‘निसर्ग हा मानवाचा पहिला गुरू’: आर्य समाज पिंपरी येथे राज्यस्तरीय काव्य संमेलन आणि पुरस्कार सोहळा

ज्येष्ठ लेखिका वर्षाराणी मुस्कावाड यांचे प्रतिपादन; विविध क्षेत्रांतील मान्यवरांचा गौरव

१८ ऑगस्ट २०२५, मॅक्स मंथन डेली न्यूज:

पिंपरी, पुणे: ‘निसर्ग हा मानवाचा पहिला गुरू आहे आणि निसर्गाशी संवाद साधण्याचे काव्य लेखन हे एक उत्तम माध्यम आहे,’ असे प्रतिपादन नांदेड येथील ज्येष्ठ लेखिका वर्षाराणी मुस्कावाड यांनी केले. पिंपरी येथील आर्य समाज संस्थेतर्फे आयोजित रौप्य महोत्सवी राज्यस्तरीय श्रावणधारा कविसंमेलन आणि राज्यस्तरीय पुरस्कार सोहळ्यात त्या बोलत होत्या.

यावेळी नरवीर तानाजी मालुसरे यांच्या वंशज डॉ. शितल मालुसरे, उद्योजक श्रीहरी कुलकर्णी, आर्य समाज पिंपरीचे प्रमुख मुरलीधर सुन्दराणी यांच्यासह अनेक मान्यवर उपस्थित होते.

पुरस्कार प्रदान सोहळा

या सोहळ्यात विविध क्षेत्रांत उल्लेखनीय कार्य करणाऱ्या व्यक्तींना ‘राज्यस्तरीय समाजभूषण व कार्यगौरव पुरस्कार’ देऊन सन्मानित करण्यात आले:

• दत्ता सूर्यवंशी (क्रीडा)
• शुभांगी शिंदे (साहित्य)
• सुधीर फेंगसे (कामगार)
• नवनाथ मोरे (सामाजिक)
• मारुती बाणेवार (पत्रकारिता)
• सीमा गांधी (पर्यावरण)
• रवींद्र कुरवडे (औद्योगिक)
• वैजू चांदवले (कला)

कवींनी विविध विषयांवर केले काव्यवाचन

या कविसंमेलनात उपस्थित कवींनी श्रावणधारा, देशभक्ती, मानवी जीवन, राष्ट्रवाद, शेतकरी समस्या, भ्रष्टाचार, पर्यावरण आणि भारतीय संस्कृती अशा विविध सामाजिक विषयांवर प्रबोधनपर कविता सादर केल्या.

या कार्यक्रमाचे सूत्रसंचालन राजेंद्र सगर यांनी केले, तर उत्तम दंडीमे यांनी प्रास्ताविक केले आणि नलिनी देशपांडे यांनी उपस्थितांचे आभार मानले.

© 2025 मॅक्स मंथन डेली न्यूज. सर्व हक्क राखीव.