पिंपरी / साते (मावळ): कृत्रिम बुद्धिमत्तेच्या (AI) युगात होत असलेल्या जलद बदलांवर चिकित्सक पद्धतीने लक्ष ठेवून विद्यार्थ्यांनी सातत्याने जिज्ञासा जपली पाहिजे, नवकल्पनांना प्रोत्साहन दिले पाहिजे आणि आधुनिक तंत्रज्ञानाचा सातत्याने अभ्यास केला पाहिजे. भारताला जागतिक तंत्रज्ञान क्षेत्रात नेतृत्व करण्याची मोठी संधी उपलब्ध असून त्यासाठी विद्यार्थ्यांनी नाविन्यपूर्ण दृष्टिकोन स्वीकारणे काळाची गरज आहे, असे ठाम प्रतिपादन क्रिस्टा चे सीनियर डायरेक्टर ऑफ इंजिनिअरिंग दीपक शिंगण यांनी केले.

पिंपरी-चिंचवड एज्युकेशन ट्रस्टच्या (PCET) साते (ता. मावळ) येथील पिंपरी-चिंचवड विद्यापीठात (PCU) स्कूल ऑफ कॉम्प्युटर ॲप्लिकेशन्सच्या शैक्षणिक वर्ष २०२६-२७ मधील प्रथम वर्षाच्या विद्यार्थ्यांसाठी ‘दीक्षारंभ’ (Induction Program) सोहळ्याचे आयोजन करण्यात आले होते. त्या प्रसंगी ते प्रमुख पाहुणे म्हणून बोलत होते. या दीक्षारंभ सोहळ्यात उद्योग व शैक्षणिक क्षेत्रातील दिग्गजांनी विद्यार्थ्यांना मार्गदर्शन केले.

भविष्यातील डिजिटल युगात सायबर सुरक्षेचे महत्त्व अधोरेखित करत त्यांनी भारतासाठी स्वदेशी सायबर सुरक्षा उपाय विकसित करण्याची गरज व्यक्त केली. विद्यार्थ्यांनी मजबूत प्रोग्रामिंग कौशल्ये, मूलभूत संकल्पनांवर प्रभुत्व आणि समस्यांकडे जिज्ञासूपणे पाहण्याची वृत्ती विकसित करावी, असा सल्ला त्यांनी दिला. – विजेंद्र यादव (सह-संस्थापक, अक्कॉप्स सिस्टीम्स)

तांत्रिक कौशल्यांसोबतच सातत्याने शिकणे, आवश्यकतेनुसार जुन्या पद्धती विसरून नव्या पद्धती स्वीकारणे (Learn, Unlearn and Re-learn) हीच यशस्वी व्यावसायिकाची ओळख असल्याचे सांगत विद्यार्थ्यांनी बदलांसाठी सदैव तयार राहावे, असे आवाहन केले. – डॉ. महेंद्र रामदासी (सीनियर व्हाइस प्रेसिडेंट, स्केल्ड एजिल ट्रान्सफॉर्मेशन)

पीसीईटीच्या ३५ वर्षांहून अधिक शैक्षणिक परंपरेचा उल्लेख करत, उद्योगभिमुख अभ्यासक्रम, जपानी व कोरियन उद्योगांसोबतचे सहकार्य आणि कौशल्याधारित शिक्षणाचा लाभ घेऊन विद्यार्थ्यांनी स्वतःला जागतिक पातळीवर सक्षम बनवावे, असे सांगितले. – डॉ. संतोष सोनवणे (कुलगुरू, PCU)

हॅकेथॉन, क्लाउड कॉम्प्युटिंग, डेटा सायन्स व उद्योगमान्य प्रमाणपत्र अभ्यासक्रमांचा लाभ घेत यशस्वी करिअर घडवण्याचे आवाहन त्यांनी केले. – डॉ. कमलेश मेश्राम (प्रमुख, स्कूल ऑफ कॉम्प्युटर ॲप्लिकेशन्स)

या प्रसंगी शैक्षणिक क्षेत्रात उत्कृष्ट कामगिरी करणाऱ्या गुणवंत विद्यार्थ्यांचा विशेष सत्कार करण्यात आला. हा कार्यक्रम पीसीईटीचे विश्वस्त व कुलपती हर्षवर्धन पाटील, अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, व्यवस्थापन समिती सदस्य अजिंक्य काळभोर, नरेंद्र लांडगे, कार्यकारी संचालक डॉ. गिरीश देसाई, कुलसचिव डॉ. अनिल महेश्वरी यांच्या मार्गदर्शनाखाली अत्यंत उत्साहात पार पडला.