पिंपरी-चिंचवड महापालिकेचा ‘आंतरराष्ट्रीय झिरो वेस्ट दिन’ अनोख्या उपक्रमांनी साजरा; दापोडीत कचरा व्यवस्थापनाचे धडे

पिंपरी चिंचवड प्रतिनिधी आकाश कांबळे , दिनांक: ३१ मार्च २०२६,मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या ‘ह’ क्षेत्रीय कार्यालयाच्या वतीने दापोडी येथील आनंदवन झिरो वेस्ट प्रकल्पात ‘आंतरराष्ट्रीय शून्य कचरा दिन’ (International Zero Waste Day) अत्यंत उत्साहपूर्ण आणि नाविन्यपूर्ण पद्धतीने साजरा करण्यात आला. कचरामुक्त शहराच्या संकल्पनेला बळकटी देण्यासाठी यावेळी विविध जनजागृतीपर उपक्रम राबविण्यात आले.

महापौर रवि लांडगे, उपमहापौर शर्मिला बाबर, आयुक्त डॉ. विजय सूर्यवंशी, अतिरिक्त आयुक्त विजयकुमार खोराटे आणि उपआयुक्त डॉ. प्रदीप ठेंगल यांच्या मार्गदर्शनाखाली आरोग्य विभागाने या कार्यक्रमाचे आयोजन केले होते.

कार्यक्रमाचे मुख्य आकर्षण ठरलेल्या पथनाट्याने उपस्थितांचे लक्ष वेधून घेतले. या सादरीकरणातून नागरिकांना खालील महत्त्वाच्या विषयांवर मार्गदर्शन करण्यात आले:

• कचरा विलगीकरण: ओला, सुका, घातक आणि घरगुती घातक अशा चार प्रकारे कचरा वेगळा करण्याचे महत्त्व.

• प्लास्टिक बंदी: सिंगल यूज प्लास्टिकवरील बंदी आणि कापडी पिशव्यांच्या वापराचे आवाहन.

• आर.आर.आर. सेंटर: रिड्यूस (Reduce), रियूज (Reuse) आणि रिसायकल (Recycle) या त्रिसूत्रीची अंमलबजावणी.

• घरगुती कंपोस्टिंग: ओल्या कचऱ्यापासून घरच्या घरी खतनिर्मिती करण्याच्या सोप्या पद्धती.

कार्यक्रमादरम्यान उपस्थितांना दापोडी येथील ‘शून्य कचरा’ प्रकल्पाची सविस्तर माहिती देण्यात आली. कचरा व्यवस्थापनात वापरल्या जाणाऱ्या आधुनिक उपाययोजना आणि तंत्रज्ञानाची ओळख करून देत, शहराला कचरामुक्त करण्यासाठी नागरिकांचा सहभाग किती महत्त्वाचा आहे, हे अधोरेखित करण्यात आले.

या प्रसंगी सहाय्यक आयुक्त किरणकुमार मोरे, सहाय्यक आरोग्य अधिकारी अंकुश झिटे, मुख्य आरोग्य निरीक्षक उद्धव डवरी, दीपक कोटीयाना, आरोग्य निरीक्षक स्नेहल सोनवणे, नितीन तुपे, सचिन जाधव, ओंकार शिवणकर यांच्यासह महापालिकेचे इतर अधिकारी व कर्मचारी उपस्थित होते.

© २०२६ मॅक्स मंथन डेली न्यूज. सर्व हक्क राखीव.