पिंपरी-चिंचवड : महानगरपालिकेतील सत्ताधारी भाजपचे सभागृह नेते प्रशांत शितोळे यांच्या कथित मनमानी आणि हुकूमशाही कारभाराला आता विरोधकांसोबतच सत्ताधारी पक्षातील नगरसेवकही पूर्णपणे कंटाळल्याचे उघड झाले आहे. महापालिकेतील विविध वैधानिक समित्यांना डावलून परस्पर निर्णय घेण्याच्या शितोळे यांच्या कार्यपद्धतीमुळे पालिकेतील वातावरण चांगलेच तापले आहे. प्रशासकीय पदोन्नतीच्या विषयात विधी समितीच्या अधिकारक्षेत्रावर थेट अतिक्रमण करून प्रशांत शितोळे यांनी ६३ जणांच्या नियुक्त्यांचा विषय महापालिका सभेत परस्पर मंजूर करून घेतल्याची जोरदार चर्चा रंगली आहे. या एकतर्फी कारभाराला कंटाळून संतप्त झालेल्या विधी समितीतील सदस्यांनी आता थेट राजीनाम्याचा पवित्रा घेतला आहे.

महापालिकेच्या विषयपत्रिका व प्रशासकीय चौकटीनुसार पदोन्नती आणि विधीविषयक धोरणात्मक बाबींचा निर्णय हा सर्वप्रथम विधी समितीच्या पटलावर येणे कायदेशीर व वैधानिकदृष्ट्या आवश्यक असते. मात्र, सभागृह नेते प्रशांत शितोळे यांनी विधी समितीला पूर्णपणे अंधारात ठेवत महापालिकेच्या सर्वसाधारण सभेत स्वतःच्या अधिकारात वारेमाप उपसूचना दिल्या आणि ६३ कर्मचाऱ्यांच्या पदोन्नती व नियुक्तीचा विषय घाईघाईने मंजूर करून घेतला.

या प्रकारामुळे विधी समितीच्या अस्तित्वावरच प्रश्नचिन्ह निर्माण झाले आहे. “जर विधी समितीच्या अधिकारक्षेत्रातील विषय समितीलाच माहीत नसतील आणि परस्पर महापालिका सभेत विषय मंजूर करून सदस्यांना गृहीत धरायचे असेल, तर मग या विधी समितीची गरजच काय?” असा संतप्त सवाल समितीच्या सदस्यांकडून विचारला जात आहे.

प्रशांत शितोळे यांच्या या मनमानी आणि मनमोकळ्या कारभारामुळे अत्यंत दुखावलेल्या विधी समितीच्या सदस्यांनी आपल्या भावनांना वाट मोकळी करून दिली आहे. मिळालेल्या विश्वसनीय माहितीनुसार, विधी समितीतील सदस्यांनी आपल्या पदाचे राजीनामे देण्याची तयारी दर्शवली असून, पक्षातील वरिष्ठ स्थानिक नेत्यांना तसे थेट मेसेजही पाठवले आहेत. यामुळे शहरातील राजकीय वर्तुळात आणि भाजपच्या गोटात मोठी खळबळ उडाली आहे.

पिंपरी-चिंचवड महापालिकेतील कोणत्याही वैधानिक समितीला स्वतंत्रपणे काम करू न देणे, अध्यक्षांना व सदस्यांना विचारात न घेता परस्पर निर्णय लादणे आणि पक्षातील इतर नगरसेवकांवर वर्चस्व गाजवणे, या प्रशांत शितोळे यांच्या वर्तणुकीमुळे सत्ताधारी भाजपमधील नगरसेवकांमध्ये प्रचंड नाराजी पसरली आहे. विरोधकांनी तर शितोळे यांच्यावर लोकशाही आणि प्रशासकीय नियमांची पायमल्ली केल्याचा आरोप आधीच केला होता, परंतु आता स्वपक्षीय नगरसेवकही त्यांच्याविरोधात उघडपणे बोलू लागल्याने प्रशांत शितोळे यांची प्रतिमा कमालीची मलीन झाली आहे.

महापालिकेच्या सर्वसाधारण सभेत उपसूचनांचा खेळ करून वैधानिक समित्यांचे अधिकार पायदळी तुडवण्याच्या या पद्धतीमुळे पिंपरी-चिंचवड पालिकेतील सत्ताधाऱ्यांमधील अंतर्गत कलह आता रस्त्यावर आला आहे.