पवना जलवाहिनी प्रकल्पाबाबत महापौर रवी लांडगे यांनी जिंकली मावळवासीयांची मने; मुंबईतील उच्चस्तरीय बैठकीपूर्वी धरणग्रस्तांशी सकारात्मक चर्चा, मुख्यमंत्र्यांकडे न्याय्य तोडग्यासाठी स्वतः करणार पाठपुरावा

पिंपरी चिंचवड प्रतिनिधी लक्षण प्रधान, २ जुलै २०२६ मॅक्स मंथन डेली न्यूज:

पिंपरी-चिंचवड: पिंपरी-चिंचवड शहराच्या भविष्यातील जलसुरक्षेसाठी अत्यंत महत्त्वाकांक्षी असलेल्या पवना बंदिस्त जलवाहिनी प्रकल्पावरून (Pawana Pipeline Project) मावळमधील शेतकरी आणि धरणग्रस्तांमध्ये असलेल्या असंतोषाची कोंडी फोडण्यात अखेर महापौर रवी लांडगे यांना मोठे यश आले आहे. मुंबईत उद्या (३ जुलै) होणाऱ्या मुख्यमंत्र्यांच्या उच्चस्तरीय बैठकीच्या अवघ्या एक दिवस आधी, महापौर रवी लांडगे यांनी अत्यंत संवेदनशील आणि कौशल्यापूर्ण नेतृत्व दाखवत पवना धरणग्रस्त संघटना व बंदिस्त जलवाहिनी विरोधी कृती समितीच्या पदाधिकाऱ्यांशी आज महापौर कार्यालयात सविस्तर व सकारात्मक चर्चा केली.

“पिंपरी-चिंचवडची पाणीसुरक्षा जेवढी महत्त्वाची आहे, तेवढाच मावळच्या शेतकऱ्यांचा आणि धरणग्रस्तांचा त्यागही मोठा आहे. त्यांच्या न्याय्य हक्कांचे संरक्षण करणे हे आमचे परमकर्तव्य आहे,” अशी अत्यंत समंजस आणि पालकत्वाची भूमिका घेत महापौरांनी मावळच्या शिष्टमंडळाला आश्वस्त केले. त्यांच्या या पुढाकारामुळे गेल्या अनेक वर्षांपासून रखडलेल्या या संवेदनशील विषयात संवादाचे एक नवे आणि सकारात्मक पर्व सुरू झाले असून, शहरासह मावळ तालुक्यात महापौरांची नेतृत्वप्रतिमा अधिक उंचावली आहे.

महापौर कार्यालयात झालेल्या या बैठकीत पवना धरणग्रस्त संघटना, जमीन हक्क परिषद आणि पवना बंदिस्त जलवाहिनी विरोधी कृती समितीच्या पदाधिकाऱ्यांनी प्रकल्पासंदर्भातील विविध हरकती, कायदेशीर शंका, पुनर्वसनाचे प्रलंबित प्रश्न आणि मागण्या महापौरांसमोर मांडल्या. कोणताही घाईगडबड न करता महापौर रवी लांडगे यांनी धरणग्रस्तांचा प्रत्येक मुद्दा अत्यंत संयमाने आणि गांभीर्याने ऐकून घेतला.

या चर्चेनंतर महापौरांनी तात्काळ धरणग्रस्तांच्या निवडक प्रतिनिधींना सोबत घेऊन पिंपरी-चिंचवड महानगरपालिकेचे आयुक्त डॉ. विजय सूर्यवंशी यांची भेट घेतली. आयुक्तांसोबत झालेल्या या तातडीच्या बैठकीत प्रकल्पग्रस्तांचे प्रलंबित प्रश्न, स्थानिकांच्या जमिनींचे हक्क आणि त्यांच्या भावना शासनापर्यंत कशा पोहोचवायच्या, यावर सविस्तर रणनीती आखण्यात आली.

उद्या मुंबईत मुख्यमंत्र्यांच्या अध्यक्षतेखाली होणाऱ्या महत्त्वपूर्ण बैठकीचा संदर्भ देत महापौर रवी लांडगे यांनी धरणग्रस्तांना आश्वस्त केले की, “उद्याच्या उच्चस्तरीय बैठकीत मावळच्या धरणग्रस्तांच्या आणि शेतकऱ्यांच्या सर्व मागण्या, सूचना आणि त्यांच्या भावना मी स्वतः मुख्यमंत्र्यांच्या निदर्शनास आणून देईन आणि तुमची भूमिका ठामपणे मांडेन. विकास हा लोकांच्या हितासाठी असतो, त्यांच्यावर अन्याय करून नाही. त्यामुळे सर्व संबंधितांना विश्वासात घेऊनच एक न्याय्य, सकारात्मक आणि सर्वमान्य सुवर्णमध्य (तोडगा) काढण्यासाठी मी शासन स्तरावर सर्व ताकद पणाला लावेन.”

महापौरांच्या या शब्दांमुळे आणि त्यांनी दाखवलेल्या संवेदनशीलतेमुळे धरणग्रस्त प्रतिनिधींमध्ये विश्वासाचे वातावरण निर्माण झाले आहे. संवादाच्या माध्यमातूनच कठीण प्रश्न सुटू शकतात, हा विश्वास महापौरांनी आपल्या कृतीतून सिद्ध केला आहे.

महापौरांसोबत झालेल्या या महत्त्वपूर्ण चर्चेत मावळ तालुक्यातील सर्वपक्षीय आणि विविध शेतकरी संघटनांचे प्रमुख पदाधिकारी उपस्थित होते. श्री. विश्वनाथ शेलार (अध्यक्ष, मावळ तालुका भारतीय किसान संघ तथा पवना बंदिस्त जलवाहिनी विरोधी कृती समिती), श्री. माऊली सोनवणे (अध्यक्ष, जमीन हक्क परिषद), श्री. नारायण बोдके (अध्यक्ष, पवना धरणग्रस्त संयुक्त समिती), श्री. बाळासाहेब काळे (सचिव, धरणग्रस्त संघटना, मावळ), श्री. यशवंत बोडके (गहुंजे ग्रामस्थ व किसान संघ सदस्य), श्री. माऊली दळवी (माजी सभापती, पंचायत समिती मावळ), श्री. सुभाष धामणकर (तालुका अध्यक्ष, भारतीय किसान मोर्चा, मावळ), श्री. राजू आगळे (माजी पंचायत समिती सदस्य, मावळ), श्री. अनंता महिपती खैरे (तिकोना धरणग्रस्त शेतकरी), श्री. अनंता वरवे (माजी सरपंच व गणाध्यक्ष, भाजप), ह.भ.प. शंकर महाराज आडकर (शिवली, मावळ), ह.भ.प. अनंता लायगुडे (आजीवली, मावळ) प्रमुख पदाधिकारी उपस्थित होते. शहराच्या पाणीप्रश्नासाठी मावळशी असलेले सलोख्याचे संबंध अधिक दृढ करत आणि शेतकऱ्यांना सन्मानाची वागणूक देत महापौर रवी लांडगे यांनी घेतलेला हा पुढाकार उद्याच्या मुंबईतील बैठकीत अत्यंत निर्णायक ठरणार आहे.

© २०२६ मॅक्स मंथन डेली न्यूज. सर्व हक्क राखीव.