पिंपरी-चिंचवडमध्ये आता ‘गड-किल्ल्यांच्या’ नावाने ओळखली जाणार क्षेत्रीय कार्यालये! ८ ऐवजी १० कार्यालयांचा विस्तार; महासभेत ऐतिहासिक उपसूचना मंजूर

पिंपरी प्रतिनिधी आकाश कांबळे , १५ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड शहराच्या वाढत्या लोकसंख्येचा आणि विस्तारलेल्या क्षेत्रफळाचा विचार करून, नागरिकांच्या सोयीसाठी महानगरपालिकेच्या क्षेत्रीय कार्यालयांची संख्या ८ वरून १० करण्याचा महत्त्वपूर्ण निर्णय १३ मार्च २०२६ रोजीच्या महासभेत घेण्यात आला. विशेष म्हणजे, या सर्व क्षेत्रीय कार्यालयांना आता छत्रपती शिवाजी महाराजांच्या देदीप्यमान गड-किल्ल्यांची नावे दिली जाणार आहेत.

महासभेत सत्ताधारी पक्षनेते प्रशांत शितोळे आणि ज्येष्ठ नगरसेवक शत्रुघ्न (बापू) काटे यांनी ही महत्त्वपूर्ण उपसूचना मांडली. “सध्या अनेक नागरिकांना आपल्या कामासाठी ७ ते ८ किलोमीटरचा पल्ला कापून क्षेत्रीय कार्यालयात यावे लागते. प्रशासकीय कामकाजाला गती मिळावी आणि नागरिकांची ही हेळसांड थांबावी, यासाठी कार्यालयांचा विस्तार होणे काळाची गरज आहे,” असे प्रतिपादन बापू काटे यांनी यावेळी केले.

या उपसूचनेला विरोधी पक्षनेते भाऊसाहेब भोईर आणि माजी महापौर योगेश बहल यांनी कडाडून विरोध दर्शवला. मात्र, नागरिकांच्या हिताचा आणि वाढत्या नागरीकरणाचा विचार करून महापौर रवी लांडगे यांनी ही उपसूचना मंजूर केली. यामुळे आता लवकरच पिंपरी-चिंचवडमधील प्रशासकीय कारभार शिवरायांच्या किल्ल्यांच्या नावाने ओळखला जाईल.

खालील तक्त्यानुसार क्षेत्रीय कार्यालयांचे नामकरण आणि त्यांच्या अंतर्गत येणारे प्रभाग निश्चित करण्यात आले आहेत:

या निर्णयामुळे क्षेत्रीय कार्यालयांचे विभाजन होऊन कामाचा ताण विभागला जाईल. नवीन प्रभाग रचनेनुसार नागरिकांना जवळच्या कार्यालयात जाणे सोपे होईल, ज्यामुळे त्यांचा वेळ आणि प्रवास वाचणार आहे. छत्रपती शिवरायांच्या किल्ल्यांची नावे दिल्यामुळे शहराच्या अस्मितेत भर पडल्याची भावना शिवप्रेमींनी व्यक्त केली आहे.

© २०२६ मॅक्स मंथन डेली न्यूज. सर्व हक्क राखीव।