सांगवीत घुमली ‘शिवगर्जना’! शिवरायांच्या प्रखर लढ्यामुळेच वाचले देवळांचे कळस आणि दारातील तुळस; सांगवी विकास मंचचा भव्य सोहळा संपन्न
पिंपरी प्रतिनिधी आकाश कांबळे, २० फेब्रुवारी २०२६ | मॅक्स मंथन डेली न्यूज:
पिंपरी : “छत्रपती शिवाजी महाराजांनी मोगलांच्या जोखडातून केवळ स्वराज्य मिळवले नाही, तर प्रजेला सुखी करणारे रामराज्य निर्माण केले. त्यांच्याच प्रखर संघर्षामुळे आज हिंदूंच्या देवळांचे कळस आणि दारातील तुळस सुरक्षित आहे,” असे भावपूर्ण उद्गार ज्येष्ठ प्रवचनकार ह.भ.प. बब्रुवाहन वाघ महाराज यांनी काढले. सांगवी येथील सामाजिक संस्था सांगवी विकास मंच आणि ज्येष्ठ समाजसेवक श्री. महेशशेठ भागवत यांच्या वतीने आयोजित ‘शिवजयंती उत्सव’ सोहळ्यात ते बोलत होते.
सांगवीमध्ये दि. १९ फेब्रुवारी २०२६ रोजी हा सोहळा अत्यंत भव्य प्रमाणात आणि उत्साहात पार पडला. यावेळी ह.भ.प. वाघ महाराज आणि ज्येष्ठ सामाजिक कार्यकर्ते श्री. नारायण भागवत यांनी आपल्या व्याख्यानातून शिवरायांच्या जीवनातील विविध पैलूंवर प्रकाश टाकला. महाराजांच्या राज्य व्यवस्थापन पद्धतीचे महत्त्व सांगतानाच, त्यांनी आजच्या पिढीने महाराजांचे विचार आचरणात आणणे काळाची गरज असल्याचे अधोरेखित केले.
कार्यक्रमाच्या प्रारंभी सर्व पदाधिकाऱ्यांच्या हस्ते छत्रपती शिवाजी महाराज यांच्या पुतळ्याचे यथासांग पूजन करण्यात आले. त्यानंतर महाराजांची आरती करण्यात आली आणि पारंपारिक पाळणा म्हणण्यात आला. यावेळी उपस्थितांनी दिलेल्या ‘जय भवानी, जय शिवाजी’च्या घोषणांनी परिसर दुमदुमून गेला.
याप्रसंगी पिंपरी चिंचवड सोनार समाज सेवा संघाचे अध्यक्ष मच्छिंद्र कोल्लम यांनीही महाराजांच्या कार्याचा गौरव केला. कार्यक्रमाचे प्रास्ताविक सोनार समाज सेवा संघाचे अध्यक्ष श्री. दिलीप फाकटकर यांनी केले.
या ऐतिहासिक सोहळ्यासाठी आयोजक श्री. महेशशेठ भागवत, प्रसिद्ध साहित्यिक श्री. मुरलीधरपंत दळवी, श्री. आण्णासाहेब कुंभार, श्री. बाळकृष्ण गिरगुणे, श्री. राहुल पोंगडे, श्री. राजेंद्र लक्ष्मण कोल्लम, श्री. ओंकार महेश भागवत, श्री. किरण वसंत चाकणकर यांसह अनेक क्षेत्रातील मान्यवर आणि शिवप्रेमी नागरिक मोठ्या संख्येने उपस्थित होते.
कार्यक्रमाच्या शेवटी श्री. मुरलीधर दळवी यांनी उपस्थितांचे आभार मानले. सांगवी विकास मंचच्या या उपक्रमामुळे परिसरात चैतन्याचे वातावरण निर्माण झाले असून, शिव विचारांचा जागर घराघरांत पोहोचला आहे.
© २०२६ मॅक्स मंथन डेली न्यूज. सर्व हक्क राखीव.
