महिलांच्या सक्षमीकरणाला गती! चिंचवडमध्ये ‘यशस्वी’ आणि कौशल्य विकास केंद्राचा संयुक्त रोजगार मेळावा; नामांकित कंपन्यांमध्ये नोकरीची संधी

पिंपरी प्रतिनिधी आकाश कांबळे, १८ मार्च २०२६ | मॅक्स मंथन जॉब अपडेट्स:

चिंचवड : पुणे जिल्ह्यातील सुशिक्षित बेरोजगार मुली आणि महिलांना स्वावलंबी बनवण्यासाठी चिंचवड येथे एका विशेष रोजगार मेळाव्याचे आयोजन करण्यात आले होते. ‘जागतिक महिला दिना’चे औचित्य साधून जिल्हा कौशल्य विकास रोजगार व उद्योजकता मार्गदर्शन केंद्र, पुणे आणि यशस्वी अकॅडमी फॉर स्किल्स यांच्या संयुक्त विद्यमाने बुधवारी (१८ मार्च) ‘पंडित दीनदयाळ उपाध्याय रोजगार मेळावा’ यशस्वीरीत्या संपन्न झाला.

चिंचवड येथील ‘यशस्वी भवन’ येथे झालेल्या या मेळाव्यात जिल्ह्यातील विविध भागांतून आलेल्या महिला उमेदवारांनी मोठ्या उत्साहात सहभाग नोंदवला.

या मेळाव्याचे वैशिष्ट्य म्हणजे चाकण, भोसरी, तळेगाव, पिंपरी-चिंचवड, हिंजवडी आणि हडपसर यांसारख्या प्रमुख एमआयडीसी (MID

C) परिसरातील नामांकित कंपन्यांनी सहभाग घेतला होता.

• उपलब्ध पदे: ट्रेनी ऑपरेटर, क्षेत्र अधिकारी आणि इतर तांत्रिक पदे.

• पात्रता: १० वी, १२ वी उत्तीर्ण, आयटीआय (ITI), डिप्लोमा आणि पदवीधर महिलांसाठी रोजगाराच्या संधी उपलब्ध होत्या.

• सहभाग: एकूण ५३ महिला उमेदवारांनी ४१० रिक्त पदांसाठी प्राथमिक मुलाखती दिल्या.

कार्यक्रमाच्या अध्यक्षस्थानी असलेल्या ‘आयआयएमएस’ (IIMS) चे संचालक डॉ. शिवाजी मुंढे यांनी महिलांना उद्योगात उपलब्ध असलेल्या संधींचा लाभ घेऊन करिअरमध्ये पुढाकार घेण्याचे आवाहन केले.

कौशल्य विकास विभागाचे अधिकारी सुनील नाळे यांनी यावेळी शासनाच्या विविध योजनांची माहिती दिली. “महिलांनी नोकरीच्या संधींसाठी www.rojgar.mahaswayam.gov.in या संकेतस्थळावर किंवा ०२०-२६१३३६०६ या क्रमांकावर मोफत नाव नोंदणी करावी. या पोर्टलवर १८,००० हून अधिक नामांकित कंपन्यांच्या रोजगाराच्या संधी उपलब्ध आहेत,” असे त्यांनी नमूद केले.

याप्रसंगी पुणे जिल्हा कौशल्य विकास विभागाचे मार्गदर्शन अधिकारी सचिन ढेरे, सुनील नाळे, यशस्वी संस्थेचे मनुष्यबळ व्यवस्थापक श्रीकांत मिरजकर, ऑपरेशन विभाग प्रमुख नितीन थेटे आणि विविध कंपन्यांचे एचआर (HR) प्रतिनिधी उपस्थित होते. कार्यक्रमाचे आभार प्रदर्शन अश्विनी ताकटे यांनी केले.

© २०२६ मॅक्स मंथन डेली न्यूज. सर्व हक्क राखीव।