‘महाराजस्व समाधान शिबिरा’तून लोककल्याणाचा जागर; हातगांव येथे १३३७ प्रमाणपत्रांचे वाटप

अकोला / मुर्तिजापूर प्रतिनिधी विलास सावळे, ८ मे २०२६ मॅक्स मंथन डेली न्यूज:

मुर्तीजापूर: महाराष्ट्र शासनाच्या लोककल्याणकारी योजनांचा लाभ थेट जनतेच्या दारापर्यंत पोहोचवण्यासाठी ‘छत्रपती शिवाजी महाराज महाराष्ट्र समाधान शिबीर अभियान’ अंतर्गत मुर्तीजापूर तालुक्यातील पाचवे भव्य शिबीर आज हातगांव येथे उत्साहात पार पडले. या शिबिरात विविध योजनांचे एकूण १३३७ प्रमाणपत्रे व लाभांचे वाटप करून प्रशासनाने आपली तत्परता सिद्ध केली आहे.

अकोल्याच्या जिल्हाधिकारी वर्षा मीना यांच्या मार्गदर्शनाखाली मुर्तीजापूरचे उपविभागीय अधिकारी संदिपकुमार अपार व तहसीलदार कु. शिल्पा बोबडे यांनी वसंतराव नाईक विद्यालयात या शिबिराचे नेटके आयोजन केले होते.

शिबिराच्या ठिकाणी महसूल, समाजकल्याण, महावितरण, आरोग्य आणि कृषी विभागासह एकूण १६ विभागांचे स्टॉल्स लावण्यात आले होते. याद्वारे डिजिटल ७/१२, ई-फेरफार, संजय गांधी निराधार योजना आणि विविध दाखल्यांचे वाटप एकाच ठिकाणी करण्यात आले. विशेष म्हणजे, तक्रार निवारण कक्षात प्राप्त झालेल्या २० तक्रारींचा जागेवरच निपटारा करण्याचे निर्देश उपविभागीय अधिकारी अपार यांनी दिले.

शिबिरादरम्यान मिळालेल्या लाभाची आकडेवारी खालीलप्रमाणे आहे:

एकूण वितरित प्रमाणपत्रे: ९२७

डिजिटल ७/१२ व ८-अ उताऱ्यांचे वाटप: ३२२

निकाली काढलेले फेरफार: ४४

एक खिडकी योजनेतून लाभ: २० प्रकरणे

इतर दुरुस्ती प्रकरणे: ५ प्रकरणे

कार्यक्रमात उपविभागीय अधिकारी संदिपकुमार अपार यांनी उपस्थितांशी संवाद साधताना अत्यंत सोप्या भाषेत ‘गाव नमुना ७/१२’ कसा वाचावा आणि त्यातील नोंदींचा अर्थ काय, हे समजावून सांगितले. नागरिकांनी आपल्या हक्काप्रती जागरूक राहून या शिबिरांचा लाभ घ्यावा, असे आवाहनही त्यांनी केले.

या शिबिराच्या यशस्वितेसाठी नायब तहसीलदार दिनेश सोनोने, महेश नागोलकर, मंडळ अधिकारी रवींद्र पुरी यांच्यासह महसूल कर्मचाऱ्यांनी विशेष परिश्रम घेतले. परिमंडळ तहसीलदार कु. गिरीजादेवी लोखंडे यांनी आभार मानले.

© २०२६ मॅक्स मंथन डेली न्यूज. सर्व हक्क राखीव.