पिंपरी-चिंचवडमध्ये ‘शिवजयंती विचार प्रबोधन पर्व’ मोठ्या उत्साहात साजरे होणार; महानाट्य, स्पर्धा आणि विद्युत रोषणाईचे नियोजन

पिंपरी प्रतिनिधी शाम सोनवणे, ५ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : छत्रपती शिवाजी महाराज यांच्या जयंतीनिमित्त पिंपरी-चिंचवड महानगरपालिकेच्या वतीने आयोजित करण्यात येणारे ‘विचार प्रबोधन पर्व २०२६’ यंदा अधिक नियोजनबद्ध आणि प्रभावीपणे राबवण्यात येणार आहे. या संदर्भात शहरातील विविध शिवजयंती उत्सव समिती, सामाजिक संस्थांचे पदाधिकारी आणि महापालिका अधिकारी यांची संयुक्त आढावा बैठक महापालिकेच्या दिवंगत माजी महापौर मधुकर पवळे सभागृहात संपन्न झाली.

अतिरिक्त आयुक्त विक्रांत बगाडे यांनी यावेळी स्पष्ट केले की, शिवजयंती उत्सव अधिक व्यापक करण्यासाठी प्रशासन सकारात्मक असून, प्राप्त झालेल्या सर्व सूचनांवर संबंधित विभागांमार्फत तातडीने कार्यवाही केली जाईल. नागरिकांचा जास्तीत जास्त सहभाग वाढवण्यासाठी सर्व आवश्यक सुविधा आणि समन्वय उपलब्ध करून दिला जाईल.

• भव्य महानाट्य व स्पर्धा: शिवरायांच्या जीवनचरित्रावर आधारित भव्य महानाट्याचे आयोजन करावे. तसेच शाळांमध्ये आणि खुल्या प्रवर्गासाठी पोवाडे, निबंध व वकृत्व स्पर्धा आयोजित करण्यात याव्यात.

• भक्ती-शक्ती समूहशिल्प: भक्ती-शक्ती येथील समूहशिल्पाची डागडुजी करून परिसराची स्वच्छता करावी. शिल्पाच्या मागील बाजूस इमारती किंवा फलक दिसू नयेत यासाठी बॅकग्राउंडचे नियोजन करावे.

• विद्युत रोषणाई: भक्ती-शक्ती चौक येथील उड्डाणपुलास आठवडाभर आधीच विद्युत रोषणाई करावी आणि एलईडी स्क्रीनवर शिवचरित्र दाखवावे.

• नागरी सुविधा: महानाट्य आणि इतर कार्यक्रमांच्या ठिकाणी फिरते स्वच्छतागृह, पार्किंग आणि कडक सुरक्षा व्यवस्था असावी.

• शिवज्योतीचा सन्मान: विविध शहरांतून येणाऱ्या शिवज्योतींचे आणि शिवप्रेमींचा यथोचित सन्मान व्हावा.

या बैठकीस सह शहर अभियंता मनोज सेटिया, उप आयुक्त अण्णा बोदडे, ममता शिंदे, क्षेत्रीय अधिकारी किशोर ननावरे, प्रफुल्ल पुराणिक यांच्यासह सामाजिक कार्यकर्ते नामदेवराव जाधव, जीवन बोराडे, सागर तापकीर, प्रकाश जाधव, ॲड. लक्ष्मण रानवडे, सतीश काळे, समीर जावळकर, वसंतराव पाटील आणि अनेक शिवप्रेमी संघटनांचे प्रतिनिधी मोठ्या संख्येने उपस्थित होते.

कार्यक्रमाचे प्रास्ताविक उप आयुक्त अण्णा बोदडे यांनी केले, तर आभार प्रदर्शन जनता संपर्क अधिकारी प्रफुल्ल पुराणिक यांनी मानले. शहरातील सर्व शिवपुतळ्यांची स्वच्छता आणि सुशोभीकरण करून यंदाची शिवजयंती ऐतिहासिक करण्याचा संकल्प यावेळी सोडण्यात आला.

© २०२६ मॅक्स मंथन डेली न्यूज. सर्व हक्क राखीव.