पिंपरी-चिंचवडच्या पाणीप्रश्नावर महापौरांचा ‘ॲक्शन मोड’! भामा आसखेड प्रकल्पाचे काम तातडीने पूर्ण करण्याचे निर्देश; महापौर व आयुक्तांकडून प्रत्यक्ष पाहणी

पिंपरी-चिंचवड प्रतिनिधी: बालाजी नवले, २६ मार्च २०२६ | मॅक्स मंथन विशेष:

पिंपरी : पिंपरी-चिंचवड शहराच्या भविष्यातील पाण्याची गरज ओळखून राबविण्यात येत असलेल्या भामा आसखेड धरण पाणीपुरवठा प्रकल्पाची महापौर रवि लांडगे यांनी आज प्रत्यक्ष पाहणी केली. “शहरातील नागरिकांना शुद्ध, मुबलक आणि शाश्वत पाणीपुरवठा उपलब्ध करून देण्यासाठी महानगरपालिका कटिबद्ध आहे. या प्रकल्पात कोणतीही दिरंगाई खपवून घेतली जाणार नाही,” अशा शब्दांत महापौरांनी अधिकाऱ्यांना कामाचा वेग वाढवण्याचे निर्देश दिले.

या पाहणी दौऱ्यात उपमहापौर शर्मिला बाबर, स्थायी समिती सभापती अभिषेक बारणे, विरोधी पक्षनेते भाऊसाहेब भोईर आणि नवनियुक्त महापालिका आयुक्त डॉ. विजय सूर्यवंशी यांच्यासह वरिष्ठ अधिकारी उपस्थित होते.

महापौरांनी वाकी (तर्फे वाडा) ते चिखलीपर्यंतच्या संपूर्ण प्रकल्पाचा टप्प्याटप्प्याने आढावा घेतला:

• अशुद्ध जल उपसा केंद्र (वाकी): येथून दररोज १६७ दशलक्ष लिटर (MLD) पाणी शहरासाठी उपलब्ध होणार आहे. या केंद्राच्या कामाची महापौरांनी बारकाईने पाहणी केली.

• जलवाहिनीचे जाळे: वाकी ते तळेगाव दरम्यानची ७.३० किमी लांबीची रायझिंग मेन वाहिनी आणि चिखलीपर्यंतची १८.८० किमी लांबीची ग्रॅव्हिटी मेन वाहिनी अशा दोन्ही महत्त्वाच्या जलवाहिन्यांच्या कामाचा प्रगती अहवाल त्यांनी घेतला.

• ब्रेक प्रेशर टँक (नऊलाख उंब्रे): या टाकीच्या उभारणीसाठी आवश्यक तांत्रिक प्रक्रिया पूर्ण झाली असून प्रत्यक्ष बांधकाम तातडीने सुरू करण्याच्या सूचना देण्यात आल्या.

• जलशुद्धीकरण केंद्र (चिखली): चिखली येथे उभारण्यात येत असलेल्या २०० दशलक्ष लिटर प्रतिदिन क्षमतेच्या केंद्राच्या हायड्रॉलिक आणि स्ट्रक्चरल डिझाईनची माहिती महापौरांनी घेतली.

“भामा आसखेड प्रकल्पामुळे शहरातील अनेक भागांतील पाणीटंचाईचा प्रश्न कायमस्वरूपी मार्गी लागणार आहे. प्रकल्पातील सर्व कामे दर्जेदार आणि नियोजित वेळेतच पूर्ण झाली पाहिजेत. विलंब लावणाऱ्यांवर कठोर कारवाई केली जाईल.”

— रवि लांडगे, महापौर, पिंपरी-चिंचवड

“शहरातील पाणीपुरवठा हा अत्यंत संवेदनशील विषय आहे. भामा आसखेड प्रकल्प शहराच्या दीर्घकालीन विकासासाठी निर्णायक ठरेल. या प्रकल्पाच्या अंमलबजावणीत कोणतीही दिरंगाई सहन केली जाणार नाही. प्रशासनाचे हे सर्वोच्च प्राधान्य आहे.”

— डॉ. विजय सूर्यवंशी, आयुक्त, पिंपरी-चिंचवड

या पाहणी दौऱ्यात शहर सुधारणा समिती सभापती संजय काटे, नगरसेवक धर्मपाल तंतरपाळे, कुणाल वाव्हळकर, शेखर चिंचवडे, नवनाथ जगताप, मुख्य अभियंता प्रमोद ओंभासे, सह शहर अभियंता अनिल भालसाखळे, महेश कावळे आणि जनसंपर्क अधिकारी प्रफुल्ल पुराणिक उपस्थित होते.

© २०२६ मॅक्स मंथन डेली न्यूज. सर्व हक्क राखीव।