भटक्या श्वानांच्या प्रश्नावर पीसीएमसीचा ‘अॅक्शन प्लॅन’! प्रभागनिहाय श्वान संगोपन केंद्र उभारणार; महापौर रवि लांडगे यांचे कडक निर्देश
पिंपरी चिंचवड प्रतिनिधी: बालाजी नवले, ११ मार्च २०२६ | मॅक्स मंथन डेली न्यूज:
पिंपरी : पिंपरी-चिंचवड शहरातील भटक्या श्वानांची वाढती संख्या आणि त्यांच्या आरोग्याशी संबंधित तक्रारी लक्षात घेता, महापालिकेने आता ठोस पावले उचलण्यास सुरुवात केली आहे. “शहरात श्वान संगोपन केंद्रासाठी (Dog Shelter Homes) प्रभागनिहाय जागा शोधून तातडीने प्रस्ताव सादर करा,” असे महत्त्वपूर्ण निर्देश महापौर रवि लांडगे यांनी पशुवैद्यकीय विभागाला दिले आहेत.
पिंपरी येथील मुख्य प्रशासकीय भवनातील मधुकरराव पवळे सभागृहात आयोजित पशुवैद्यकीय विभागाच्या आढावा बैठकीत ते बोलत होते.
-
प्रभागनिहाय संगोपन केंद्र: केवळ एकाच ठिकाणी केंद्र न उभारता, शहराच्या प्रत्येक प्रभागात श्वानांचे संगोपन, लसीकरण आणि उपचार व्हावेत यासाठी जागा निश्चित करण्याच्या सूचना देण्यात आल्या आहेत. यासाठी स्थानिक नगरसदस्यांची मदत घेतली जाणार आहे.
-
सविस्तर सर्वेक्षण: शहरातील भटक्या आणि पाळीव श्वानांची अचूक संख्या किती आहे? त्यांचे वितरण कोणत्या भागात जास्त आहे? नसबंदी आणि लसीकरणाची सध्याची स्थिती काय? याचा सविस्तर अहवाल तयार करण्याचे आदेश महापौरांनी दिले आहेत.
-
तक्रार निवारण: नागरिकांकडून येणाऱ्या श्वानांबाबतच्या तक्रारींचे निवारण करण्यासाठी पशुवैद्यकीय विभागाने समन्वयाने आणि तत्परतेने काम करावे, असेही त्यांनी बजावले.
उपायुक्त संदीप खोत यांनी विभागाच्या सद्यस्थितीची माहिती देताना सांगितले की, शहरात सध्या प्राणी जन्मनियंत्रण (ABC) मोहिमेसाठी ४ विशेष वाहने कार्यरत आहेत. या वाहनांद्वारे:
१. भटक्या श्वानांना पकडून त्यांची नसबंदी करणे.
२. जखमी किंवा आजारी प्राण्यांवर जागेवरच किंवा केंद्रात उपचार करणे.
३. नसबंदीनंतर श्वानांना सुरक्षितपणे त्यांच्या मूळ परिसरात पुन्हा सोडणे.
या कामासाठी नियुक्त कर्मचाऱ्यांना प्राण्यांशी संवेदनशीलतेने वागण्याचे तांत्रिक प्रशिक्षण देण्यात आले आहे, जेणेकरून कोणत्याही प्राण्याला इजा होणार नाही.
या बैठकीस उपमहापौर शर्मिला बाबर, अतिरिक्त आयुक्त विक्रांत बगाडे, नगरसदस्या वैशाली काळभोर, वैशाली घोडेकर, अर्चना सस्ते, नगरसदस्य अनंत कोऱ्हाळे, मंदार देशपांडे, उत्तम केंदळे, संजय काटे, डॉ. सुहास कांबळे, उपायुक्त संदीप खोत, अण्णा बोदडे आणि पशुवैद्यकीय अधिकारी अरुण दगडे उपस्थित होते.
© २०२६ मॅक्स मंथन डेली न्यूज. सर्व हक्क राखीव।
