उमा बॅरेज प्रकल्पात कोट्यवधींचा महाघोटाळा?

पाटबंधारे विभागातील चार अधिकारी व तीन कंत्राटदारांवर गुन्हा दाखल; प्रशासनात खळबळ

२८ ऑगस्ट २०२५, मॅक्स मंथन डेली न्यूज:

अकोला, प्रतिनिधी : विलास सावळे – अकोला जिल्ह्यातील उमा बॅरेज प्रकल्पात कोट्यवधी रुपयांच्या महाघोटाळ्याची शक्यता व्यक्त होत असून, यामुळे संपूर्ण जिल्ह्यात एकच खळबळ उडाली आहे. विदर्भ पाटबंधारे विकास महामंडळाच्या अकोला सिंचन मंडळातील तत्कालीन चार वरिष्ठ अधिकारी आणि तीन कंत्राटदारांवर माना पोलीस ठाण्यात गंभीर गुन्हे दाखल करण्यात आले आहेत.

शासनाला करोडो रुपयांचे आर्थिक नुकसान

सहाय्यक अभियंता गौरव प्रकाशराव बोबडे यांनी दिलेल्या तक्रारीनुसार, १ मार्च २०११ ते ३१ मार्च २०१२ या कालावधीत उमा बॅरेज प्रकल्पातील गेट निर्मिती आणि उभारणीच्या कामात करारनाम्यानुसार जास्तीचे पैसे देऊन शासनाचे कोट्यवधींचे आर्थिक नुकसान केले असल्याचा आरोप आहे.

याप्रकरणी पोलिसांनी दिलेल्या माहितीनुसार, या घोटाळ्याची रक्कम तब्बल ९ कोटी रुपयांपेक्षा जास्त असण्याची शक्यता आहे. या घटनेने प्रशासनातही खळबळ उडाली असून, या प्रकरणाचा तपास आता अकोला आर्थिक गुन्हे शाखेकडे सोपवण्यात आला आहे. ठाणेदार गणेश नावकार यांच्या मार्गदर्शनाखाली या प्रकरणाची सखोल चौकशी सुरू आहे.

भ्रष्टाचाराचे मोठे जाळे उघडकीस

या प्रकरणामुळे पाटबंधारे विभागातील भ्रष्टाचाराचे मोठे जाळे उघडकीस आले असून, या प्रकरणात आणखी कोणकोण सामील आहे, हे तपासानंतरच स्पष्ट होईल. या मोठ्या गैरव्यवहारामुळे प्रशासनाच्या कामकाजावर प्रश्नचिन्ह उभे राहिले आहे. स्थानिक नागरिकांमध्ये या घटनेमुळे संतापाची लाट उसळली असून, लोकप्रतिनिधी यावर गप्प का, अशी चर्चाही सुरू झाली आहे.

© 2025 मॅक्स मंथन डेली न्यूज. सर्व हक्क राखीव.