पिंपरी-चिंचवडकरांचा प्रामाणिकपणा! ८६० कोटींचा मालमत्ता कर महापालिकेत जमा; ‘अभय योजने’चे शेवटचे ५ दिवस शिल्लक

पिंपरी प्रतिनिधी आकाश कांबळे, २६ मार्च २०२६ | मॅक्स मंथन विशेष:

पिंपरी : पिंपरी-चिंचवड महानगरपालिकेच्या कर आकारणी व कर संकलन विभागाने चालू आर्थिक वर्षात ऐतिहासिक कामगिरी करत तब्बल ८६० कोटी ५९ लाख रुपयांचा मालमत्ता कर वसूल केला आहे. १ एप्रिल २०२५ ते २४ मार्च २०२६ या कालावधीत झालेली ही विक्रमी वसुली नागरिकांचा वाढता प्रतिसाद आणि प्रशासनाच्या नियोजनबद्ध कामकाजाचे फळ असल्याचे मानले जात आहे.

महापौर रवि लांडगे यांनी करदात्यांचे आभार मानले असून, थकबाकीदारांसाठी लागू केलेल्या ‘अभय योजने’चा लाभ घेण्याचे आवाहन केले आहे. या योजनेअंतर्गत विलंब दंडावर ९० टक्के सवलत मिळत असून, ही सवलत मिळवण्यासाठी आता अवघे ५ दिवस शिल्लक राहिले आहेत.

आकडेवारीवर एक नजर:

• एकूण नोंदणीकृत मालमत्ता: ७ लाख ३२ हजार

• कर भरलेले मालमत्ताधारक: ५ लाख ७२ हजार ९०२

• सर्वाधिक वसुली: वाकड विभागीय कार्यालय (१०६ कोटी १२ लाख रु.)

• इतर आघाडीवरील कार्यालये: थेरगाव (८७.४९ कोटी), चिखली (७४.१० कोटी) आणि किवळे (५९.८६ कोटी).

कर संकलन विभागाचे उपायुक्त सचिन पवार यांनी माहिती दिली की, ज्या मालमत्ताधारकांनी अद्याप कर भरलेला नाही, त्यांच्यावर नियमानुसार जप्तीची कारवाई तसेच नळ कनेक्शन खंडित करण्याची प्रक्रिया सुरू करण्यात आली आहे. त्यामुळे दंडात सवलत मिळवून कारवाई टाळण्यासाठी ३१ मार्चपूर्वी कर भरणे आवश्यक आहे.

“पिंपरी-चिंचवडकरांनी महापालिकेच्या विकासकामांना कर भरून मोठी साथ दिली आहे. ज्यांच्याकडे थकबाकी आहे, त्यांनी अभय योजनेचा लाभ घेऊन विलंब दंडातील ९० टक्के सवलतीचा फायदा घ्यावा आणि शहराच्या विकासात योगदान द्यावे.”

— रवि लांडगे, महापौर, पिंपरी-चिंचवड महानगरपालिका

“नियोजनबद्ध कामकाज आणि सुलभ सुविधांमुळे कर वसुलीत वाढ झाली आहे. अभय योजना ही थकबाकीदारांसाठी मोठी संधी आहे. मात्र, जे नागरिक कर भरण्यास टाळाटाळ करतील, त्यांच्यावर प्रशासन कठोर कारवाई करण्यास मागेपुढे पाहणार नाही.”

— डॉ. विजय सूर्यवंशी, आयुक्त, पिंपरी-चिंचवड महानगरपालिका

विभागीय कार्यालय निहाय वसुली (प्रमुख विभाग):

© २०२६ मॅक्स मंथन डेली न्यूज. सर्व हक्क राखीव।