सांगवी: सांगवी परिसरात रविवारी गणेश विसर्जन मिरवणूक ढोल-ताशे, लेझीम आणि पारंपरिक वाद्यांच्या गजरात उत्साहात पार पडली असली, तरी सायंकाळच्या टप्प्यात अनेक गणेश मंडळांनी पोलिसांच्या सूचना धुडकावून लावत केलेल्या ‘डी.जे.’च्या दणदणाटाने विसर्जन मिरवणुकीला गालबोट लावले. जुनी व नवी सांगवी परिसरात कानठळ्या बसविणाऱ्या आणि नियमांचे उल्लंघन करणाऱ्या ध्वनिक्षेपकांमुळे लहान मुले, ज्येष्ठ नागरिक, महिला आणि आजारी व्यक्तींचे प्रचंड हाल झाले असून स्थानिक नागरिकांमधून तीव्र संताप व्यक्त केला जात आहे.

सकाळपासूनच वेताळबाबा नदी घाटावर बाप्पाला निरोप देण्यासाठी भाविकांची मोठी गर्दी झाली होती. अनेक गणेशभक्तांनी महापालिकेच्या वतीने उभारण्यात आलेल्या कृत्रिम तलावांमध्ये पर्यावरणपूरक पद्धतीने श्रींचे विसर्जन केले. वेताळबाबा घाटावर महापालिका कर्मचारी, स्वयंसेवक आणि पोलीस प्रशासनाचा कडक बंदोबस्त तैनात करण्यात आला होता.

सायंकाळी सुरू झालेल्या मुख्य मिरवणुकीत विविध गणेश मंडळांनी आकर्षक सजावट, झगमगती विद्युत रोषणाई आणि सामाजिक प्रबोधन करणारे जिवंत देखावे सादर केले. मात्र, काही मंडळांच्या अतिउंच देखाव्यांमुळे मुख्य रस्त्यांवर वाहतुकीचा मोठा अडथळा निर्माण झाला होता.

विशेष म्हणजे, पोलीस प्रशासनाने मिरवणुका ‘डी.जे.मुक्त’ आणि शिस्तबद्ध करण्याचे स्पष्ट आवाहन केले होते. मात्र, बहुतांश मंडळांनी या आवाहनाला साफ डावलून मोठ्या आवाजात डी.जे. आणि साउंड सिस्टीमचा बेधडक वापर केला. डी.जे.च्या भीषण आवाजामुळे शांतताप्रिय सांगवीकर अक्षरशः त्रस्त झाले. समाधानकारक बाब म्हणजे, मागील वर्षाच्या तुलनेत यंदा लेझर बीम लाईट्सचा वापर कमी प्रमाणात पाहायला मिळाला.

कानठळ्या बसवणाऱ्या या ध्वनिप्रदूषणावर सांगवीतील नागरिकांनी अत्यंत तीव्र शब्दांत नाराजी व्यक्त केली आहे. “गणेशोत्सव हा श्रद्धा आणि भक्तीचा सण आहे. डी.जे.च्या कर्णकर्कश आवाजाऐवजी पारंपरिक ढोल-ताशे, भजन-कीर्तन, लेझीम व सांस्कृतिक वाद्यांच्या साथीनेच मिरवणुका भक्तिमय आणि शिस्तबद्ध वातावरणात पार पडल्या पाहिजेत,” अशी आग्रही अपेक्षा नागरिकांनी व्यक्त केली.

मिरवणुकीदरम्यान कायदा व सुव्यवस्था राखण्यासाठी पोलीस प्रशासनाने अतिरिक्त बंदोबस्त ठेवला होता, तर स्वच्छता व गर्दी नियंत्रणासाठी महापालिका पथक आणि स्थानिक स्वयंसेवकांनी परिश्रम घेतले.