क्रीडा, कला, साहित्य व सांस्कृतिक समितीच्या बैठकीत ४ महत्त्वाचे ठराव मंजूर

पिंपरी चिंचवड प्रतिनिधी आकाश कांबळे, ५ मे २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेच्या क्रीडा, कला व साहित्य समितीची महत्त्वपूर्ण आढावा बैठक सभापती कैलास कुटे यांच्या अध्यक्षतेखाली पार पडली। पिंपरी येथील मुख्य प्रशासकीय भवनातील दिवंगत महापौर मधुकर पवळे सभागृहात झालेल्या या बैठकीत शहरातील खेळाडू, कलाकार आणि नागरिकांच्या हिताचे चार महत्त्वाचे ठराव मंजूर करण्यात आले।

• नवीन कला केंद्रांची उभारणी: शहरातील नवोदित कलाकारांना प्रोत्साहन देण्यासाठी विविध भागांत ‘कला केंद्र’ सुरू करण्यास मान्यता देण्यात आली। या केंद्रांमधून चित्रकला, संगीत, नृत्य आणि नाट्य यांसारख्या कलांचे प्रशिक्षण दिले जाणार आहे।

• खेळाडूंसाठी अपघाती विमा संरक्षण: महापालिकेमार्फत आयोजित क्रीडा स्पर्धांमध्ये सहभागी होणाऱ्या खेळाडूंना ‘अपघाती विमा संरक्षण’ देण्याचा निर्णय घेण्यात आला। स्पर्धेदरम्यान दुखापत झाल्यास आर्थिकदृष्ट्या दुर्बल खेळाडूंना तातडीने वैद्यकीय मदत मिळावी, हा यामागचा मुख्य उद्देश असून विम्याचा प्रीमियम महापालिका भरणार आहे।

• महिलांसाठी विशेष सवलती: महिलांच्या आरोग्यासाठी शहरातील जलतरण तलाव आणि व्यायामशाळांच्या शुल्कात विशेष सवलत देण्याचा निर्णय घेण्यात आला। तसेच महिलांसाठी स्वतंत्र प्रशिक्षण व सुविधा उपलब्ध करून देण्यावर भर दिला जाणार आहे।

• विभागाचे नामकरण: क्रीडा क्षेत्रासह कला, साहित्य आणि पर्यटनाला सुसूत्रता देण्यासाठी क्रीडा विभागाचे नाव आता ‘क्रीडा, कला, साहित्य, पर्यटन व सांस्कृतिक विभाग’ असे करण्याचा निर्णय घेण्यात आला आहे।

महापालिकेच्या वतीने चालवल्या जाणाऱ्या पं. भीमसेन जोशी संगीत अकादमी, सावित्रीबाई फुले अकादमी, ग्रंथालये आणि क्रांतिवीर चापेकर वाडा यांसारख्या वास्तूंद्वारे सांस्कृतिक व पर्यटन क्षेत्राला चालना दिली जात आहे। या सर्व उपक्रमांना अधिक प्रभावी करण्यासाठी एकात्मिक धोरण राबविण्याची गरज बैठकीत व्यक्त करण्यात आली।

या बैठकीस विरोधी पक्षनेते व समिती सदस्य भाऊसाहेब भोईर, शाम जगताप, धर्मपाल तंतरपाळे, तानाजी बारणे, योगेश लांडगे, जितेंद्र ननावरे, उपआयुक्त पंकज पाटील आणि जनसंपर्क अधिकारी प्रफुल्ल पुराणिक उपस्थित होते।

“आज मंजूर करण्यात आलेले ठराव शहराच्या सांस्कृतिक आणि क्रीडा विकासासाठी मैलाचा दगड ठरतील. यामुळे खेळाडू आणि कलाकारांना अधिक संधी मिळतील. या योजनांची प्रभावी अंमलबजावणी करून शहराला या क्षेत्रात अग्रस्थानी नेण्याचा आमचा प्रयत्न राहील.”

— कैलास कुटे (सभापती, क्रीडा, कला व साहित्य समिती)

© २०२६ मॅक्स मंथन डेली न्यूज. सर्व हक्क राखीव.