मूर्तिजापूर हादरले! लाखपुरीत रेती माफिंयाचा धुमाकूळ तर शेरवाडीत २४ लाखांच्या निधीत ‘झोल’; प्रशासकीय यंत्रणा ढिम्म?

अकोला /मुर्तिजापुर प्रतिनिधी विलास सावळे, १३ मार्च २०२६ | मॅक्स मंथन डेली न्यूज:

मूर्तिजापूर (अकोला) : मूर्तिजापूर तालुक्यात सध्या अवैध धंदे आणि भ्रष्टाचाराने कळस गाठला आहे. एकीकडे लाखपुरी येथील पूर्णा नदीच्या पात्रातून जेसीबीच्या सहाय्याने अवैध रेती उपसा सुरू असताना महसूल विभाग मूकदर्शक बनला आहे, तर दुसरीकडे शेरवाडी (शेलूवेताळ) ग्रामपंचायतीमध्ये दलित वस्तीच्या निधीत लाखो रुपयांचा अपहार झाल्याचा गंभीर आरोप समोर आला आहे.

लाखपुरी येथील पूर्णा नदी घाटावर अवैध रेती उत्खननाने धुमाकूळ घातला आहे. विशेष म्हणजे नदीच्या पात्रात पाणी असतानाही चक्क जेसीबी यंत्राचा वापर करून रेतीचा उपसा केला जात आहे. दिवसाढवळ्या सुरू असलेल्या या प्रकारामुळे पर्यावरणाचे मोठे नुकसान होत आहे. मात्र, याकडे महसूल विभागाने जाणीवपूर्वक डोळेझाक केल्याने ‘अर्थपूर्ण’ संबंधांची चर्चा तालुक्यात रंगली आहे.

तालुक्यातील गट ग्रामपंचायत शेरवाडी (शेलूवेताळ) येथे अनुसूचित जाती व नवबौद्ध वस्ती विकास योजनेअंतर्गत मंजूर झालेल्या २४ लाख रुपयांच्या निधीत मोठा भ्रष्टाचार झाल्याचा संशय व्यक्त केला जात आहे.

• कामाचा निकृष्ट दर्जा: आंबेडकर नगर (१२ लाख) आणि फुले नगर (१२ लाख) येथे मंजूर झालेली सिमेंट रस्ता व नालीची कामे अत्यंत निकृष्ट दर्जाची आणि अपूर्ण आहेत.

• निधीचा गैरवापर: फुले नगरसाठी मागासवर्गीय वस्तीत मंजूर असलेले काम चक्क ‘सुवर्ण वस्ती’मध्ये (दुसऱ्याच ठिकाणी) करून निधी वळवण्यात आल्याचा आरोप स्थानिक नागरिक जितेंद्र अनभोरे यांनी केला आहे.

• सरपंच-सचिवांचे संगनमत: या प्रकरणात सरपंच आणि सचिवांनी संगनमत करून शासनाची दिशाभूल केल्याची चर्चा गावात सुरू आहे.

या प्रकरणाची तक्रार झाल्यानंतर पंचायत समितीने १२ मार्च रोजी सकाळी १०:३० वाजता चौकशीसाठी पथक पाठवण्याचे आदेश दिले होते. मात्र, दोन दिवस उलटूनही अधिकाऱ्यांना घटनास्थळी यायला वेळ मिळालेला नाही. “प्रशासन जाणीवपूर्वक वेळकाढूपणा करून पुराव्यांशी छेडछाड करण्याची संधी देत आहे का?” असा संतप्त सवाल तक्रारदार जितेंद्र अनभोरे यांनी उपस्थित केला आहे.

अनुसूचित जातीच्या विकासासाठी असलेला निधी वळवणे हा कायद्याने गंभीर गुन्हा आहे. आता या प्रकरणाची सखोल चौकशी होऊन दोषींवर गुन्हे दाखल होणार की प्रशासन रेती माफिंयांप्रमाणे इथेही मूकदर्शक राहणार, याकडे सर्वांचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव।