‘डंख छोटा, धोका मोठा!’; जागतिक हिवताप दिनानिमित्त वायसीएम रुग्णालयामार्फत प्रभात फेरी व जनजागृती

पिंपरी चिंचवड प्रतिनिधी लक्ष्मण प्रधान, २७ एप्रिल २०२६ मॅक्स मंथन डेली न्यूज:

पिंपरी: जागतिक हिवताप दिनानिमित्त पिंपरी-चिंचवड महानगरपालिका पदव्युत्तर संस्था व यशवंतराव चव्हाण स्मृती रुग्णालयाच्या (वायसीएम) वतीने रविवारी संत तुकाराम नगर परिसरात भव्य प्रभात फेरी काढण्यात आली. “हिवताप निर्मूलनासाठी कटिबद्ध – आता हे शक्य आहे, आता हे केलेच पाहिजे!” या जागतिक आरोग्य संघटनेच्या घोषवाक्याचा प्रसार करत नागरिकांमध्ये आरोग्याबाबत जनजागृती करण्यात आली.

या प्रभात फेरीच्या माध्यमातून हिवताप (मलेरिया) प्रतिबंध, नियंत्रण आणि स्वच्छतेचे महत्त्व पटवून देण्यात आले. “कोरडा दिवस पाळा, हिवताप टाळा”, “घराभोवती पाणी साठू देऊ नका” आणि “मच्छरदाणीचा वापर करा” अशा घोषणा देत विद्यार्थी आणि डॉक्टरांनी परिसरातील नागरिकांचे लक्ष वेधून घेतले.

सदर उपक्रम पदव्युत्तर संस्था व वायसीएम रुग्णालयाचे अधिष्ठाता डॉ. राजेंद्र वाबळे आणि जनआरोग्य वैद्यकशास्त्र विभागाचे प्रमुख डॉ. हर्षल पांडवे यांच्या मार्गदर्शनाखाली राबवण्यात आला. यावेळी अतिरिक्त आरोग्य वैद्यकीय अधिकारी डॉ. अभयचंद्र दादेवार, सहयोगी प्राध्यापक डॉ. मुकेश बावा, सहाय्यक प्राध्यापक सॅमसन लिओ यू, आरोग्य सहाय्यक माणिक चव्हाण यांच्यासह निवासी डॉक्टर, परिचर्या महाविद्यालयाचे विद्यार्थी आणि कर्मचारी मोठ्या संख्येने उपस्थित होते.

हिवताप हा मादी ॲनोफिलीस डासाच्या चाव्याने पसरणारा आजार असून, त्याची लक्षणे आढळल्यास त्वरित वैद्यकीय सल्ला घेण्याचे आवाहन करण्यात आले आहे.

प्रमुख लक्षणे:

• सतत किंवा थंडी वाजून येणारा ताप.

• तीव्र डोकेदुखी आणि अंगदुखी.

• मळमळ, उलट्या होणे आणि प्रचंड अशक्तपणा जाणवणे.

• अचानक घाम येणे.

प्रतिबंधात्मक उपाय:

• घराच्या परिसरात कोठेही पाणी साचू देऊ नका.

• आठवड्यातून किमान एक दिवस ‘कोरडा दिवस’ म्हणून पाळावा.

• झोपताना मच्छरदाणीचा वापर करा आणि पूर्ण अंग झाकणारे कपडे परिधान करा.

• खिडक्यांना जाळ्या बसवा आणि परिसर स्वच्छ ठेवा.

महानगरपालिकेच्या वतीने हिवताप नियंत्रणासाठी प्रभावी पावले उचलली जात असून, नागरिकांनीही प्रशासनाला सहकार्य करावे, असे आवाहन आरोग्य विभागामार्फत करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.