एस.टी. महामंडळाच्या ७८ व्या वर्धापन दिनानिमित्त वल्लभनगर बस स्थानकात भव्य वृक्षारोपण! हरित व स्वच्छ पिंपरी-चिंचवडसाठी महापौर रवीभाऊ लांडगे यांचे पर्यावरण संवर्धनाचा संदेश
पिंपरी चिंचवड प्रतिनिधी लक्षण प्रधान , १५ जुलै २०२६ मॅक्स मंथन डेली न्यूज:
पिंपरी चिंचवड: सर्वसामान्यांची वाहिनी असलेल्या महाराष्ट्र राज्य मार्ग परिवहन महामंडळाच्या (एस.टी.) ७८ व्या वर्धापन दिनानिमित्त वल्लभनगर एस.टी. स्थानकाच्या प्रांगणात एक स्तुत्य आणि पर्यावरणपूरक उपक्रम राबवण्यात आला. वर्धापन दिनाचे औचित्य साधून स्थानक परिसरात भव्य वृक्षारोपण कार्यक्रम अत्यंत उत्साहपूर्ण वातावरणात पार पडला. पिंपरी-चिंचवड महानगरपालिकेचे महापौर मा. श्री. रवीभाऊ लांडगे यांच्या प्रमुख उपस्थितीत आणि शुभहस्ते हा वृक्षारोपण सोहळा संपन्न झाला असून, या माध्यमातून संपूर्ण शहराला पर्यावरण संवर्धन आणि हरित विकासाचा एक प्रभावी संदेश देण्यात आला.
यावेळी स्वतः वृक्षारोपण करून उपस्थितांशी संवाद साधताना महापौर रवी लांडगे यांनी पर्यावरण संरक्षणाची सामूहिक जबाबदारी अधोरेखित केली. ते म्हणाले, “वाढते शहरीकरण आणि वेगाने बदलते हवामान लक्षात घेता वृक्षारोपण व वृक्षसंवर्धन ही आजच्या काळाची सर्वात मोठी गरज बनली आहे. आज आपण लावलेले प्रत्येक झाड हे आपल्या उद्याच्या भावी पिढीसाठी दिलेली एक अमूल्य आणि निरोगी भेट ठरणार आहे. शहरातील प्रत्येक नागरिकाने आपल्या आयुष्यात किमान एक तरी वृक्ष लावून त्याचे प्रामाणिकपणे संगोपन करण्याचा संकल्प केला, तर हरित, स्वच्छ आणि प्रदूषणमुक्त पर्यावरणपूरक पिंपरी-चिंचवड घडविण्याचे आपले स्वप्न निश्चितच पूर्ण होईल.”
महापौरांनी पुढे बोलताना स्पष्ट केले की, पर्यावरणाचे संतुलन राखण्यासाठी शासन, प्रशासन आणि सामान्य जनता या तिन्हींनी एकत्र येऊन काम करणे गरजेचे आहे. वृक्ष लागवड ही केवळ एक दिवसाची औपचारिकता न राहता, त्या झाडांचे नियमित संगोपन आणि संवर्धन करणेही तितकेच महत्त्वाचे आहे.
एस.टी. महामंडळाच्या वतीने आयोजित या महत्त्वपूर्ण कार्यक्रमाला प्रशासकीय अधिकारी आणि सामाजिक कार्यकर्त्यांनी मोठी हजेरी लावली होती.
याप्रसंगी आगार व्यवस्थापक पल्लवी पाटील, स्थानक प्रमुख वैशाली कांबळे, कार्यशाळा प्रमुख राजगुरू, वाहतूक निरीक्षक कुलकर्णी, पर्यावरण जागर प्रतिष्ठानचे सचिव राजन जांभळे, अनंत तायडे यांच्यासह एस.टी. महामंडळाचे सर्व प्रशासकीय अधिकारी, कर्मचारी, चालक-वाहक आणि परिसरातील अनेक पर्यावरणप्रेमी नागरिक मोठ्या संख्येने उपस्थित होते.
वर्धापन दिनाच्या निमित्ताने लालपरीच्या आवारात राबवलेल्या या सुंदर उपक्रमाचे प्रवाशांकडून आणि नागरिकांकडून मोठ्या प्रमाणावर कौतुक केले जात असून, प्रत्येकाने वृक्षारोपण चळवळीत सक्रिय सहभाग घ्यावा, अशी भावना यावेळी व्यक्त करण्यात आली.
© २०२६ मॅक्स मंथन डेली न्यूज. सर्व हक्क राखीव.
