डिजिटल युगात ‘सायबर सावधगिरी’ हीच सुरक्षा! वाकडच्या आयबीएमआरमध्ये सायबर सुरक्षा कार्यशाळा संपन्न; तज्ज्ञांनी दिले सुरक्षेचे धडे

पिंपरी प्रतिनिधी आकाश कांबळे, १५ मार्च २०२६ | मॅक्स मंथन डेली न्यूज:

पिंपरी-चिंचवड (वाकड) : डिजिटल साधनांचा वाढता वापर पाहता, प्रत्येकाने सायबर सुरक्षेबाबत अत्यंत दक्ष राहणे काळाची गरज आहे, असे प्रतिपादन सायबर तज्ज्ञ डॉ. रोहन न्यायाधीश यांनी केले. सावित्रीबाई फुले पुणे विद्यापीठ आणि वाकड येथील आयबीएमआर (IBMR) कॉलेज यांच्या संयुक्त विद्यमाने आयोजित सायबर सुरक्षा कार्यशाळेत ते प्रमुख मार्गदर्शक म्हणून बोलत होते.

डॉ. न्यायाधीश यांनी विद्यार्थ्यांशी संवाद साधताना सांगितले की, सोशल मीडियाचा वापर करताना कोणतीही वैयक्तिक माहिती अनोळखी व्यक्तींना देऊ नका. मोबाईलमधील अनावश्यक अ‍ॅप्स काढून टाका आणि कोणत्याही प्रलोभनाला बळी पडू नका. “जर सायबर फसवणूक झालीच, तर घाबरून न जाता तात्काळ पोलिसांशी संपर्क साधा,” असा मोलाचा सल्लाही त्यांनी दिला.

• डॉ. शिवाजी मुंढे (संचालक, IIMS): देशात सायबर गुन्ह्यांमुळे होणारी करोडो रुपयांची फसवणूक चिंतेची बाब असल्याचे त्यांनी नमूद केले.

• पिंपरी-चिंचवड सायबर सेल: सायबर गुन्हे शाखेच्या अधिकाऱ्यांनी प्रत्यक्ष घडलेल्या गुन्ह्यांची उदाहरणे देऊन त्यापासून बचाव करण्यासाठी कशा प्रकारे उपाययोजना कराव्यात, याचे सविस्तर मार्गदर्शन केले.

• अमित कांबळे (सायबर तज्ज्ञ): एखाद्या साध्या ‘क्यूआर कोड’द्वारे (QR Code) तुमचा मोबाईल कसा हॅक होऊ शकतो, याचे थरारक प्रात्यक्षिक त्यांनी यावेळी दाखवले.

• राजेश नागरे (संचालक, यशस्वी अकॅडमी): बँक खात्याची माहिती सुरक्षित ठेवण्यासाठीच्या टिप्स त्यांनी विद्यार्थ्यांना दिल्या.

आयबीएमआरच्या शैक्षणिक संकुलात पार पडलेल्या या कार्यशाळेला पुणे विद्यापीठाशी संलग्न विविध व्यवस्थापन संस्थांचे विद्यार्थी आणि प्राध्यापक मोठ्या संख्येने उपस्थित होते. कार्यक्रमाचे सूत्रसंचालन आरुषी पाटील व सानिका गायकवाड यांनी केले, तर प्रास्ताविक आयबीएमआरच्या संचालकांनी केले. शेवटी प्रा. डॉ. संपदा गुपचूप यांनी उपस्थितांचे आभार मानले.

© २०२६ मॅक्स मंथन डेली न्यूज. सर्व हक्क राखीव।