अभिषेक, रक्तदान अन् वायसीएम रुग्णालयात फळवाटप! पिंपरी-चिंचवडमध्ये मनसे अध्यक्ष राजसाहेब ठाकरे यांचा वाढदिवस विविध सामाजिक उपक्रमांनी उत्साहात साजरा
पिंपरी चिंचवड प्रतिनिधी आकाश कांबळे, १६ जून २०२६ मॅक्स मंथन डेली न्यूज:
पिंपरी: महाराष्ट्र नवनिर्माण सेनेचे संस्थापक-अध्यक्ष माननीय राजसाहेब ठाकरे यांच्या वाढदिवसाचे औचित्य साधून पिंपरी-चिंचवड शहर मनसेच्या वतीने रविवारी (दि. १४ जून) संपूर्ण शहरात विविध सामाजिक आणि लोकोपयोगी उपक्रमांचे आयोजन करण्यात आले होते. मनसे शहराध्यक्ष सचिन चिखले यांच्या मार्गदर्शनाखाली मोरया गोसावी मंदिरात महाअभिषेक, वायसीएम रुग्णालयातील रुग्णांना फळवाटप आणि भव्य रक्तदान शिबिराचे आयोजन करून मनसैनिकांनी अत्यंत उत्साहात आणि सामाजिक बांधिलकी जपत आपल्या लाडक्या नेत्याचा वाढदिवस साजरा केला.
रविवारी सकाळी ठीक ८:०० वाजता चिंचवड गाव येथील ऐतिहासिक व अत्यंत जागृत श्री मोरया गोसावी मंदिरात सर्व मनसैनिकांच्या उपस्थितीत महापूजा व अभिषेक संपन्न झाला. यावेळी मनसे अध्यक्ष राजसाहेब ठाकरे यांना उत्तम आरोग्य लाभो आणि त्यांना दीर्घायुष्य लाभो, अशी आग्रही प्रार्थना मोरया गोसावी चरणी करण्यात आली. या धार्मिक विधीत शहरातील अनेक प्रमुख पदाधिकाऱ्यांनी सहभाग घेतला होता.
यानंतर सकाळी १०:०० वाजता पिंपरी-चिंचवड महानगरपालिकेच्या यशवंतराव चव्हाण स्मृती (वायसीएम) रुग्णालयामध्ये उपचार घेत असलेल्या गरजू रुग्णांना मनसेच्या वतीने ताजी फळे वाटप करून त्यांच्या आरोग्यासाठी सदिच्छा व्यक्त करण्यात आल्या. रुग्णालयातील रुग्णांनी आणि त्यांच्या नातेवाईकांनी मनसेच्या या उपक्रमाचे मनापासून स्वागत केले.
तसेच पक्षाच्या भोसरी-मोशी शाखेच्या वतीने भव्य रक्तदान शिबिराचे आयोजन करण्यात आले होते. ‘रक्तदान हेच सर्वश्रेष्ठ दान’ हा संदेश देत अनेक तरुण मनसैनिक आणि स्थानिक नागरिकांनी या शिबिरात उत्स्फूर्तपणे सहभाग घेऊन रक्तदान केले. साचलेले रक्त गरजेच्या वेळी रुग्णांना मोफत उपलब्ध करून दिले जाणार आहे.
या वाढदिवस सप्ताहाचे औचित्य साधून येत्या २१ जून २०२६ रोजी निगडी, प्रभाग क्रमांक १३ येथे इयत्ता १० वी आणि १२ वीच्या परीक्षेत घवघवीत यश संपादन करणाऱ्या गुणवंत विद्यार्थ्यांसाठी विशेष सत्कार सोहळ्याचे आयोजन करण्यात आले आहे. या सोहळ्यात विद्यार्थ्यांना शालेय साहित्यासह सन्मानचिन्ह देऊन गौरविण्यात येणार असल्याची माहिती शहराध्यक्ष सचिन चिखले यांनी दिली.
शहराध्यक्ष सचिन चिखले यांच्या नेतृत्वाखाली पार पडलेल्या या सर्व उपक्रमांमध्ये मनसेचे अनेक प्रमुख पदाधिकारी व कार्यकर्ते खांद्याला खांदा लावून सहभागी झाले होते. शैलेश पाटील, राजू साळवे, आकाश सागरे, परमेश्वर चिल्लरगे, संतोष यादव, विक्रम भोसले, सुनील कदम, नारायण पठारे, महादेव लोखंडे, सागर बहुले, दत्ता डांगे, जितेश वाल्हेकर, चेतन कुलकर्णी, जयसिंग भाट, शाखाध्यक्ष विक्रम भोसले, शाखाध्यक्ष चेतन कुलकर्णी, शाखाध्यक्ष सुनील कदम तसेच सचिन परांडे, निलेश घुले, सचिन तुपे, सुधीर वाळके आणि निलेश डफळ यांच्यासह शेकडो मनसैनिक व पदाधिकारी मोठ्या उत्साहाने उपस्थित होते.
© २०२६ मॅक्स मंथन डेली न्यूज. सर्व हक्क राखीव.
