पिंपरी-चिंचवडच्या विकासाला नवी दिशा! महापालिकेचा २०२६-२७ चा सुधारित अर्थसंकल्प मंजूर; ‘अजित सृष्टी’ आणि ‘कलाकार कट्टा’ ठरणार शहराचे आकर्षण

पिंपरी प्रतिनिधी आकाश कांबळे,२६ मार्च २०२६ | मॅक्स मंथन विशेष:

पिंपरी : “पिंपरी-चिंचवड शहराच्या सर्वांगीण आणि शाश्वत विकासाचा विचार करून सादर करण्यात आलेला हा अर्थसंकल्प दूरदृष्टीपूर्ण असून नागरिकांच्या अपेक्षा पूर्ण करणारा आहे,” असा विश्वास महापौर रवि लांडगे यांनी व्यक्त केला. पिंपरी येथील मुख्य प्रशासकीय इमारतीतील यशवंतराव चव्हाण सभागृहात पार पडलेल्या विशेष सभेत महानगरपालिकेचा ‘सुधारित अर्थसंकल्प २०२६-२७’ उपसूचनांसह मंजूर करण्यात आला.

स्थायी समिती सभापती अभिषेक बारणे यांनी हा अर्थसंकल्प सादर केला, ज्यावर सविस्तर चर्चा होऊन त्यास मंजुरी देण्यात आली.

शहराच्या गरजा ओळखून महापौरांनी या अर्थसंकल्पातील प्रमुख प्रकल्पांची माहिती दिली:

• पाणीपुरवठा: शहराचा सर्वात गंभीर प्रश्न असलेल्या पाणीपुरवठ्यासाठी सर्वाधिक निधीची तरतूद.

• अजित सृष्टी: दिवंगत नेते अजित पवार यांच्या स्मरणार्थ ५ कोटी रुपयांच्या निधीतून ‘अजित सृष्टी’ उभारणार.

• कलाकार कट्टा: पुण्याच्या धर्तीवर पिंपरी-चिंचवडमध्ये कलाकारांसाठी २ कोटींची तरतूद.

• आरोग्य सेवा हेल्पलाइन: दिवंगत लोकनेते लक्ष्मण जगताप यांच्या नावाने मदतकक्ष व हेल्पलाइन सुरू करणार.

• पर्यावरण आणि ऊर्जा: महापालिका इमारतीवर ५ कोटींचा सौरऊर्जा प्रकल्प, २०३ उद्यानांचे हरितीकरण आणि ‘ऑक्सिजन पार्क’साठी निधी.

• इतर तरतुदी: भटक्या कुत्र्यांच्या समस्येसाठी ६ कोटी, कामगार कट्ट्यासाठी ४ कोटी आणि प्रत्येक नगरसेवकाला स्थानिक विकासासाठी १० लाखांचा स्वतंत्र निधी.

महापौरांनी केवळ अर्थसंकल्प मंजूर केला नाही, तर काही महत्त्वाच्या उपसूचनाही मांडल्या:

१. पवना नदीप्रमाणेच इंद्रायणी नदीसाठीही रिव्हरफ्रंट विकास योजना राबवणे.

२. महात्मा फुले स्मारकासाठी स्वतंत्र निधी उपलब्ध करून देणे.

३. शहरात प्रभावी क्रीडा धोरण राबवण्यासाठी विशेष तरतूद करणे.

नवनियुक्त आयुक्त डॉ. विजय सूर्यवंशी यांनी प्रशासकीय शिस्तीवर भर दिला. ते म्हणाले, “प्रशासनातील अधिकारी-कर्मचारी चांगल्या हेतूने काम करत असताना चुका झाल्या तर समजून घेतल्या जातील. मात्र, जाणीवपूर्वक कामात टाळाटाळ करणाऱ्या किंवा चुकीच्या हेतूने काम करणाऱ्यांची गय केली जाणार नाही. अशांवर कठोर कारवाई केली जाईल.”

या सभेला सत्ताधारी पक्षनेते प्रशांत शितोळे, विरोधी पक्षनेते भाऊसाहेब भोईर, सभापती सुजाता बोराटे, राणी पठारे, संजय नाना काटे, कैलास कुटे, रविना आंगोळकर आणि महापालिकेचे वरिष्ठ अधिकारी उपस्थित होते.

© २०२६ मॅक्स मंथन डेली न्यूज. सर्व हक्क राखीव।