पिंपरी-चिंचवडमध्ये भाजपची पुन्हा ‘मुसंडी’; सहा महिन्यांच्या अविरत पक्षबांधणीमुळे ‘कमळ’ जोमाने फुलले

पिंपरी-चिंचवड प्रतिनिधी : बालाजी नवले, २१ जानेवारी २०२६ | मॅक्स मंथन डेली न्यूज:

पिंपरी-चिंचवड : नुकत्याच पार पडलेल्या पिंपरी-चिंचवड महानगरपालिकेच्या निवडणुकीत भारतीय जनता पक्षाने केवळ आपली सत्ता राखली नाही, तर जागांच्या संख्येतही मोठी वाढ केली आहे. १२८ सदस्य संख्या असलेल्या या महापालिकेत भाजपने ८४ जागांवर विजय मिळवून स्पष्ट बहुमत मिळवले. या विजयाचे श्रेय शहराध्यक्ष शत्रुघ्न ऊर्फ बापू काटे यांनी गेल्या सहा महिन्यांपासून केलेल्या शिस्तबद्ध पक्ष संघटना बांधणीला आणि कार्यकर्त्यांच्या मेहनतीला दिले आहे.

२०१७ च्या निवडणुकीत भाजपने ७७ जागा जिंकून प्रथमच पालिकेत सत्ता मिळवली होती. तेव्हा दिवंगत आमदार लक्ष्मण जगताप शहराध्यक्ष होते. यंदाच्या निवडणुकीत पक्षाने ८४ जागा जिंकत गेल्या वेळेपेक्षा ७ जागा अधिक मिळवल्या आहेत. विशेष म्हणजे, चिंचवड विधानसभा मतदारसंघात येणाऱ्या ३९ जागांवर विजय मिळवून जगताप कुटुंबाचा आणि भाजपचा बालेकिल्ला अबाधित असल्याचे पुन्हा एकदा सिद्ध झाले आहे. आमदार शंकर जगताप यांच्या मार्गदर्शनाखाली चिंचवडमध्ये पक्षाने दमदार कामगिरी केली.

मे २०२५ मध्ये शहराध्यक्षपदाची धुरा सांभाळल्यानंतर बापू काटे यांनी अवघ्या आठ महिन्यांत पक्षाला विजयापर्यंत नेले आहे. या विजयाबाबत बोलताना ते म्हणाले:

• संघटना बांधणी: गेल्या सहा महिन्यांपासून वॉर्ड स्तरावर नवीन कार्यकारिणी नेमून कार्यकर्त्यांना सक्रिय केले.

• योजनांची प्रसिद्धी: केंद्र आणि राज्य सरकारच्या विविध कल्याणकारी योजना घराघरांत पोहोचवण्यासाठी २०० हून अधिक छोटे-मोठे कार्यक्रम घेतले.

• नाराजी दूर करण्यात यश: तिकीट वाटप करताना जुन्या आणि नव्या कार्यकर्त्यांचा योग्य समतोल साधला. ज्या ठिकाणी काही प्रमाणात नाराजी होती, तिथे तत्काळ संवाद साधून ती दूर केल्याने बंडखोरी रोखता आली.

शहरातील या विजयात भोसरीचे आमदार महेश लांडगे, चिंचवडचे आमदार शंकर जगताप, विधानपरिषदेच्या आमदार उमा खापरे, अमित गोरखे, माजी खासदार अमर साबळे आणि शहराध्यक्ष शत्रुघ्न ऊर्फ बापू काटे यांनी एकसंघपणे काम केले. महापालिकेतील मागील पाच वर्षांतील विकासकामे आणि पक्ष संघटनेची ताकद या जोरावर मतदारांनी पुन्हा एकदा भाजपच्या हाती सत्तेच्या चाव्या सोपवल्या आहेत.

© २०२६ मॅक्स मंथन डेली न्यूज. सर्व हक्क राखीव.