कष्टकऱ्यांचा आधारवड हरपला! पिंपरी-चिंचवडमधील हजारो हातगाडी व स्टॉल धारकांनी व्यवसाय बंद ठेवून अजितदादांना वाहिली श्रद्धांजली
पिंपरी प्रतिनिधी शाम सोनवणे, २९ जानेवारी २०२६ | मॅक्स मंथन डेली न्यूज:
पिंपरी : महाराष्ट्र राज्याचे उपमुख्यमंत्री अजितदादा पवार यांच्या निधनामुळे संपूर्ण महाराष्ट्र शोकसागरात बुडाला आहे. पिंपरी-चिंचवडमधील सर्वसामान्य कष्टकरी, हातगाडी आणि स्टॉल धारकांमध्ये अजितदादांबद्दल मोठी आपुलकी होती. याच भावनेतून महाराष्ट्र फेरीवाला क्रांती महासंघ आणि पिंपरी-चिंचवड महानगरपालिका पथविक्रेता समितीने दिलेल्या आवाहनाला प्रतिसाद देत शहरातील हजारो विक्रेत्यांनी आज आपला व्यवसाय स्वयंस्फूर्तीने बंद ठेवून लाडक्या नेत्याला भावपूर्ण श्रद्धांजली वाहिली.
कामगार नेते काशिनाथ नखाते यांनी यावेळी आपल्या भावना व्यक्त करताना सांगितले की, “अजितदादा पवार हे केवळ नेते नव्हते, तर ते कष्टकरी कामगार वर्गाचे खरे पाठीराखे होते. हॉकर्स झोन ही शहराची गरज असून राबणाऱ्या हातगाडी व स्टॉल धारकांचे योग्य पुनर्वसन व्हावे, ही त्यांची तळमळ होती. २०१७ मध्ये पिंपरी-चिंचवड शहरात स्वतः अजितदादांच्या हस्ते फेरीवाला प्रमाणपत्रांचे वाटप करण्यात आले होते, हा क्षण कष्टकऱ्यांसाठी ऐतिहासिक होता.”
महाराष्ट्र फेरीवाला क्रांती महासंघाच्या माध्यमातून वारंवार अजितदादांशी कायद्याच्या अंमलबजावणीबाबत चर्चा झाली होती. त्यांच्या जाण्याने कष्टकऱ्यांचे मोठे नुकसान झाले आहे. या दुःखद घटनेचा निषेध आणि शोक व्यक्त करण्यासाठी पिंपरी-चिंचवडमधील अ, ब, क, ड, ई, फ, ग आणि ह या आठही क्षेत्रीय कार्यालयांच्या हद्दीतील विक्रेत्यांनी आणि पदाधिकारी सभासदांनी आज दुकाने व गाड्या बंद ठेवल्या.
शहरातील मुख्य चौक, पदपथ आणि मंडई परिसरात जिथे दररोज हजारो हातगाड्यांची लगबग असायची, तिथे आज शुकशुकाट पाहायला मिळाला. हातावर पोट असणाऱ्या या वर्गाने केवळ दादांवरील प्रेमापोटी आपला एक दिवसाचा रोजगार सोडून त्यांना आदरांजली अर्पण केली. पिंपरी-चिंचवडच्या विकासात दादांनी दिलेल्या योगदानाबद्दल आणि फेरीवाल्यांच्या प्रश्नांवर दाखवलेल्या संवेदनशीलतेबद्दल सर्व कष्टकऱ्यांनी कृतज्ञता व्यक्त केली.
© २०२६ मॅक्स मंथन डेली न्यूज. सर्व हक्क राखीव.
