दलित महिलेवरील अन्यायाविरोधात मुर्तीजापूर पेटले: पॅंथर सेनेचे महाधरणे, राज्यव्यापी आंदोलनाचा इशारा!

दलित महिलेवर अन्यायाविरोधात मुर्तीजापूरमध्ये पॅंथर सेनेचे आंदोलन: ऊर्जा मंत्र्यांनी लक्ष घालण्याची मागणी!

‘ऑल इंडिया पॅंथर सेने’ची आक्रमक भूमिका; बबिता आठवले यांच्या बदलीविरोधात महाधरणे व निदर्शन आंदोलन!

अकोला, दि. ११ जुलै २०२५ प्रतिनिधी : विलास सावळे: मूर्तिजापूर तालुक्यातील एका दलित महिलेवर होत असलेल्या अन्यायाच्या विरोधात ऑल इंडिया पॅंथर सेनेने आक्रमक भूमिका घेतली आहे. राष्ट्रीय अध्यक्ष दीपक भाई केदार, महाराष्ट्र अध्यक्ष विनोद भाई भोळे, विदर्भ अध्यक्ष दादासाहेब ढोले यांच्या मार्गदर्शनाखाली आणि अकोला जिल्हाध्यक्ष परवेज खान यांच्या नेतृत्वात आज (शुक्रवार, ११/७/२५ रोजी) सकाळी ११ वाजल्यापासून उपकार्यकारी अभियंता, महाराष्ट्र राज्य विद्युत वितरण कंपनी, मूर्तिजापूर कार्यालयासमोर महाधरणे व निदर्शन आंदोलन, ‘दलित महिला अस्तित्व बचाव आंदोलन’ करण्यात आले. ऊर्जा मंत्र्यांनी या प्रकरणात लक्ष घालून न्याय मिळवून देण्याची मागणी जिल्हाध्यक्ष परवेज खान यांनी केली आहे.

नेमके काय आहे प्रकरण?

बबिता राहुल आठवले (वरिष्ठ तंत्रज्ञ, सी.पी.एफ. नंबर २६०३१८७) या माना सेंटर उपविभाग, मूर्तिजापूर येथे कार्यरत आहेत. गेल्या चार-पाच वर्षांपासून त्या विद्युत वितरण कंपनीची कामे करत आहेत. मात्र, त्यांच्याविरोधात षडयंत्र रचून खोट्या तक्रारी दाखल करण्यात आल्याचा आरोप ‘ऑल इंडिया पॅंथर सेने’ने केला आहे. माना कक्ष येथील कनिष्ठ अभियंता श्री. पी.जे. पातालबनसी यांनी हेतुपरस्पर त्यांना मानसिक, आर्थिक, भावनिक त्रास देऊन त्यांची बदली बाळापूर येथे केली असल्याचा आरोपही करण्यात आला आहे.

आंदोलकांनी दिलेल्या निवेदनात म्हटले आहे की, कनिष्ठ अभियंता पातालबनसी हे बबिता आठवले यांच्याकडूनच ११ kV माना फीडरवरील सर्व मेंटेनन्सची कामे करून घेतात आणि त्यांना सोबत कोणताही कर्मचारी देत नाहीत. महिला असूनही त्यांना रात्रीच्या वेळीसुद्धा ग्राहकांच्या तक्रारींसाठी एकट्यानेच एरियात मेंटेनन्सचे काम करावे लागते. स्टाफ देण्याची विनंती करूनही ती नाकारली जाते आणि नाहक त्रास दिला जातो. कनिष्ठ अभियंता यांच्याविरोधात असंख्य तक्रारी देऊनही कोणतीच दखल घेण्यात आली नाही. उलट, ऑफिसमध्ये एकटीचा गैरफायदा उचलून कामावरून काढून टाकण्याची, लांब बदली करण्याची, मेमो देण्याची, वेतन कपात करण्याची धमकी देत असतात. ग्राहकांचे अर्ज किंवा समस्या आले असता, वरिष्ठ अभियंता पातालबनसी ते अंगावर फेकतात आणि दलित महिलेवर अन्याय करत असतात. वरिष्ठांकडे तक्रार केल्यास बदली जिल्ह्याबाहेर करण्याची धमकी दिली जाते.

आंदोलकांच्या प्रमुख मागण्या:

ऑल इंडिया पॅंथर सेनेने आपल्या निवेदनात खालील प्रमुख मागण्या केल्या आहेत:

१. बबिता राहुल आठवले (वरिष्ठ तंत्रज्ञ, सी.पी.एफ. नं. २६०३१८७) यांची बाळापूर येथील बदली रोखण्यात यावी व बदलीचे पत्र रद्द करण्यात यावे. २. बबिता राहुल आठवले (वरिष्ठ तंत्रज्ञ) यांना स्थानिक मूर्तिजापूर विभागामध्येच नेमणूक देण्यात यावी. ३. कनिष्ठ अभियंता पी.जे. पातालबनसी यांना त्वरित निलंबित करण्यात यावे. ४. कनिष्ठ अभियंता पी.जे. पातालबनसी यांची जिल्ह्याबाहेर बदली करण्यात यावी. ५. कनिष्ठ अभियंता पी.जे. पातालबनसी यांनी केलेल्या उपविभागांमधील कामाची चौकशी करण्यात यावी व चौकशी समिती गठित करण्यात यावी. ६. दलित महिला बबिता आठवले (वरिष्ठ तंत्रज्ञ, माना कक्ष) यांना आत्मसन्मानपूर्वक वागणूक देण्यात यावी. ७. बबिता आठवले यांच्या विरोधात आलेल्या खोट्या तक्रारींची शहानिशा करण्यात यावी व चौकशी करण्यात यावी. ८. दिनांक १२/२/२५ व ३/६/२५ रोजी दिलेल्या अर्जांची चौकशी करण्यात यावी व कारवाई करण्यात यावी. ९. कनिष्ठ अभियंता पी.जे. पातालबनसी यांच्यावर कठोर कारवाई करण्यात यावी. १०. कनिष्ठ अभियंता पी.जे. पातालबनसी यांच्या दैनिक हजेरी रजिस्टरची तपासणी करण्यात यावी व सीसीटीव्ही फुटेज तपासण्यात यावे.

राज्यव्यापी आंदोलनाचा इशारा:

जिल्हाध्यक्ष परवेज खान यांनी इशारा दिला आहे की, जर त्यांच्या मागण्या पूर्ण झाल्या नाहीत, तर कार्यालयासमोर बबिता राहुल आठवले यांच्या परिवारासोबत ऑल इंडिया पॅंथर सेनेचे पदाधिकारी व कार्यकर्ते घेऊन आमरण उपोषण करण्यात येईल आणि हे आंदोलन राज्यव्यापी केले जाईल. यावेळी जिल्हा उपाध्यक्ष आरीफ शहा, जिल्हा उपाध्यक्ष संजय पावनमारे, तालुका महासचिव गंगाताई गवई, तालुका कार्याध्यक्ष शाहरुख शहा यांच्यासह अनेक पदाधिकारी व कार्यकर्ते उपस्थित होते.

© २०२५ मॅक्स मंथन डेली न्यूज. सर्व हक्क राखीव.