मुलींच्या आरोग्य संरक्षणासाठी पीसीएमसीचा मोठा पुढाकार! १४ वर्षांच्या मुलींना आता ‘एचपीव्ही’ लस मिळणार मोफत; मनपा रुग्णालयांमध्ये मोहीम सुरू

पिंपरी चिंचवड प्रतिनिधी बालाजी नवले, १० मार्च २०२६ | मॅक्स मंथन डेली न्यूज:

पिंपरी : महिलांमधील गर्भाशय मुखाच्या कर्करोगाचा (Cervical Cancer) प्रतिबंध करण्यासाठी पिंपरी-चिंचवड महानगरपालिकेने एक महत्त्वपूर्ण पाऊल उचलले आहे. केंद्र सरकारच्या देशव्यापी कार्यक्रमांतर्गत, जागतिक महिला दिनाचे औचित्य साधून शहरातील १४ वर्षे वयोगटातील मुलींसाठी ‘मोफत एचपीव्ही (HPV) लसीकरण’ मोहीम सुरू करण्यात आली आहे.

नवीन सांगवी रुग्णालयात या मोहिमेचा औपचारिक शुभारंभ करण्यात आला असून, पहिल्याच दिवशी २४ लाभार्थ्यांनी या लसीकरणाचा लाभ घेतला आहे.

भारत सरकारच्या मार्गदर्शक तत्त्वांनुसार, सध्या ही लस विशिष्ट वयोगटासाठी मर्यादित आहे:

• पात्र मुली: ज्यांनी १४ वा वाढदिवस साजरा केला आहे, मात्र ज्या अद्याप १५ वर्षांच्या झालेल्या नाहीत.

• कालावधी: ही विशेष मोहीम पुढील ३ महिने पालिकेच्या सर्व प्रमुख रुग्णालयांमध्ये सुरू राहणार आहे.

महानगरपालिकेच्या खालील रुग्णालयांमध्ये सकाळी ९.३० ते दुपारी २ या वेळेत मोफत लसीकरण सत्रे पार पडतील:

१. यशवंतराव चव्हाण स्मृती रुग्णालय (YCM), पिंपरी

२. तालेरा रुग्णालय, चिंचवड

३. नवीन भोसरी रुग्णालय, भोसरी

४. सांगवी रुग्णालय (इंदिरा गांधी प्रसूती गृह)

५. नवीन थेरगाव रुग्णालय

६. जिजामाता रुग्णालय, पिंपरी

७. आकुर्डी रुग्णालय (प्रभाकर कुटे स्मृती रुग्णालय)

८. यमुनानगर रुग्णालय

• आवश्यक कागदपत्रे: लस घेण्यासाठी येताना मुलीचे आधार कार्ड किंवा शाळेचे ओळखपत्र (I-Card) सोबत आणणे अनिवार्य आहे.

• पूर्वकाळजी: मुलींनी भरपेट नाश्ता करूनच लसीकरणासाठी यावे, असे आवाहन वैद्यकीय विभागाने केले आहे.

“महिलांच्या आरोग्याचे संरक्षण ही आमची जबाबदारी आहे. गर्भाशय मुखाचा कर्करोग टाळण्यासाठी ही लस अत्यंत प्रभावी आहे. पालकांनी पुढाकार घेऊन आपल्या मुलींचे लसीकरण करून घ्यावे.”

— रवि लांडगे, महापौर, पिंपरी-चिंचवड.

“योग्य वयात दिलेली ही लस मुलींना दीर्घकालीन संरक्षण देते. पालकांनी १४ वर्षांच्या मुलींचे लसीकरण वेळेत करून घेणे आवश्यक आहे.”

— डॉ. लक्ष्मण गोफणे, आरोग्य वैद्यकीय अधिकारी.

ज्या मुलींचे वय १४ वर्षांच्या बाहेरील आहे, ज्यांनी यापूर्वी ही लस घेतली आहे किंवा ज्यांना तीव्र ॲलर्जीचा इतिहास आहे, अशा मुलींना ही लस दिली जाणार नाही.

© २०२६ मॅक्स मंथन डेली न्यूज. सर्व हक्क राखीव।