पिंपरी-चिंचवड पोलिसांची मोठी कारवाई! घरगुती गॅसची बेकायदेशीर विक्री करणाऱ्या तीन टोळ्यांचा पर्दाफाश

पिंपरी चिंचवड प्रतिनिधी बालाजी नवले, २७ मार्च २०२६ | मॅक्स मंथन गुन्हेगारी विशेष:

पिंपरी : पश्चिम आशियातील युद्धजन्य परिस्थितीमुळे निर्माण झालेल्या गॅस टंचाईचा गैरफायदा घेऊन घरगुती गॅस सिलिंडरमधून बेकायदेशीररीत्या गॅसची चोरी करणाऱ्यांविरुद्ध पिंपरी-चिंचवड पोलिसांनी मोठी मोहीम उघडली आहे. मंगळवार आणि बुधवारी शहरात तीन वेगवेगळ्या ठिकाणी छापे टाकून पोलिसांनी घरगुती गॅस व्यावसायिक सिलिंडरमध्ये भरणाऱ्या आरोपींना बेड्या ठोकल्या आहेत.

पोलीस आयुक्त विनय कुमार चौबे यांनी दिलेल्या आदेशानुसार, गुन्हे शाखा आणि स्थानिक पोलिसांनी ही कारवाई केली आहे.

• सांगवी परिसर (पिंपळे गुरव): सांगवी पोलिसांनी पिंपळे गुरव येथील एका खोलीवर छापा टाकला. येथे घरगुती सिलिंडरमधून व्यावसायिक सिलिंडरमध्ये गॅस भरणाऱ्या एका व्यक्तीला अटक करण्यात आली. घटनास्थळावरून ४८,००० रुपयांचे साहित्य जप्त करण्यात आले आहे.

• दिघी (चऱ्होली): पिंपरी-चिंचवड गुन्हे शाखेने चऱ्होली येथील एका कामगार वस्तीवर कारवाई केली. येथे लोहगावच्या एका आरोपीला ताब्यात घेण्यात आले, जो घरगुती गॅस छोट्या सिलिंडरमध्ये भरून चढ्या दराने विकत होता. येथून ९,८०० रुपयांचा मुद्देमाल जप्त झाला.

• भोसरी (भगत वस्ती): भोसरी पोलिसांनी बुधवारी रात्री एका दुकानावर छापा टाकून २८,००० रुपयांचे रिफिलिंग साहित्य आणि सिलिंडर जप्त केले.

पश्चिम आशियातील संघर्षाच्या पार्श्वभूमीवर नागरिक घाबरून गॅस आणि इंधनाचा साठा करत असल्याच्या संधीचा फायदा हे काळाबाजार करणारे घेत आहेत. पोलिसांनी नागरिकांना आवाहन केले आहे की, अशा प्रकारची कोणतीही बेकायदेशीर कृती आढळल्यास तातडीने ९५२९६९१९६६ किंवा ११२ या क्रमांकावर संपर्क साधावा.

आरोपींविरुद्ध भारतीय न्याय संहिता (BNS) च्या कलम २८७, २८८ (अग्नी किंवा स्फोटक पदार्थांबाबत निष्काळजीपणा) आणि जीवनावश्यक वस्तू कायद्याच्या संबंधित कलमान्वये दिघी, भोसरी आणि सांगवी पोलीस ठाण्यात गुन्हे दाखल करण्यात आले आहेत.

© २०२६ मॅक्स मंथन डेली न्यूज. सर्व हक्क राखीव।