लक्षेश्वर संस्थान येथे सरकारी योजनांचा महापूर! ‘महाराजस्व शिबिरात’ डिजिटल सेवा आणि प्रमाणपत्रांचे वाटप

लाखपुरी येथे ‘महाराजस्व समाधान शिबीर’ उत्साहात; मंत्री चंद्रशेखर बावनकुळे यांच्या हस्ते १३१७ प्रकरणांचा निपटारा

अमरावती/मूर्तिजापूर प्रतिनिधी विलास सावळे , १० एप्रिल २०२६ मॅक्स मंथन डेली न्यूज:

मूर्तिजापूर: महाराष्ट्र शासनाच्या ‘छत्रपती शिवाजी महाराज महाराजस्व अभियान समाधान शिबीर’ टप्पा क्र. १ अंतर्गत आज मूर्तिजापूर तालुक्यातील लाखपुरी येथील लक्षेश्वर संस्थान येथे भव्य शिबिराचे आयोजन करण्यात आले. या शिबिरात महसूल मंत्री ना. चंद्रशेखर बावनकुळे यांच्या प्रमुख उपस्थितीत शेकडो नागरिकांच्या प्रलंबित कामांचा जागीच निपटारा करण्यात आला.

अकोल्याच्या जिल्हाधिकारी वर्षा मीना यांच्या मार्गदर्शनाखाली उपविभागीय अधिकारी संदीपकुमार अपार व तहसीलदार शिल्पा बोबडे यांनी या शिबिराचे यशस्वी नियोजन केले.

यावेळी बोलताना महसूल मंत्री चंद्रशेखर बावनकुळे म्हणाले की, “शासनाने महसूल विभागाशी संबंधित एकूण ४८ महत्त्वपूर्ण निर्णय घेतले आहेत. या सर्व योजना शेतकरी आणि गरीब कुटुंबांच्या घरापर्यंत पोहोचवणे, हेच या अभियानाचे मुख्य उद्दिष्ट आहे.” यावेळी त्यांच्या हस्ते भूमी अभिलेख विभागाच्या ‘जनसेवेत भूमी अभिलेख’ या माहिती पुस्तिकेचे विमोचनही करण्यात आले.

आमदार हरीश पिंपळे यांनी आपल्या भाषणात तुकडेबंदीच्या निर्णयामुळे प्रलंबित असलेली वाटणीपत्रे मार्गी लागल्याबद्दल मंत्री महोदयांचे कौतुक केले. तसेच मूर्तिजापूर तालुक्यातील इतर प्रलंबित कामे तातडीने पूर्ण करण्यासाठी यंत्रणेने जलद गतीने काम करावे, असे आवाहन केले. यावेळी आमदार रणधीर सावरकर यांनीही सर्वांसाठी घरे या संकल्पनेतून २०११ पूर्वीच्या अतिक्रमण धारकांना पट्टे देण्याबाबत कार्यवाही करण्याच्या सूचना दिल्या.

शिबिरात विविध विभागांचे एकूण ३० स्टॉल्स लावण्यात आले होते. यामध्ये संजय गांधी निराधार योजना, महावितरण, आरोग्य विभाग, भूमी अभिलेख, आधार आणि सेतू केंद्रांचा समावेश होता.

शिबिरातील कामकाजाचा तपशील:

• प्रमाणपत्र वितरण: ६३८ लाभार्थ्यांना विविध दाखल्यांचे वाटप.

• ७/१२ व ८-अ उतारा: ३६२ नागरिकांना डिजिटल उतारे उपलब्ध.

• फेरफार प्रकरणे: १७४ फेरफार निकाली काढले.

• दुरुस्ती अर्ज: २९ अर्जांवर कार्यवाही.

• इतर: कूळ जमिनीची २ प्रकरणे वर्ग-२ मधून वर्ग-१ मध्ये करण्यात आली.

अशा एकूण १३१७ प्रकरणांवर कार्यवाही पूर्ण करून प्रातिनिधिक स्वरूपात लाभार्थ्यांना प्रमाणपत्रांचे वाटप करण्यात आले.

या कार्यक्रमाला आमदार वसंत खंडेलवाल, जिल्हाधिकारी वर्षा मीना, नगराध्यक्ष हर्षल साबळे, उपविभागीय अधिकारी संदीपकुमार अपार, तहसीलदार शिल्पा बोबडे, निवासी नायब तहसीलदार रवींद्र राऊत, सरपंच राजू कैथवास व विविध विभागांचे अधिकारी उपस्थित होते. कार्यक्रमासाठी जागा उपलब्ध करून दिल्याबद्दल लक्षेश्वर संस्थेचे अध्यक्ष राजू दहापुते यांचे प्रशासनाच्या वतीने आभार मानण्यात आले.

© २०२६ मॅक्स मंथन डेली न्यूज. सर्व हक्क राखीव.