‘शिवरूद्र शंभुराजे’ महानाट्य हे छत्रपती संभाजी महाराजांचा इतिहास युवा पिढीपर्यंत पोहोचविणारा स्तुत्य उपक्रम – आमदार अमित गोरखे

पिंपरी चिंचवड प्रतिनिधी लक्ष्मण प्रधान, १२ मे २०२६ मॅक्स मंथन डेली न्यूज:

पिंपरी: “छत्रपती संभाजी महाराज यांचे शौर्य, पराक्रम आणि स्वराज्यासाठीचे योगदान युवा पिढीला जिवंत स्वरूपात अनुभवता यावे, या उद्देशाने पिंपरी चिंचवड महानगरपालिकेने आयोजित केलेले महानाट्य हा एक स्तुत्य उपक्रम आहे. प्रत्येकाने आपल्या परिसरातील जास्तीत जास्त नागरिकांना हे महानाट्य पाहण्यासाठी प्रोत्साहित करावे,” असे आवाहन आमदार अमित गोरखे यांनी केले.

चिंचवड येथील बर्ड व्हॅली उद्यान येथे छत्रपती संभाजी महाराज यांच्या जयंतीनिमित्त आयोजित ‘विचार प्रबोधन पर्वा’त ‘शिवरूद्र शंभुराजे’ या भव्य महानाट्याच्या दुसऱ्या प्रयोगाप्रसंगी ते बोलत होते.

‘शिवस्पर्श शिवसह्याद्री प्रतिष्ठान’ निर्मित हे महानाट्य ॲड. विनय चंद्रकांत दाभाडे यांनी लिखित व दिग्दर्शित केले आहे. या महानाट्याची वैशिष्ट्ये खालीलप्रमाणे आहेत:

 तीन मजली भव्य रंगमंच आणि थरारक लढाईचे प्रसंग, २०० हून अधिक कलाकारांचा सहभाग,  हे महानाट्य ‘इंडिया बुक ऑफ रेकॉर्ड’ होल्डर आहे.

१३ मे पर्यंत सायंकाळी ७ ते १० या वेळेत शिवशंभो उद्यानासमोर (बर्ड व्हॅलीच्या मागे) हे प्रयोग रंगणार आहेत.

यावेळी नगरसदस्य तुषार हिंगे, कुशाग्र कदम, अनुराधा गोरखे, सुप्रिया चांदगुडे, उप आयुक्त अण्णा बोदडे यांसह विविध सामाजिक संघटनांचे प्रतिनिधी उपस्थित होते.

छत्रपती संभाजी महाराज यांच्या जयंतीदिनी (१४ मे) महापालिकेच्या वतीने विशेष कार्यक्रमांचे आयोजन करण्यात आले आहे. महापालिका मुख्य इमारत व १०:४५ वाजता बर्ड व्हॅली येथील पुतळ्यास महापौर रवि लांडगे यांच्या हस्ते अभिवादन,  शिवशाहीर सुरेश सुर्यवंशी आसंगीकर यांचा शाहीरीचा कार्यक्रम, सुप्रसिद्ध व्याख्याते नितीन बानगुडे पाटील यांचे “छत्रपती संभाजी महाराज-एक अद्वितीय योध्दे” या विषयावर व्याख्यान

या ऐतिहासिक आणि सांस्कृतिक कार्यक्रमांना शहरवासियांनी मोठ्या संख्येने उपस्थित राहावे, असे आवाहन महापौर रवि लांडगे आणि आमदार अमित गोरखे यांनी केले आहे.

© २०२६ मॅक्स मंथन डेली न्यूज. सर्व हक्क राखीव.