धारणीच्या दुर्गम भागात पोहोचली न्यायदेवता! महाविधी शिबिरातून शेवटचा घटक आश्वस्त; ३६ स्टॉल्सच्या माध्यमातून शासकीय योजनांची माहिती

अमरावती/धारणी, ९ फेब्रुवारी २०२६ | मॅक्स मंथन डेली न्यूज:

अमरावती/धारणी : संविधानाला अभिप्रेत असलेल्या समाजातील शेवटच्या घटकाचा विकास करण्यासाठी आणि न्यायप्रक्रियेबाबत जनतेच्या मनात विश्वास निर्माण करण्यासाठी धारणी येथे ‘महाविधी शिबिरा’चे आयोजन करण्यात आले होते. राष्ट्रीय विधी सेवा प्राधिकरणातर्फे आयोजित या शिबिरात ३६ विविध शासकीय विभागांनी स्टॉल्स लावून नागरिकांना आपल्या हक्क आणि योजनांची माहिती दिली.

कार्यक्रमाचे उद्घाटन न्यायमूर्ती अनिल किलोर यांच्या हस्ते झाले, तर न्यायमूर्ती प्रविण पाटील यांनी प्रमुख मार्गदर्शक म्हणून उपस्थिती लावली. यावेळी बोलताना न्यायमूर्ती किलोर म्हणाले की, “न्याय लोकांपर्यंत पोहोचवण्यासाठी हे शिबिर एक महत्त्वाचे माध्यम आहे. नागरिकांना त्यांच्या अधिकारांची जाणीव करून देणे हेच या शिबिराचे ध्येय आहे.” विशेषतः मेळघाट परिसरातील जमिनीचे प्रश्न, उच्च शिक्षण आणि ‘पॉस्को’ (POCSO) कायद्याबाबत जनजागृती करण्यावर त्यांनी भर दिला.

न्यायमूर्ती प्रवीण पाटील यांनी नागरिकांना आवाहन केले की, समाजात शोषणाविरुद्ध मौन बाळगू नका. न्यायव्यवस्था आणि नागरिक यांच्या सहकार्यातूनच मजबूत लोकशाही तयार होईल. नागरिकांनी कोणताही संकोच न बाळगता न्यायासाठी पुढे यावे, असे मत त्यांनी व्यक्त केले.

• वनपट्टे वाटप: जिल्हाधिकारी आशिष येरेकर यांनी माहिती दिली की, धारणीत दुसऱ्यांदा हा कार्यक्रम होत असून ११०० नागरिकांना वनपट्ट्यांचे वाटप करण्यात आले आहे.

• न्यायालयासाठी जागा: धारणी उपविभागीय कार्यालयातील जागा न्यायालयाच्या कामकाजासाठी देण्यात येणार असून लवकरच तिथे कामकाज सुरू होईल.

• योजनांचा लाभ: तहसील कार्यालय, कृषी विभाग, बँका, पंचायत समिती आणि पोलीस प्रशासनाच्या वतीने विविध लाभांचे साहित्य नागरिकांना वाटप करण्यात आले.

साद्राबाडी प्राथमिक आरोग्य केंद्राच्या कर्मचाऱ्यांनी बालविवाह आणि अंधश्रद्धा निर्मूलनावर प्रभावी पथनाट्य सादर केले. चिखलदरा अंध विद्यालयाच्या विद्यार्थ्यांनी स्वागतगीत गायले. पर्यावरणाचा संदेश देण्यासाठी रोपट्यांना पाणी देऊन कार्यक्रमाची सुरुवात करण्यात आली.

यावेळी प्रमुख जिल्हा व सत्र न्यायाधीश सुधाकर यार्लगड्डा, अपर पोलीस अधीक्षक पंकज कुमावत, उपमुख्य कार्यकारी अधिकारी बाळासाहेब रायबोले, नगराध्यक्ष सुनील चौथमल यांच्यासह अनेक मान्यवर उपस्थित होते.

© २०२६ मॅक्स मंथन डेली न्यूज. सर्व हक्क राखीव.