पिंपरी चिंचवड: आषाढी एकादशीनिमित्त पंढरपूर येथे श्री विठ्ठल-रुक्मिणीचे दर्शन घेऊन देहूच्या दिशेने परतीच्या प्रवासाला निघालेल्या जगद्गुरु संत श्री तुकाराम महाराज पालखी सोहळ्याचे शनिवारी सायंकाळी पिंपरी-चिंचवड शहरात आगमन झाले. या पावन पालखी सोहळ्याचे पिंपरी-चिंचवड महानगरपालिकेच्या वतीने अत्यंत भक्तिमय व उत्साही वातावरणात भव्य स्वागत करण्यात आले.

पिंपरी गावातील महात्मा फुले महाविद्यालय चौकात सायंकाळच्या सुमारास जगद्गुरु संत श्री तुकाराम महाराज पालखी सोहळा पोहोचला. या प्रसंगी पिंपरी-चिंचवड शहराच्या वतीने उपमहापौर शर्मिला बाबर यांनी श्रींच्या पादुकांचे दर्शन घेऊन पालखी सोहळ्याचे अधिकृत स्वागत केले.

या स्वागत सोहळ्याप्रसंगी पिंपरी-चिंचवड शहरातील अनेक आजी-माजी लोकप्रतिनिधी व महापालिका अधिकारी उपस्थित होते. नगरसदस्य संदीप वाघेरे, नगरसदस्या प्रियांका कुदळे, नगरसदस्या निकिता कदम, माजी उपमहापौर प्रभाकर वाघेरे, माजी नगरसदस्या उषा वाघेरे, गिरिजा कुदळे, विशेष अधिकारी किरण गायकवाड, कनिष्ठ अभियंता बापूसाहेब रोकडे याशिवाय पिंपरी-चिंचवड महापालिकेचे विविध अधिकारी, कर्मचारी, वारकरी आणि परिसरातील नागरिक मोठ्या संख्येने उपस्थित होते. पालखीच्या स्वागतासाठी संपूर्ण परिसरात भक्तिमय वातावरण निर्माण झाले असून वारकऱ्यांच्या हरिनामाच्या गजाराने परिसर दुमदुमून गेला होता.