47
पिंपरी-चिंचवडमध्ये उपमहापौर शर्मिला बाबर यांच्या हस्ते ‘शून्य कचरा पर्व’चा शानदार प्रारंभ; भोसरीच्या इंग्लिश मीडियम स्कूलला ‘आदर्श शाळा पुरस्कार’!
पिंपरी चिंचवड प्रतिनिधी बालाजी नवले, दि. १० ऑगस्ट २०२६ मॅक्स मंथन डेली न्यूज:
पिंपरी चिंचवड: स्वातंत्र्यदिनाचे औचित्य आणि पिंपरी-चिंचवड महानगरपालिकेचे प्रथम नागरिक, महापौर रवि लांडगे यांच्या वाढदिवसाच्या निमित्ताने शहरात स्वच्छता व पर्यावरणाचा संदेश देणाऱ्या ‘शून्य कचरा पर्व’ या अत्यंत अभिनव उपक्रमाची उत्साहात सुरुवात झाली आहे. आचार्य अत्रे रंगमंदिर येथे आयोजित भव्य सोहळ्यात शहराच्या उपमहापौर शर्मिला बाबर आणि माजी नगरसदस्या डॉ. श्रद्धा लांडगे यांच्या शुभहस्ते दीपप्रज्वलन करून या उपक्रमाचे अधिकृत उद्घाटन करण्यात आले.
या प्रसंगी पिंपरी-चिंचवड महापालिकेच्या इंग्लिश मीडियम स्कूल, भोसरी येथे गेल्या वर्षभरात राबवलेल्या यशस्वी उपक्रमाची दखल घेत शाळेला ‘शून्य कचरा आदर्श शाळा पुरस्कार-२०२६’ देऊन सन्मानित करण्यात आले.
शहराला स्वच्छ, सुंदर आणि शाश्वत बनवण्यासाठी उपमहापौर शर्मिला बाबर यांनी या प्रसंगी विशेष पुढाकार घेतला. कार्यक्रमात बोलताना त्यांनी या मोहिमेचे व्यापक महत्त्व अधोरेखित केले.
“शून्य कचरा ही केवळ महानगरपालिकेची एक मोहीम नसून स्वच्छ आणि निरोगी पिंपरी-चिंचवड घडवण्यासाठीची आपली सर्वांची सामूहिक जबाबदारी आहे. विद्यार्थ्यांपासून सुरू झालेली ही प्रभावी चळवळ शहरातील प्रत्येक घरापर्यंत आणि गल्लीबोळांपर्यंत पोहोचवून पिंपरी-चिंचवडमध्ये ‘शून्य कचऱ्याची संस्कृती’ रुजवण्यासाठी आम्ही कटिबद्ध आहोत.”— शर्मिला बाबर, उपमहापौर, पिंपरी-चिंचवड महानगरपालिका
उपमहापौरांच्या मार्गदर्शनानुसार हे अभियान केवळ महापालिकेच्या शाळांपुरते मर्यादित न ठेवता भविष्यात खासगी शाळा, महाविद्यालये, रुग्णालये, ज्येष्ठ नागरिक संघटना व सोसायट्यांमध्ये राबवून नागरिकांचा व्यापक सहभाग नोंदवला जाणार आहे. तसेच प्रत्येक शनिवारी शाळांमध्ये ‘शून्य कचरा अभियान’ राबवणे आणि विद्यार्थ्यांकडून स्वप्रतिज्ञा घेण्याचा महत्त्वपूर्ण निर्णय या वेळी घेण्यात आला.
पुरस्कारप्राप्त इंग्लिश मीडियम स्कूल, भोसरी येथे कचऱ्याच्या वर्गीकरणाचे अद्ययावत मॉडेल विकसित केले गेले आहे. शास्त्रीय वर्गीकरण ओला, सुका व घातक कचऱ्याचे स्वतंत्र डस्टबिनमध्ये वर्गीकरण. विद्यार्थ्यांचा सहभाग वाढवण्यासाठी प्रत्येक वर्गातून एक विद्यार्थी व एक विद्यार्थिनी यांची ‘शून्य कचरा क्लास मॉनिटर’ म्हणून नियुक्ती.दरवर्षी ‘शून्य कचरा ऑडिट’ करणे, सिंगल-यूज प्लास्टिकवर पूर्ण बंदी आणि टाकाऊ वस्तूंपासून टिकाऊ वस्तू तयार करण्यास प्रोत्साहन. ‘ही कचरा गाडी नाही, ही पुनर्वापराची गाडी आहे’ ही नवी संकल्पना विद्यार्थ्यांमध्ये रुजवली जात आहे.
या मोहिमेत अहोरात्र कष्ट उपसणारे शिक्षक, विद्यार्थी, सातत्याने योगदान देणारे महापालिका स्वच्छता कर्मचारी आणि सहकार्य करणारे पालक यांचा उपमहापौर शर्मिला बाबर यांच्या हस्ते विशेष गौरव करण्यात आला.
या प्रसंगी महिला व बालकल्याण समिती सभापती राणी पठारे, नगरसेवक विराज लांडे, आसरा सोशल फाउंडेशनच्या अर्चना मोरे, शाळेचे मुख्याध्यापक, शिक्षक, विद्यार्थी, पालक तसेच महापालिकेचे वरिष्ठ अधिकारी व कर्मचारी मोठ्या संख्येने उपस्थित होते.
© २०२६ मॅक्स मंथन डेली न्यूज. सर्व हक्क राखीव.
