‘महापौर चषक’ राष्ट्रीय शरीरसौष्ठव स्पर्धेत महाराष्ट्राचा दबदबा; ज्युनियर गटात राज्याच्या खेळाडूंची सुवर्ण कामगिरी

पिंपरी चिंचवड प्रतिनिधी आकाश कांबळे, पिंपरी, दि.३१ मार्च २०२६,मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या वतीने आयोजित ‘महापौर चषक ६३ वी राष्ट्रीय अजिंक्यपद व ज्युनियर शरीरसौष्ठव स्पर्धा २०२६’ मध्ये यजमान महाराष्ट्र राज्याच्या खेळाडूंनी निर्विवाद वर्चस्व गाजवले आहे. चिंचवड येथील प्रा. रामकृष्ण मोरे प्रेक्षागृहात सुरू असलेल्या या भव्य स्पर्धेत ज्युनियर पुरुष बॉडीबिल्डिंग, फिजीक आणि क्लासिक अशा विविध प्रकारांत महाराष्ट्राच्या खेळाडूंनी सुवर्णपदकांची लयलूट केली.

देशभरातील विविध राज्यांमधून आलेल्या ४४५ पुरुष आणि ५० महिला खेळाडूंच्या सहभागामुळे पिंपरी-चिंचवडमध्ये सध्या क्रीडामय वातावरण निर्माण झाले आहे.

२९ मार्च रोजी पार पडलेल्या विविध वजनी गटांच्या अंतिम फेरीत महाराष्ट्राच्या खेळाडूंनी बाजी मारली. यामध्ये प्रामुख्याने खालील खेळाडूंनी सुवर्णपदके पटकावली:

• मनीष म्हात्रे (५५ किलो गट)

• अर्पण सपकाळ (७० किलो गट)

• साहिल सावंत (७५ किलो गट)

• शुभम वीर (क्लासिक १७१ सेमी पर्यंत)

• प्रणव पवार (क्लासिक १८० सेमी पर्यंत)

• आकाश दडमल (फिजीक १७१ सेमी पर्यंत)

• निलेश गुरव (१८० सेमी पेक्षा कमी)

• स्वागतम पाटील (१८० सेमी पेक्षा जास्त)

• नितेश भंडारी (फिजिकल चॅलेंज – खुला गट)

• कमलेश आचरा (मास्टर्स – ४० वर्षांवरील)

महापौर रवि लांडगे, उपमहापौर शर्मिला बाबर, स्थायी समिती सभापती अभिषेक बारणे, विरोधी पक्षनेते भाऊसाहेब भोईर आणि आयुक्त डॉ. विजय सूर्यवंशी यांच्या मार्गदर्शनाखाली या स्पर्धेचे अत्यंत शिस्तबद्ध नियोजन करण्यात आले आहे. ज्युनियर आणि वरिष्ठ गटात शरीरसौष्ठव, क्लासिक, फिजीक आणि फिटनेस अशा विविध प्रकारांत खेळाडू आपल्या शरीरयष्टीचे आणि सादरीकरणाचे कसब दाखवत आहेत.

राष्ट्रीय दर्जाच्या या स्पर्धेत खेळाडूंची राहण्याची सोय, तांत्रिक व्यवस्था आणि प्रेक्षकांसाठीच्या सुविधांचे चोख नियोजन उपायुक्त पंकज पाटील यांच्या नेतृत्वाखालील क्रीडा विभागाने केले आहे. या स्पर्धेमुळे शहराच्या क्रीडा क्षेत्रातील प्रतिष्ठेत मोठी भर पडली असून, स्थानिक नागरिकांना राष्ट्रीय स्तरावरील खेळाडूंची कामगिरी जवळून पाहण्याची संधी उपलब्ध झाली आहे.

स्पर्धेचा २९ मार्च २०२६ रोजीचा सविस्तर निकाल (प्रथम क्रमांक):

© २०२६ मॅक्स मंथन डेली न्यूज. सर्व हक्क राखीव.