रिक्षा चोरून जबरी चोऱ्या करणाऱ्या भामट्याला १२ तासांत बेड्या! पिंपरी-चिंचवड गुन्हे शाखा युनिट-३ ची धडाकेबाज कामगिरी; ३ गुन्हे उघड

पिंपरी-चिंचवड प्रतिनिधी: बालाजी नवले, २६ मार्च २०२६ | मॅक्स मंथन क्राईम डायरी:

पिंपरी-चिंचवड : रिक्षा चोरी करून त्याद्वारे शहरात जबरी चोऱ्या करणाऱ्या एका सराईत गुन्हेगाराला पिंपरी-चिंचवड गुन्हे शाखा युनिट-३ ने अवघ्या १२ तासांच्या आत अटक केली आहे. आरोपीकडून चोरीची रिक्षा आणि मोबाईलसह एकूण १,०७,०५० रुपयांचा मुद्देमाल जप्त करण्यात आला असून, या कारवाईमुळे भोसरी एमआयडीसी, दिघी आणि पुणे शहरातील सहकार नगर पोलीस ठाण्यांतील एकूण ३ गुन्हे उघडकीस आले आहेत.

हारीश विनोद कदम (वय २० वर्षे, रा. लोअर इंदिरा गांधीनगर, बिबवेवाडी, पुणे) असे अटक करण्यात आलेल्या आरोपीचे नाव आहे.

भोसरी एमआयडीसी पोलीस ठाण्यात दाखल असलेल्या जबरी चोरीच्या गुन्ह्याचा समांतर तपास गुन्हे शाखा युनिट-३ चे पथक करीत होते. वरिष्ठ पोलीस निरीक्षक संतोष कसबे यांच्या मार्गदर्शनाखाली तांत्रिक विश्लेषण आणि गुप्त बातमीदारांमार्फत मिळालेल्या माहितीनुसार, आरोपी भोसरी येथील ‘स्टार स्टुडिओ’ समोर उभा असल्याची माहिती मिळाली. पोलिसांनी सापळा रचून त्यास ताब्यात घेतले असता, त्याच्याकडे चोरीचा मोबाईल आणि रोख रक्कम मिळून आली.

तपासादरम्यान आरोपीने धक्कादायक कबुली दिली आहे:

१. सहकार नगर (पुणे): आरोपीने सुरुवातीला सहकार नगर परिसरातून एक रिक्षा (क्र. MH 12 SK 4967) चोरली.

२. दिघी (पिंपरी-चिंचवड): चोरीची रिक्षा घेऊन येत असताना आळंदी रोडवर एका मारुती स्विफ्ट कारच्या समोर रिक्षा आडवी लावून, चालकाच्या मांडीवरील १० हजार रुपये किमतीचा मोबाईल हिसकावून तो पसार झाला होता.

३. भोसरी एमआयडीसी: येथेही त्याने अशाच प्रकारे मारहाण करून पैसे आणि मोबाईल लुटल्याचे निष्पन्न झाले आहे.

जप्त केलेला मुद्देमाल

• चोरीची रिक्षा (किंमत १,००,०००/- रु.)

• सॅमसंग कंपनीचा मोबाईल (किंमत १०,०००/- रु.)

• रोख रक्कम (२,०५०/- रु.)

  एकूण मुद्देमाल: १,०७,०५०/- रुपये.

ही यशस्वी कामगिरी पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उप-आयुक्त (गुन्हे) डॉ. शिवाजी पवार, आणि सहायक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली.

तपास पथकात वरिष्ठ पोलीस निरीक्षक संतोष कसबे, पोलीस उपनिरीक्षक सुनील जावळे, पोलीस अंमलदार बाबासाहेब गर्जे, सोमनाथ बोऱ्हाडे, सचिन गोनटे, स्वप्निल महाले, सुंदर थोरात, तुषार वराडे, राजकुमार इघारे, निखिल फापाळे आणि तांत्रिक विश्लेषण शाखेचे सपोनि माळी यांचा समावेश होता.

© २०२६ मॅक्स मंथन डेली न्यूज. सर्व हक्क राखीव।