मालमत्ता करदात्यांसाठी आनंदाची बातमी; आता सुट्टीच्या दिवशीही कर भरता येणार, पालिकेची १८ कार्यालये राहणार सुरू
पिंपरी प्रतिनिधी शाम सोनवणे, ४ फेब्रुवारी २०२६ | मॅक्स मंथन डेली न्यूज:
पिंपरी-चिंचवड : आर्थिक वर्ष संपण्यासाठी आता अवघे दोन महिने शिल्लक राहिले आहेत. या पार्श्वभूमीवर, पिंपरी-चिंचवड महापालिकेने मालमत्ता कर वसुलीचे उद्दिष्ट पूर्ण करण्यासाठी कंबर कसली आहे. नोकरी-व्यवसायामुळे आठवड्याच्या कामाच्या दिवसांत कर भरू न शकणाऱ्या नागरिकांसाठी महापालिकेने दिलासादायक निर्णय घेतला असून, आता शनिवार, रविवार आणि सार्वजनिक सुट्टीच्या दिवशीही कर भरणा केंद्रे सुरू राहणार आहेत.
महापालिकेच्या मुख्य कार्यालयासह शहरातील सर्व १८ विभागीय कर संकलन कार्यालये ३१ मार्च २०२६ पर्यंत सुट्टीच्या दिवशीही कार्यरत राहतील. नागरिकांना सकाळी ९.४५ ते सायंकाळी ५.४५ या वेळेत प्रत्यक्ष कॅश काऊंटरवर जाऊन कराचा भरणा करता येईल. याशिवाय, ऑनलाईन पद्धतीने कर भरण्याची सुविधा २४ तास उपलब्ध आहेच.
कर संकलन विभागाच्या वतीने सध्या थकबाकीदारांविरोधात विशेष मोहीम राबवली जात आहे. जे नागरिक वारंवार सूचना देऊनही कर भरत नाहीत, त्यांच्या मालमत्ता जप्त करणे आणि नळ कनेक्शन खंडित करणे यासारख्या कडक कारवाया केल्या जात आहेत. ही कारवाई टाळण्यासाठी नागरिकांनी तातडीने कर भरून सहकार्य करावे, असे आवाहन पालिकेने केले आहे.
“शहरातील करदात्यांनी आपला मालमत्ता कर वेळेत भरून शहराच्या सर्वांगीण विकासामध्ये आपला मोलाचा हातभार लावावा. ऑनलाईन सुविधेचाही जास्तीत जास्त वापर करावा.”
— तृप्ती सांडभोर, अतिरिक्त आयुक्त, PCMC
“नागरिकांच्या सोयीसाठी आम्ही शनिवार आणि रविवारी देखील कार्यालये सुरू ठेवत आहोत. सकाळी ९.४५ ते सायंकाळी ५.४५ पर्यंत कॅश काऊंटर सुरू राहतील. या वाढीव वेळेचा नागरिकांनी लाभ घ्यावा.”
— सचिन पवार, उपायुक्त, PCMC
नागरिकांनी या सुविधेचा लाभ घेऊन संभाव्य दंडात्मक कारवाई टाळावी, असे आवाहन महापालिका प्रशासनाकडून करण्यात आले आहे.
© २०२६ मॅक्स मंथन डेली न्यूज. सर्व हक्क राखीव.
