पिंपरी-चिंचवड: पिंपरी-चिंचवड पोलीस आयुक्तालयांतर्गत सांगवी विभागाच्या कार्यक्षमतेत वाढ घडवून आणण्यासाठी आणि नागरिकांना अधिक प्रभावी कायदा व सुव्यवस्था सेवा पुरवण्यासाठी नवीन सहायक पोलीस आयुक्त (ACP) सांगवी विभाग कार्यालयाची स्थापना करण्यात आली आहे. या नवीन कार्यालयाचा भव्य उद्घाटन समारंभ पोलीस आयुक्त विनय कुमार चौबे यांच्या शुभहस्ते फीत कापून व नामाभिधान फलकाचे अनावरण करून अत्यंत उत्साहात पार पडला.

या प्रसंगी बोलताना पोलीस आयुक्त विनय कुमार चौबे यांनी नवीन कार्यालयातील सर्व अधिकारी व कर्मचाऱ्यांना शुभेच्छा दिल्या. तसेच नागरिकांना अधिक सुलभ, पारदर्शक आणि जलद गतीने सेवा उपलब्ध करून देण्यासाठी सर्वांनी पूर्ण कार्यक्षमतेने आणि समर्पित भावनेने कार्य करावे, असे स्पष्ट निर्देश दिले. अद्ययावत सुविधा, सुबक कार्यालयीन वातावरण आणि आधुनिक कार्यप्रणालीमुळे नागरिकाभिमुख सेवा अधिक प्रभावी होईल, असा विश्वासही त्यांनी यावेळी व्यक्त केला.

या उद्घाटन सोहळ्यास पिंपरी-चिंचवड पोलीस दलातील वरिष्ठ अधिकाऱ्यांची मोठी उपस्थिती लाभली होती. पोलीस आयुक्त विनय कुमार चौबे, पोलीस सह-आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आव्हाड, अपर पोलीस आयुक्त (प्रादेशिक) डॉ. बसवराज तेली, पोलीस उपायुक्त संदीप आटोळे (परि-१), रोहिदास पवार (गुन्हे शाखा), प्रदीप जाधव (परि-२), मारुती जगताप (परि-३), विक्रांत देशमुख (वाहतूक शाखा), धीरज पाटील (विशेष शाखा), सहायक पोलीस आयुक्त मनीषा कदम (सांगवी विभाग), प्रशांत ढोले (पिंपरी विभाग) याशिवाय परिमंडळ-१ मधील सर्व वरिष्ठ पोलीस निरीक्षक, अधिकारी आणि सांगवी विभागातील कार्यालयीन कर्मचारी वर्ग या कार्यक्रमास मोठ्या संख्येने उपस्थित होता.