भोसरी: पिंपरी-चिंचवड शहरातील अत्यंत प्रतिष्ठेच्या आणि हाय व्होल्टेज मानल्या जाणाऱ्या भोसरी विधानसभा मतदारसंघातून एक खळबळजनक आकडेवारी समोर आली आहे. भोसरी मतदारसंघातील तब्बल १,७३,२०७ मतदारांची माहिती संकलित होऊ शकलेली नाही (असंकलनीय). उपलब्ध वर्गवारीनुसार यामध्ये १४,४०२ मृत, १,१७,११६ अनुपस्थित, २४,०६७ स्थलांतरित आणि ४,३८३ मतदार ‘इतर’ गटात दाखवण्यात आले आहेत.

विशेष म्हणजे, या चार आकड्यांची बेरीज १,५९,९६८ होत असल्याने एकूण १,७३,२०७ या घोषित आकड्यामध्ये उर्वरित १३,२३९ मतदारांबाबत अधिकृत स्पष्टीकरण मिळणे बाकी आहे. प्रशासनाने स्पष्ट केले आहे की, या मतदारांची नावे अद्याप अंतिम मतदार यादीतून वगळलेली नसून पडताळणीनंतरच अंतिम निर्णय होणार आहे. मात्र, एवढ्या मोठ्या प्रमाणावर मतदार ‘नाहीसे’ किंवा ‘अदृश्य’ झाल्याचे समोर आल्याने भोसरीतील राजकीय वर्तुळात तीव्र खळबळ उडाली आहे.

भोसरीचे विद्यमान आमदार महेश लांडगे यांनी २०१४ (अपक्ष), २०१९ (भाजपा) आणि २०२४ च्या विधानसभा निवडणुकीत सलग तीन पंचवार्षिक विजय मिळवून भोसरी विधानसभेवर आपले वर्चस्व सिद्ध केले आहे.  महेश लांडगे यांनी स्थानिक स्तरावर बांधलेला मजबूत जनसंपर्क, तळागाळातील कार्यकर्त्यांचे जाळे आणि भोसरी-चरहोली-मोशी-दिघी परिसरातील पायाभूत विकासकामांच्या जोरावर गेली १५ वर्षे विजयाची हॅटट्रिक साध्य केली आहे. भोसरीत १.७३ लाखांहून अधिक मतदार असंकलनीय किंवा अनुपस्थित आढळल्याने, आगामी निवडणुकांमध्ये या मोठ्या बदलाचा परिणाम कोणाच्या पथ्यावर पडणार आणि कोणाचे गणित बिघडवणार? यावर राजकीय विश्लेषकांमध्ये मोठे विचारमंथन सुरू झाले आहे.

एवढ्या मोठ्या संख्येने अनुपस्थित आणि स्थलांतरित मतदार दाखवले गेल्यामुळे दाट लोकवस्ती असलेल्या भोसरी, भोसरी एमआयडीसी आणि समाविष्ट गावांमध्ये बीएलओ (BLO) द्वारे राबवण्यात आलेल्या पडताळणी मोहिमेवर प्रश्नचिन्ह उपस्थित केले जात आहेत.

संबंधित मतदारांना आपले नाव मतदार यादीत कायम ठेवण्यासाठी आणि आवश्यक दुरुस्तीसाठी ‘फॉर्म ६’ भरण्याची संधी उपलब्ध आहे. या १.७३ लाख मतदारांच्या भवितव्यावर आणि अंतिम मतदार यादीवरच भोसरीच्या भावी राजकारणाची दिशा आणि आमदार महेश लांडगे यांच्या आगामी राजकीय समीकरणांचे भवितव्य ठरणार आहे.