पिंपरी चिंचवड क्रीडा क्षेत्रातही देशाला दिशा देणारे शहर ठरतेय – महापौर रवि लांडगे
पिंपरी चिंचवड प्रतिनिधी बालाजी नवले, १२ मे २०२६ मॅक्स मंथन डेली न्यूज:
पिंपरी: “पिंपरी चिंचवड हे केवळ औद्योगिक शहर नसून क्रीडा क्षेत्रातही देशाला दिशा देणारे शहर बनत आहे. आपल्या शहरातील खेळाडू आंतरराष्ट्रीय स्तरावर भारताचा तिरंगा अभिमानाने फडकवत आहेत, ही बाब प्रत्येक नागरिकासाठी प्रेरणादायी आहे. अशा गुणवंत खेळाडूंच्या पाठीशी महापालिका प्रशासन कायम ठामपणे उभी राहील,” असे प्रतिपादन महापौर रवि लांडगे यांनी केले.
पिंपरी चिंचवडच्या क्रीडा क्षेत्रासाठी अभिमानास्पद कामगिरी करणाऱ्या किंग मार्शल आर्ट्स संस्थेच्या विद्यार्थ्यांचा महापौर कार्यालयात महापौर रवि लांडगे यांच्या हस्ते विशेष सन्मान करण्यात आला. यावेळी ते बोलत होते.
उत्तर प्रदेशमधील सहारनपूर येथे नुकत्याच झालेल्या ‘इंडियन इंटरग्रील चॅम्पियन आंतरराष्ट्रीय स्पर्धेत’ भारताचे प्रतिनिधित्व करताना थेरगाव येथील चार खेळाडूंनी उल्लेखनीय कामगिरी केली. यामध्ये जयदेव म्हमाणे यांनी सुवर्णपदक पटकावून शहराच्या शिरपेचात मानाचा तुरा रोवला आहे. जयदेव यांनी आतापर्यंत तब्बल ११ सुवर्णपदके जिंकून आपल्या सातत्यपूर्ण कामगिरीची छाप पाडली आहे. त्यांच्या या यशाची दखल खुद्द पंतप्रधान नरेंद्र मोदी यांनीही घेतली आहे.
याप्रसंगी स्थायी समिती सभापती अभिषेक बारणे म्हणाले की, “खेळाडूंचे यश हे संपूर्ण शहराचा सन्मान असतो. कठोर मेहनत आणि जिद्दीच्या जोरावर या विद्यार्थ्यांनी जागतिक स्तरावर पिंपरी चिंचवडचे नाव पोहोचवले आहे. भविष्यात अशा खेळाडूंना अधिक प्रोत्साहन आणि अद्ययावत सुविधा उपलब्ध करून देण्यासाठी आम्ही कटीबद्ध आहोत.”
या गौरव सोहळ्याप्रसंगी सामाजिक कार्यकर्ते नामदेवराव जाधव यांच्यासह अनेक क्रीडाप्रेमी उपस्थित होते. महापौरांनी सर्व विजयी खेळाडूंचे कौतुक करत त्यांना पुढील वाटचालीस शुभेच्छा दिल्या.
© २०२६ मॅक्स मंथन डेली न्यूज. सर्व हक्क राखीव.
