खासदार प्रा. डॉ. मेधा कुलकर्णी यांना सलग दुसऱ्यांदा ‘संसदरत्न’ पुरस्कार जाहीर!
संसदेतील सर्वोत्तम कामगिरीचा सलग दुसऱ्या वर्षी गौरव; महाराष्ट्रातील इतर चार खासदारांचाही समावेश
पिंपरी चिंचवड प्रतिनिधी मनोज उर्फ लक्ष्मण प्रधान, २५ मे २०२६:
पुणे: संसदेतील सर्वोत्तम आणि उल्लेखनीय कामगिरीबद्दल दिल्या जाणाऱ्या अत्यंत मानाच्या ‘संसदरत्न’ पुरस्कारांची नुकतीच घोषणा झाली असून, पुण्याच्या राज्यसभा खासदार प्रा. डॉ. मेधा विश्राम कुलकर्णी यांना सलग दुसऱ्यांदा या पुरस्काराने सन्मानित करण्यात येणार आहे. प्रा. डॉ. मेधा कुलकर्णी यांच्यासह महाराष्ट्रातून भारतीय जनता पक्षाचे हेमंत सावरा व स्मिता वाघ, तसेच शिवसेनेचे डॉ. श्रीकांत शिंदे व नरेश मस्के यांचाही या प्रतिष्ठेच्या पुरस्कारांमध्ये समावेश आहे.
‘प्राईम पॉईंट फाउंडेशन’च्या वतीने दरवर्षी लोकसभा आणि राज्यसभेतील खासदारांच्या उल्लेखनीय व उत्कृष्ट संसदेतील कामाची दखल घेऊन त्यांना ‘संसदरत्न’ पुरस्काराने सन्मानित करण्यात येते. यंदा या पुरस्कारांचे १६ वे वर्ष आहे.
राज्यसभेची पहिलीच टर्म (कार्यकाळ) असतानाही प्रा. डॉ. मेधा कुलकर्णी यांनी संसदेत आपला वेगळा ठसा उमटवला आहे. त्यांनी संसदेच्या कामकाजात अत्यंत सक्रिय सहभाग नोंदवत सर्वच आघाड्यांवर लोकहित आणि देशहिताचे महत्त्वाचे मुद्दे अत्यंत प्रभावीपणे मांडले. त्यांच्या याच सातत्यपूर्ण आणि सर्वोत्तम कामगिरीसाठी त्यांना सलग दुसऱ्या वर्षी हा पुरस्कार जाहीर झाला असून, ही महाराष्ट्रासाठी आणि विशेषतः पुणेकरांसाठी अत्यंत अभिमानास्पद बाब ठरली आहे.
प्रा. डॉ. मेधा कुलकर्णी यांनी संसदेमध्ये रेल्वे प्रशासन, महिला सुरक्षा, आरोग्य व्यवस्था, ग्रामीण विकास, शिक्षण, सामाजिक न्याय आणि कॉर्पोरेट क्षेत्राशी संबंधित विविध महत्त्वाच्या विषयांवर सातत्याने मुद्देसूद आणि अभ्यासपूर्ण भाष्य केले आहे. संसदेच्या विशेष सत्रात, ‘झिरो अवर’ (शून्य प्रहर), प्रश्नोत्तरे आणि विविध विधेयकांवरील चर्चेत त्यांनी नेहमीच आक्रमक व सक्रिय सहभाग घेतला आहे.
नुकत्याच पार पडलेल्या संसदेच्या अधिवेशनात त्यांनी महिला सुरक्षा, विमा सुरक्षा, रेनवॉटर हार्वेस्टिंग (भूजल पुनर्भरण), विविध शासकीय सेवांमधील ओळख प्रमाणीकरण प्रक्रिया, आरटीई (RTE) अंतर्गत प्रवेश प्रक्रिया आणि शेतजमिनींचे प्रश्न यांसारख्या अत्यंत महत्त्वपूर्ण विषयांवर लक्षवेधी सूचना मांडून सरकारचे लक्ष वेधले होते.
पुरस्कार जाहीर झाल्यानंतर आपला आनंद व्यक्त करताना खासदार प्रा. डॉ. मेधा कुलकर्णी म्हणाल्या, “सलग दुसऱ्यांदा संसदरत्न पुरस्कार जाहीर होणे ही माझ्यासाठी अत्यंत आनंदाची आणि समाधानाची गोष्ट आहे. हा सन्मान केवळ माझा वैयक्तिक नसून, जनतेच्या आशा-आकांक्षा संसदेत प्रभावीपणे मांडण्याच्या माझ्या प्रामाणिक प्रयत्नांचा हा गौरव आहे. लोकशाहीत कोणत्याही लोकप्रतिनिधीची खरी ओळख ही त्याच्या सभागृहातील कृतिशीलतेत आणि जागरूकतेत असते. मला मिळालेला हा पुरस्कार म्हणजे जनतेच्या अथांग आशीर्वादाची पोचपावती आहे. यापुढेही संसदेत लोकहितासाठी अधिक परखडपणे आणि तत्परतेने भूमिका मांडत राहीन.”
© २०२६ मॅक्स मंथन डेली न्यूज. सर्व हक्क राखीव.
