही खबरदारीशिवाय आणि प्रशासनाची परवानगी न घेता सुरू होता.
कारवाईत जप्त केलेला मुद्देमाल:
- ३९ गॅस सिलेंडर: (३३ घरगुती वापराचे आणि ०६ व्यावसायिक वापराचे)
- साहित्य: ०१ वजन काटा, गॅस रिफिल करण्याचे साहित्य (०२ लोखंडी मोठे पिन-रिफिलर आणि ०१ लोखंडी पकड).
- इतर: ३० पावत्यांसह.
- एकूण किंमत: ₹ २,२९,५००/- (दोन लाख एकोणतीस हजार पाचशे रुपये).
या कारवाईमुळे नागरिकांच्या सुरक्षेला धोका निर्माण करणारे तसेच शासनाचा महसूल बुडवणारे अवैध कृत्यावर आळा बसला आहे. या प्रकरणाचा पुढील तपास पोलीस उपनिरीक्षक देवकर, चिखली पोलीस स्टेशन करत आहेत.
© २०२५ मॅक्स मंथन डेली न्यूज. सर्व हक्क राखीव.
