पिंपरी (मॅक्स मंथन डेली न्यूज): पिंपरी-चिंचवड शहरातील सार्वजनिक वाहतुकीसाठी बस रॅपिड ट्रान्झिट सिस्टम (बीआरटीएस) एक अत्यंत उपयुक्त पर्याय ठरत आहे. दररोज सुमारे २ लाख ४० हजार प्रवासी या सेवेचा लाभ घेत आहेत, अशी माहिती समोर आली आहे.
पुणे महानगर क्षेत्रातील एकूण ११ लाख पीएमपीएमएल प्रवाशांपैकी सुमारे २२ टक्के प्रवासी केवळ पिंपरी चिंचवड महानगरपालिका हद्दीतील बीआरटीएस कॉरिडॉरचा वापर करतात. पीएमपीएमएलच्या आकडेवारीनुसार, सध्या बीआरटीएस मार्गांवर दररोज २ लाख ४० हजार प्रवाशांची वाहतूक होते. यामुळे ही सेवा शहरासाठी एक अत्यावश्यक सार्वजनिक वाहतूक सेवा बनली आहे.
पाच बीआरटीएस कॉरिडॉर शहराची जीवनरेखा:
पिंपरी चिंचवड शहरात सध्या निगडी-दापोडी, दिघी-आळंदी, सांगवी-किवळे, काळेवाडी-चिखली आणि नाशिक फाटा-वाकड असे एकूण पाच बीआरटीएस कॉरिडॉर कार्यरत आहेत. हे कॉरिडॉर शहराच्या पूर्व-पश्चिम आणि उत्तर-दक्षिण भागांतील महत्त्वाच्या जवळपास १११ मार्गांना जोडतात. त्यामुळे ही सेवा शहराच्या सार्वजनिक वाहतूक व्यवस्थेचा कणा ठरत आहे. शहरातील अंदाजे ९६ टक्के लोकसंख्या बस थांब्याच्या ५०० मीटरच्या आत राहते. बीआरटीएसच्या स्वतंत्र मार्गिका आणि गर्दीच्या वेळी दर दीड ते सहा मिनिटांच्या बस फ्रिक्वेन्सीमुळे प्रवासाचा वेळ कमी होत असल्याने प्रवासी या सेवेला अधिक पसंती देत आहेत. तसेच, बसला गर्दी होत असल्याने रस्त्यांवरील वाहतूक कोंडी कमी होण्यासही मदत होत आहे.
वाहतूक सेवेची क्षमता वाढवणार:
पिंपरी-चिंचवड महानगरपालिकेने सार्वजनिक वाहतूक ताफ्यात वाढ करण्याची प्रक्रिया सुरू केली आहे. विविध योजनांतर्गत एकूण २४०० बस पीएमपीएमएलच्या ताफ्यात समाविष्ट केल्या जाणार आहेत. यात पीएमपीएमएलने खरेदी केलेल्या ४०० नवीन सीएनजी बसेस, पीएमआरडीएकडून मिळणाऱ्या ५०० बसेस आणि पुणे व पिंपरी-चिंचवड महापालिकांच्या मदतीने उपलब्ध होणाऱ्या आणखी ५०० बसेसचा समावेश आहे. याव्यतिरिक्त, केंद्र सरकारच्या योजनांतून आणखी १००० बस मिळण्याची शक्यता आहे.
गृहनिर्माण व शहरी व्यवहार मंत्रालयाच्या सूचनेनुसार, पुणे आणि पिंपरी चिंचवडसारख्या शहरांना २०२१ पर्यंत ८१०० बसेस सार्वजनिक वाहतुकीसाठी उपलब्ध करणे आवश्यक आहे. त्या दृष्टीनेही नियोजन सुरू आहे.
कॉरिडॉरनुसार प्रवाशांची संख्या:
- निगडी–दापोडी कॉरिडॉर: दररोज १,८०० हून अधिक फेऱ्या; ९० हजारांहून अधिक प्रवासी.
- दिघी-आळंदी कॉरिडॉर: दररोज १,१०० हून अधिक फेऱ्या; ६५,८०० हून अधिक प्रवासी.
- सांगवी-किवळे कॉरिडॉर: दररोज १,१०० हून अधिक फेऱ्या; ५९,५०० हून अधिक प्रवासी.
- काळेवाडी–चिखली कॉरिडॉर: दररोज १९ हजारांहून अधिक प्रवासी.
- नाशिक फाटा-वाकड कॉरिडॉर: दररोज १०,६०० हून अधिक प्रवासी.
पाच कॉरिडॉरवर मिळून दररोज सुमारे ४,६०० बस फेऱ्या होतात आणि एकूण प्रवासी संख्या २ लाख ४५ हजार आहे.
पिंपरी चिंचवडचे आयुक्त शेखर सिंह म्हणाले, “शहराचा वाढता विस्तार पाहता बीआरटीएस सेवा अत्यावश्यक आहे. लाखो लोक दररोज याचा लाभ घेत आहेत. आगामी काळात कॉरिडॉरचा विस्तार आणि बस संख्या वाढवण्यावर आमचा भर असेल.”
सह शहर अभियंता बापू गायकवाड यांनी सांगितले, “बीआरटीएस जास्त जागा व्यापते असे वाटत असले तरी, आकडेवारी वेगळे चित्र दाखवते. निगडी-दापोडी मार्गावर फक्त १५ टक्के जागा वापरली जाते, जिथे दर तासाला ५,६०० प्रवासी लाभ घेतात. तर मिश्र वाहतुकीसाठी असलेल्या ५२ टक्के जागेवर फक्त ७,२०० प्रवासी प्रवास करतात.”
