“मला साहेब नको, ‘तहसीलदार’ म्हणा!” धारणी तहसीलदारांचा विद्यार्थ्यांशी थेट संवाद; क्षेत्रभेटीत विद्यार्थ्यांनी अनुभवले प्रशासनाचे कामकाज

धारणी (अमरावती), १५ मार्च २०२६ | मॅक्स मंथन डेली न्यूज:

धारणी (अमरावती) : “मोठ्या पदावर असलो तरी आपण सामान्य माणसाचे सेवक आहोत,” याची प्रचिती धारणीचे तहसीलदार प्रदीप शेवाळे यांनी शालेय विद्यार्थ्यांना दिली. “मला साहेब म्हणू नका, फक्त तहसीलदार म्हणा,” अशा साध्या पण प्रभावी शब्दांत त्यांनी विद्यार्थ्यांशी संवाद साधला, तेव्हा उपस्थित सर्वच थक्क झाले.

धारणी येथील पीएम श्री सेमी इंग्रजी जिल्हा परिषद पूर्व माध्यमिक मुलांची शाळा यांच्या वतीने आयोजित सहशालेय उपक्रमांतर्गत क्षेत्रभेटीदरम्यान हा अनोखा प्रसंग पाहायला मिळाला.

या क्षेत्रभेटीत विद्यार्थ्यांनी तहसील कार्यालय, तालुका कृषी अधिकारी कार्यालय आणि पोलीस ठाणे या ठिकाणांना प्रत्यक्ष भेट दिली. तहसील कार्यालयात तहसीलदार प्रदीप शेवाळे आणि नायब तहसीलदार राजेश माळी यांनी विद्यार्थ्यांचे स्वागत केले. विद्यार्थ्यांशी संवाद साधताना तहसीलदार शेवाळे यांच्यातील ‘विद्यार्थी’ पुन्हा जिवंत झाल्याचे दिसले.

संवादादरम्यान एका चिमुकल्या विद्यार्थ्याने थेट “तुमचे वेतन (पगार) किती आहे?” असा निरागस सवाल विचारला, तेव्हा तहसीलदारांनी हसतमुखाने त्याचे उत्तर दिले आणि विद्यार्थ्यांमध्ये मिसळून कार्यालयातील प्रत्येक विभागाची माहिती दिली.

तालुका कृषी अधिकारी उमेश यादव यांनीही विद्यार्थ्यांशी सविस्तर चर्चा केली. “भारत हा कृषिप्रधान देश आहे. जर कृषी विभाग आणि शेती नसेल, तर मानवाचे जगणे अशक्य होईल,” अशा शब्दात त्यांनी कृषी क्षेत्राचे महत्त्व पटवून दिले. विविध फळझाडे, पिके आणि आधुनिक शेती तंत्रज्ञानाची माहिती देऊन त्यांनी विद्यार्थ्यांची जिज्ञासा शमवली.

विद्यार्थ्यांनी पोलीस ठाण्याला भेट दिली असता, त्यांची उत्सुकता शिगेला पोहोचली होती. “लोकांना जेलमध्ये कसे बंद करतात, ते ठिकाण आम्हाला दाखवा,” असा आगळावेगळा प्रश्न विद्यार्थ्यांनी विचारला. पोलिसांनीही विद्यार्थ्यांना पोलीस दलाचे कार्य आणि कायद्याचे महत्त्व सोप्या भाषेत समजावून सांगितले.

या क्षेत्रभेटीमुळे पुस्तकी ज्ञानापलीकडे जाऊन प्रत्यक्ष सरकारी कामकाजाचा अनुभव विद्यार्थ्यांना घेता आला. या उपक्रमाच्या यशस्वितेसाठी मुख्याध्यापक प्रभुदास बिसंदरे, सहाय्यक शिक्षिका नूतन गैलवार, सीमा भुजाडे, बंशीलाल कासदेकर आणि ऋतिका यांनी विशेष परिश्रम घेतले. प्रशासकीय अधिकारी आणि विद्यार्थी यांच्यातील हा थेट संवाद धारणी तालुक्यात चर्चेचा विषय ठरला आहे.

© २०२६ मॅक्स मंथन डेली न्यूज. सर्व हक्क राखीव।