दिव्यांग विद्यार्थ्यांच्या मागण्यांसाठी पुणे स्टेशनवर एल्गार! पिंपरी-चिंचवड शहर काँग्रेसचा आंदोलनाला जाहीर पाठिंबा

पुणे प्रतिनिधी लक्ष्मण प्रधान, १६ जून २०२६ मॅक्स मंथन डेली न्यूज:

पुणे: पुणे स्टेशन येथील समाज कल्याण आयुक्तांच्या कार्यालयासमोर विविध न्याय्य मागण्यांसाठी दृष्टिहीन व दिव्यांग विद्यार्थ्यांच्या वतीने सुरू करण्यात आलेल्या बेमुदत आंदोलनाला पिंपरी-चिंचवड शहर जिल्हा काँग्रेसने जाहीर आणि सक्रिय पाठिंबा दर्शवला आहे. काँग्रेसच्या एका उच्चस्तरीय शिष्टमंडळाने आज प्रत्यक्ष आंदोलनस्थळी भेट देऊन विद्यार्थ्यांच्या मागण्या समजून घेतल्या, तसेच या संदर्भात थेट दिव्यांग सक्षमीकरण आयुक्त सत्यजित बढे आणि समाज कल्याण आयुक्त श्रीमती दीपा मुधोळ-मुंडे यांची भेट घेऊन तात्काळ तोडगा काढण्याची आग्रही मागणी केली.

‘दृष्टी विश्व’ संस्था आणि दिव्यांग विद्यार्थ्यांच्या वतीने पुकारण्यात आलेल्या या आंदोलनामुळे पुण्यातील प्रशासकीय वर्तुळात मोठी खळबळ उडाली आहे.

सामाजिक न्याय विभागाने शासकीय वसतिगृह प्रवेश प्रक्रियेमध्ये लागू केलेले दिव्यांगांचे जाचक ‘समांतर आरक्षण’ (Parallel Reservation) तात्काळ रद्द करावे आणि त्याऐवजी स्वतंत्र ५ टक्के विशेष आरक्षण लागू करावे.  राज्य सरकारच्या प्रसिद्ध ‘स्वाधार’ योजनेमध्ये सर्व दिव्यांग विद्यार्थ्यांचा थेट समावेश करण्यात यावा किंवा त्याच धर्तीवर दिव्यांगांसाठी स्वतंत्र आर्थिक साहाय्य योजना सुरू करावी.  प्रादेशिक स्तरावर दिव्यांग विद्यार्थ्यांसाठी सर्व सोयी-सुविधांनी सज्ज अशी स्वतंत्र वसतिगृहे (Hostels) उभारण्यात यावीत.  दिव्यांग विद्यार्थी-विद्यार्थिनींच्या प्रलंबित समस्या सोडवण्यासाठी राज्याच्या मुख्यमंत्र्यांसोबत उपोषण शिष्टमंडळ समितीची तात्काळ उच्चस्तरीय बैठक आयोजित करावी.

आंदोलनाची गंभीर दखल घेत काँग्रेस पक्षाच्या शिष्टमंडळाने सर्वप्रथम दिव्यांग सक्षमीकरण आयुक्त सत्यजित बढे यांची प्रत्यक्ष भेट घेतली. या मागण्यांवर सकारात्मक चर्चा करताना आयुक्त बढे यांनी सांगितले की, “दिव्यांग विद्यार्थ्यांच्या वसतिगृह आणि आरक्षणाबाबतच्या मागण्यांचा सविस्तर प्रस्ताव आयुक्तालायाच्या स्तरावरून राज्य शासनाकडे आधीच मंजुरीसाठी पाठवण्यात आला आहे.”

तसेच, बढे यांनी याबाबतच्या अधिकृत पत्राची प्रत काँग्रेस शिष्टमंडळाकडे सुपूर्द केली आणि आंदोलनकर्त्या विद्यार्थ्यांची मनधरणी करण्यासाठी व त्यांच्याशी संवाद साधण्यासाठी तात्काळ आपले उपायुक्त भारत कांबळे यांना आंदोलनस्थळी पाठवले. मात्र, मागण्यांवर ठोस निर्णय होत नाही तोपर्यंत आंदोलन मागे घेणार नाही, अशी ठाम भूमिका दिव्यांग विद्यार्थ्यांनी घेतली.

विद्यार्थ्यांचे समाधान न झाल्याने काँग्रेसच्या शिष्टमंडळाने थेट समाज कल्याण आयुक्त श्रीमती दीपा मुधोळ-मुंडे यांची ‘बार्टी’ (BART) पुणे येथील कार्यालयात भेट घेतली व त्यांना सविस्तर मागण्यांचे निवेदन सादर केले. वसतिगृह प्रवेशातील समांतर आरक्षण रद्द करून विशेष आरक्षण देण्याची बाब त्यांच्या अखत्यारीत येत असल्याने, यावर लवकरच सकारात्मक तोडगा काढण्याचे आश्वासन आयुक्त दीपा मुधोळ-मुंडे यांनी शिष्टमंडळाला दिले.

या प्रसंगी दिव्यांग विद्यार्थ्यांचे मनोबल वाढवण्यासाठी आणि त्यांना कायदेशीर पाठबळ देण्यासाठी प्रख्यात कायदेतज्ज्ञ असीम सरोदे आणि त्यांचे सहकारी देखील आंदोलनस्थळी उपस्थित होते.

आपल्या हक्कासाठी रणरणत्या उन्हात आणि पावसात रस्त्यावर उतरलेल्या आंदोलक विद्यार्थ्यांमध्ये गौरव मालक, साबीर शेख, गणराज जाधव, शशिकांत शिंदे, सूरज रेपाळे, आणि शुभम नरोडे हे दिव्यांग तरुण अत्यंत खंबीरपणे सहभागी झाले आहेत.

दिव्यांग विद्यार्थ्यांच्या या लढ्याला बळ देण्यासाठी पिंपरी-चिंचवड काँग्रेसचे सर्व प्रमुख शिष्टमंडळ पुण्यातील आंदोलनस्थळी तळ ठोकून होते. यामध्ये प्रामुख्याने काँग्रेसचे शहराध्यक्ष नरेंद्र बनसोडे, काँग्रेसचे माजी सरचिटणीस जितेंद्र छाबडा, ज्येष्ठ नेते हरीश डोळस, संदीप शिंदे, आणि अनुसूचित जाती (SC) विभागाचे माजी अध्यक्ष विजय ओव्हाळ आदी मान्यवरांचा समावेश होता.

“जोपर्यंत या वंचित आणि दिव्यांग विद्यार्थ्यांना त्यांचे हक्क मिळत नाहीत, तोपर्यंत काँग्रेस पक्ष या विद्यार्थ्यांच्या खांद्याला खांदा लावून रस्त्यावरील लढ्यात सोबत राहील,” असा निर्धार शहराध्यक्ष नरेंद्र बनसोडे यांनी यावेळी व्यक्त केला.

© २०२६ मॅक्स मंथन डेली न्यूज. सर्व हक्क राखीव.

ढोल-ताशांचा गजर अन् लेझीमचा ताल! पिंपरी-चिंचवड मनपा शाळांमध्ये रंगला उत्साहपूर्ण ‘शाळा प्रवेशोत्सव’; पहिल्याच दिवशी नवे गणवेश, पुस्तके मिळताच विद्यार्थ्यांचा किलबिलाट

पिंपरी चिंचवड प्रतिनिधी लक्ष्मण प्रधान, १६ जून २०२६ मॅक्स मंथन डेली न्यूज:

पिंपरी: “भारत माता की जय” च्या गगनभेदी जयघोषात, ढोल-ताशांच्या दणदणाटात आणि लेझीमच्या पारंपरिक तालावर अत्यंत उत्साही आणि आनंदी वातावरणात पिंपरी-चिंचवड महानगरपालिकेच्या शाळांची घंटा अखेर वाजली. नवीन शैक्षणिक वर्षाची नवी उमेद आणि डोळ्यांत मोठी स्वप्ने घेऊन पहिल्याच दिवशी शाळेत पाऊल ठेवणाऱ्या चिमुकल्यांचे पालकांसह अत्यंत हर्षोल्हासात स्वागत करण्यात आले.

भोसरी येथील इंद्रायणीनगर पी.सी.एम.सी. पब्लिक स्कूलमध्ये महापौर रवि लांडगे यांनी तर पिंपळे गुरव येथील पी.सी.एम.सी. पब्लिक स्कूल क्रमांक ५४ येथे आमदार शंकर जगताप आणि महापालिका आयुक्त डॉ. विजय सूर्यवंशी यांनी सपत्निक उपस्थित राहून नवीन विद्यार्थ्यांचे औक्षण करून आणि गुलाबपुष्प देऊन शाळा प्रवेशोत्सव साजरा केला.

नवीन वर्षाच्या पहिल्या दिवशी विद्यार्थ्यांचे स्वागत करताना महापौर रवि लांडगे म्हणाले, “महानगरपालिकेच्या शाळांमध्ये शिक्षण घेणाऱ्या गरीब व मध्यमवर्गीय कुटुंबातील प्रत्येक विद्यार्थ्याला दर्जेदार शिक्षण, आधुनिक तंत्रज्ञान आणि सर्वांगीण विकासाच्या समान संधी उपलब्ध करून देण्यासाठी महापालिका प्रशासन सातत्याने कटीबद्ध आहे. नवीन शैक्षणिक वर्षाच्या पहिल्याच दिवशी विद्यार्थ्यांच्या चेहऱ्यावरील हा निखळ आनंद आणि उत्साह पाहून मनस्वी समाधान वाटते. हीच मुले उद्याच्या विकसित भारताची खरी शिल्पकार आहेत. विद्यार्थ्यांनी मनामध्ये कोणत्याही प्रकारची भीती न बाळगता आत्मविश्वासाने शिक्षण घ्यावे, जिज्ञासू वृत्ती जोपासावी आणि आपल्या कर्तृत्वाने संपूर्ण देशात शहराचे नाव उंचावावे.”

कार्यक्रमात मुख्य वक्ता म्हणून बोलताना आमदार शंकर जगताप यांनी शिक्षणाचे महत्त्व विषद केले. ते म्हणाले, “विकसित भारताचे स्वप्न साकार करायचे असेल तर शिक्षण संस्था अधिक बळकट कराव्या लागतील. मनपाच्या शाळांमधील शैक्षणिक गुणवत्ता आणि आधुनिक सुविधांमुळे आता पालकांचा सरकारी शाळांकडे पाहण्याचा दृष्टिकोन सकारात्मकतेने बदलत आहे. ही समाधानाची बाब असली तरी आपल्याला शिक्षणाची गुणवत्ता आणखी उंचावण्यासाठी शिक्षकांची संख्या वाढवणे, शाळांमधील ग्रंथालये अधिक सक्षम करणे आणि आवश्यक भौतिक सुविधा पुरवणे यावर विशेष भर द्यावा लागेल. शिक्षकांनी केवळ पाठ्यपुस्तकी ज्ञान न देता विद्यार्थ्यांचे सुदृढ व्यक्तिमत्त्व घडवावे. तसेच विद्यार्थ्यांनी केवळ अभ्यासापुरते मर्यादित न राहता खेळ, कला आणि उत्तम आरोग्याकडेही लक्ष द्यावे.”

महापालिका आयुक्त डॉ. विजय सूर्यवंशी यांनी आजच्या आधुनिक शिक्षण पद्धतीवर प्रकाश टाकला. ते म्हणाले, “आजची शिक्षण व्यवस्था अधिक आधुनिक, डिजिटल आणि विद्यार्थीकेंद्रित झाली आहे. मनपाच्या शाळांमध्ये देखील आता सुसज्ज प्रयोगशाळा, डिजिटल साधने आणि समृद्ध ग्रंथालये उपलब्ध आहेत. विद्यार्थ्यांनी या सर्व सुविधांचा पुरेपूर वापर करून स्वतःचा सर्वांगीण विकास साधावा. अभ्यास करताना मनात कोणतीही शंका आल्यास शिक्षकांना प्रश्न विचारण्यास अजिबात संकोच करू नका. कोणाला काय वाटेल याचा विचार न करता जे विद्यार्थी सतत प्रश्न विचारण्याची आणि उत्तरे शोधण्याची सवय लावतात, तेच पुढे जाऊन यशस्वी होतात. त्यामुळे शिक्षणाचा उद्देश केवळ परीक्षेत गुण मिळवणे नसून स्वतःचे सुसंस्कृत व्यक्तिमत्त्व घडवणे हा असला पाहिजे.”

या भव्य शाळा प्रवेशोत्सव उपक्रमात शहरातील विविध प्रभागांमध्ये अनेक लोकप्रतिनिधी व अधिकारी उपस्थित होते. त्यांची नावे खालीलप्रमाणे आहेत.

शिक्षण समिती सभापती रविना अंगोळकर, नगरसदस्य शशिकांत कदम, ज्ञानेश्वर जगताप, शकुंतला धराडे, शाम जगताप, नम्रता लोंढे, माजी नगरसदस्य सागर अंगोळकर, पल्लवी जगताप, विलास मडिगेरी, उप आयुक्त ममता शिंदे, जनता संपर्क अधिकारी प्रफुल्ल पुराणिक, मुख्याध्यापिका गीतांजली पोळ, आणि पर्यवेक्षक ज्योती तापकीर यांच्यासह मनपाचे सर्व संबंधित शिक्षक, पालक आणि शेकडो विद्यार्थी मोठ्या संख्येने उपस्थित होते.

कार्यक्रमादरम्यान आमदार शंकर जगताप आणि आयुक्त डॉ. विजय सूर्यवंशी यांच्या हस्ते इयत्ता पहिलीच्या वर्गात दाखल झालेल्या विद्यार्थ्यांना नवीन रंगीबेरंगी पाठ्यपुस्तके, आकर्षक गणवेश आणि शालेय साहित्याचे मोफत वाटप करण्यात आले.

पिंपरी-चिंचवड महानगरपालिकेच्या पी. सी. एम. सी. पब्लिक स्कूल, श्रीमती लीलाबाई क्रांतीलाल खिंवसरा मोहननगर मुले शाळा आणि थेरगाव शाळांमध्येही नवीन शैक्षणिक वर्षाचा प्रारंभ अत्यंत उत्साहात झाला. इयत्ता पहिलीमध्ये नवीन प्रवेश घेतलेल्या चिमुकल्यांना पहिल्याच दिवशी पाठ्यपुस्तके, गणवेश आणि गोड खाऊचे वाटप करण्यात आले.

या उपक्रमात अतिरिक्त आयुक्त कुलदीप जंगम, अतिरिक्त आयुक्त विक्रांत बगाडे, नगरसदस्या अरुणा लंगोटे, वैशाली काळभोर, उप आयुक्त संदीप खोत व इतर मान्यवर उपस्थित होते.

या प्रसंगी बोलताना अतिरिक्त आयुक्त कुलदीप जंगम यांनी विद्यार्थ्यांना मोलाचा सल्ला दिला की, “विद्यार्थ्यांनी आपले आई-वडील आणि शिक्षक जे सांगतात ते सर्व ऐकले व समजून घेतले, तर ते भविष्यात निश्चितच देशाचे आदर्श नागरिक बनतील.” तर अतिरिक्त आयुक्त विक्रांत बगाडे यांनी विद्यार्थ्यांना “शिक्षणासोबतच जीवनात चांगले संस्कार, कडक शिस्त आणि आपल्या जबाबदारीचे भान असणे किती महत्त्वाचे आहे,” हे सोप्या शब्दांत पटवून दिले.

© २०२६ मॅक्स मंथन डेली न्यूज. सर्व हक्क राखीव.

पवना नदीपात्र गिळंकृत करण्याचा भूमाफियांचा डाव! पिंपळे सौदागर पुलाजवळ राडारोडा टाकून पत्राशेडचे साम्राज्य; मनपा पर्यावरण विभागाच्या ‘अर्थपूर्ण’ दुर्लक्षावर प्रदीप गायकवाड आक्रमक

पिंपरी चिंचवड प्रतिनिधी आकाश कांबळे , १६ जून २०२६ मॅक्स मंथन डेली न्यूज:

पिंपरी: “पिंपरी-चिंचवड शहराची जीवनवाहिनी असलेल्या पवना नदीचे अस्तित्व धोक्यात आले आहे. पिंपळे सौदागर येथील पुलावरून पिंपरीकडे जाताना पवना नदीकिनारी अत्यंत नियोजनबद्ध रीतीने रात्री-अपरात्री शेकडो ट्रक राडारोडा (डेब्रिज) आणि भंगार माल टाकला जात आहे. या राडारोड्याचे सपाटीकरण करून चक्क नदीपात्रात नवी जमीन तयार केली जात असून, तेथे बेकायदेशीर पत्राशेड उभारून अवाढव्य व्यावसायिक गाळे सुरू करण्यात आले आहेत. यामुळे नदीचे नैसर्गिक पात्र अत्यंत अरुंद झाले असून पावसाळ्यात पिंपळे सौदागर आणि पिंपरी परिसराला पुराचा मोठा फटका बसण्याची भीती निर्माण झाली आहे. या सर्व प्रकाराकडे महापालिकेचे पर्यावरण विभाग प्रमुख संजय कुलकर्णी हे केवळ ‘अर्थपूर्ण’ विचाराने डोळेझाक करत आहेत,” असा थेट आणि जळजळीत आरोप राष्ट्रवादी काँग्रेस पार्टी (अजित पवार गट) अर्बन सेलचे शहराध्यक्ष प्रदीप गायकवाड यांनी केला आहे.

या संदर्भात प्रदीप गायकवाड यांनी मनपा आयुक्तांकडे लेखी तक्रार करून नदीपात्रातील अतिक्रमणांवर तात्काळ बुलडोझर चालवण्याची मागणी केली आहे, अन्यथा जनआंदोलन छेडण्याचा इशारा दिला आहे.

प्रदीप गायकवाड यांनी प्रसिद्धीस दिलेल्या पत्रकात शहरातील नद्यांच्या दुरवस्थेवर तीव्र चिंता व्यक्त केली आहे. ते म्हणाले, “हा केवळ पिंपळे सौदागर पुरता मर्यादित विषय राहिलेला नाही. पिंपरी-चिंचवडच्या हद्दीतून वाहणाऱ्या पवना, इंद्रायणी आणि मुळा या तिन्ही नद्यांच्या पात्रात आज राजरोसपणे राडारोडा टाकून भूखंड हडप करण्याचे सत्र सुरू आहे. नदीच्या पूररेषेच्या (Blue Line) आत कोणत्याही प्रकारचे पक्के किंवा तात्पुरते बांधकाम करण्यास कायद्याने कडक बंदी आहे. मात्र, भूमाफिया आणि मनपाच्या काही भ्रष्ट अधिकाऱ्यांच्या अभद्र युतीमुळे या कायद्याला केराची टोपली दाखवली गेली आहे. नदीपात्रात भंगार आणि राडारोडा टाकल्यामुळे नद्यांचे नैसर्गिक प्रदूषण वाढले असून येथील जलचर प्राणी आणि नदीकाठची समृद्ध जैवविविधता पूर्णपणे नष्ट झाली आहे.”

गायकवाड यांनी मनपाच्या पर्यावरण विभागाचे मुख्य अभियंता संजय कुलकर्णी यांच्या कार्यपद्धतीवर थेट हल्ला चढवला. ते म्हणाले, “नद्यांचे संवर्धन करणे आणि पर्यावरण जपण्याची ज्यांच्या खांद्यावर कायदेशीर जबाबदारी आहे, त्या पर्यावरण विभागाचे मुख्य कार्यकारी अधिकारी संजय कुलकर्णी यांना या भीषण ऱ्हासाशी काहीही देणेघेणे राहिलेले नाही. नदीकाठच्या जैवविविधतेचा खून होत असताना कुलकर्णी साहेब केबिनच्या बाहेर पडायला तयार नाहीत. या मागे केवळ आणि केवळ ‘मोठ्या आर्थिक देवाणघेवाणीचा’ संशय येत आहे. जर एखादा सामान्य नागरिक घराचे छोटेसे काम करत असेल तर तात्काळ धावून जाणारे मनपाचे पथक नदीपात्र बुजवून पत्राशेड उभारणाऱ्या बड्या भूमाफियांवर कारवाई का करत नाही? हे संशयास्पद आहे.”

शहरातील राजकीय व्यवस्थेवर आणि सत्ताधारी भारतीय जनता पक्षावर प्रहार करताना प्रदीप गायकवाड म्हणाले, “पिंपरी-चिंचवड महापालिकेत सत्ताधारी असलेल्या भारतीय जनता पक्षाच्या स्थानिक नेत्यांची आणि लोकप्रतिनिधींची अवस्था अत्यंत दयनीय झाली आहे. सत्ताधारी भाजपचे या मनपा प्रशासनावर आणि विशेषतः कुलकर्णी साहेबांपुढे काहीही चालत नाही, हीच या शहराची सर्वात मोठी शोकांतिका आहे. जर सत्ताधारी पक्षच अधिकाऱ्यांपुढे नतमस्तक झाला असेल, तर शहरातील सामान्य नागरिकांनी आणि पर्यावरणप्रेमींनी न्यायासाठी कोणाकडे दाद मागायची? अधिकाऱ्यांच्या मनमानी कारभारामुळे आज पिंपरी-चिंचवड बकाल शहराकडे वाटचाल करत आहे.”

राष्ट्रवादी काँग्रेस अर्बन सेलच्या वतीने महापालिका प्रशासनाला इशारा देण्यात आला आहे की, पिंपळे सौदागर येथील पवना नदीपात्रात अनधिकृतपणे राडारोडा टाकून तयार करण्यात आलेली बेकायदेशीर पत्राशेड व व्यवसाय २४ तासांच्या आत निष्कासित करावेत. तसेच संपूर्ण पवना, इंद्रायणी व मुळा नदीपात्रातील भरावाची सखोल चौकशी करून दोषींवर तात्काळ फौजदारी गुन्हे दाखल करावेत, अन्यथा नदी संवर्धनासाठी आणि शहरातील पर्यावरण रक्षणासाठी राष्ट्रवादी काँग्रेस पार्टी रस्त्यावर उतरून तीव्र आंदोलन छेडेल.

आपला विश्वासू, प्रदीप गायकवाड शहराध्यक्ष, अर्बन सेल राष्ट्रवादी काँग्रेस पार्टी (अजितदादा पवार गट), पिंपरी-चिंचवड.

© २०२६ मॅक्स मंथन डेली न्यूज. सर्व हक्क राखीव.

रावेत उर्फ ‘दुबई’ की कचऱ्याचे साम्राज्य? फुलजाई चौकात पाणी गळती अन् कचऱ्याच्या ढिगाऱ्यामुळे नागरिक त्रस्त; ‘ब’ क्षेत्रीय अधिकारी चंद्रकांत मुठाळ यांनी पाहणी करण्याची प्रदीप गायकवाड यांची मागणी

पिंपरी चिंचवड प्रतिनिधी बालाजी नवले, १६ जून २०२६ मॅक्स मंथन डेली न्यूज:

रावेत: “रावेत परिसरामध्ये गृहप्रकल्प उभारणारे बांधकाम व्यावसायिक ग्राहकांना सदनिका विक्री करताना ‘रावेत आता दुबईकडे वाटचाल करीत आहे’ अशा टोलेजंग जाहिराती करतात. मात्र, प्रत्यक्ष जमिनीवरची वस्तुस्थिती अत्यंत भीषण आणि बकाल आहे. रावेतमध्ये ठिकठिकाणी उखडलेले रस्ते, धुळीचे साम्राज्य, पदपथावरचे निखळलेले सिमेंटचे गट्टू, गतिरोधकांचा अभाव आणि कचऱ्याचे ढीग साचले आहेत. त्यातच पाण्याचा महत्त्वाचा व्हॉल्व्ह गळत असून त्याभोवती कचरा डेपो तयार झाला आहे. महापालिकेच्या ‘ब’ क्षेत्रीय कार्यालयाच्या मुख्य कार्यकारी अधिकाऱ्यांनी केवळ एसी कार्यालयात न बसता रावेतचा प्रत्यक्ष पाहणी दौरा करावा, तेव्हाच येथील खरी बकाल परिस्थिती त्यांच्या लक्षात येईल,” असा तीव्र संताप व्यक्त करत राष्ट्रवादी काँग्रेस पार्टी (अजितदादा पवार) अर्बन सेलचे शहराध्यक्ष प्रदीप गायकवाड यांनी प्रशासनाला घरघर लावली आहे.

रावेत येथील अत्यंत गजबजलेल्या शिंदे वस्तीमधील फुलजाई चौकात महानगरपालिकेच्या पाणीपुरवठा विभागाने लोखंडी जाळी टाकली आहे. या जाळीच्या खालून महापालिकेची मुख्य पाण्याची पाईपलाईन गेली असून, याच ठिकाणी पाण्याचा मुख्य व्हॉल्व्ह (Water Valve) देखील आहे. गेल्या तीन दिवसांपासून या महत्त्वाच्या व्हॉल्व्हमधून मोठ्या प्रमाणावर पाणी गळती सुरू आहे.

पाण्याचा हा अपव्यय सुरू असतानाच, स्थानिक दुकानदार, पथारी व्यावसायिक, हातगाडीवाले आणि काही बेशिस्त नागरिक स्वतःच्या दुकानातील व घरातील कचरा थेट या लोखंडी जाळीवर आणि आजूबाजूला टाकत आहेत. यामुळे या ठिकाणी कचऱ्याचे साम्राज्य निर्माण झाले असून दुर्गंधी सुटली आहे. शुद्ध पाण्याच्या पाईपलाईनजवळच साचलेल्या या कचऱ्यामुळे परिसरात नागरिकांचे आरोग्य धोक्यात आले आहे.

प्रदीप गायकवाड यांनी रावेतच्या दुरवस्थेवर बोट ठेवताना सांगितले की, “येथील अंतर्गत रस्ते केवळ आश्वासनांच्या गाजरांवर अडकले आहेत. रस्ते डांबरीकरण किंवा काँक्रिटीकरणाची कोणतीही ठोस उपाययोजना केली जात नाही. रस्त्यांवर धुळीचे साम्राज्य पसरले असून नागरिकांना आणि पादचाऱ्यांना चालणे असह्य झाले आहे. पदपथावरील सिमेंटचे गट्टू उखडले असून गतिरोधक नसल्यामुळे अपघातांचा धोका वाढला आहे. येत्या पावसाळ्यात या उखडलेल्या रस्त्यांवर चिखल आणि पाणी साचून नागरिकांचे अतोनात हाल होणार आहेत. अशा विचित्र परिस्थितीमुळे रावेतला ‘दुबई’ म्हणणे म्हणजे स्थानिक नागरिकांची चेष्टा करण्यासारखे आहे.”

या अत्यंत गंभीर समस्येची दखल घेऊन स्थानिक नागरिक आणि पादचाऱ्यांच्या वतीने राष्ट्रवादी काँग्रेस अर्बन सेलचे शहराध्यक्ष प्रदीप गायकवाड यांनी मनपाचे ‘ब’ क्षेत्रीय कार्यालयाचे मुख्य कार्यकारी अधिकारी श्री. चंद्रकांत मुठाळ यांच्याकडे लेखी मागणी केली आहे.

गायकवाड म्हणाले, “माझी मुठाळ साहेबांना कळकळीची विनंती आणि मागणी आहे की, त्यांनी स्वतः रावेतच्या या बकाल भागांची प्रत्यक्ष पाहणी करावी. प्रत्यक्ष पाहणी केल्यानंतरच त्यांना एसी केबिनच्या बाहेरची खरी परिस्थिती समजेल. प्रशासनाने तात्काळ फुलजाई चौकातील पाणी गळती थांबवून तिथला कचरा हटवावा आणि रावेतच्या रस्त्यांची कामे पावसाळ्यापूर्वी प्राधान्याने पूर्ण करावीत, अन्यथा तीव्र आंदोलन छेडले जाईल.”

आपला विश्वासू, प्रदीप गायकवाड शहराध्यक्ष, अर्बन सेल राष्ट्रवादी काँग्रेस पार्टी (मा. अजितदादा पवार गट), पिंपरी-चिंचवड.

© २०२६ मॅक्स मंथन डेली न्यूज. सर्व हक्क राखीव.

“भविष्यात भारतामध्ये ‘एआय’ क्षेत्रात गुंतवणुकीची आणि रोजगाराची मोठी लाट!” – करिअर मार्गदर्शक विवेक वेलणकर

पुणे प्रतिनिधी बालाजी नवले, १६ जून २०२६ मॅक्स मंथन डेली न्यूज:

पुणे: “आज जगभरात आर्टिफिशिअल इंटेलिजन्स (AI) बाबत मोठी उत्सुकता आणि काही प्रमाणात भीतीचे वातावरण असले, तरी भविष्यात ते मानवी जीवनाचा अविभाज्य भाग बनणार आहे. संगणक आणि मोबाईल ज्याप्रमाणे आपण सहजपणे स्वीकारले, तसेच एआय देखील आपल्या अंगवळणी पडेल. भारत देश सध्या एआयच्या वापरामध्ये जगात तिसऱ्या क्रमांकावर आहे. आयटी कंपन्या आणि त्यांच्याशी संबंधित अफाट सेवा भारतात सर्वाधिक असल्याने, पुढील काळात एआयशी संबंधित सर्वात जास्त रोजगार आणि गुंतवणूक आपल्या भारत देशातच होईल,” अशी खात्रीशीर अपेक्षा प्रसिद्ध करिअर मार्गदर्शक विवेक वेलणकर यांनी व्यक्त केली.

पुण्यातील ‘ॲस्पायर नॉलेज अँड स्किल्स’ आणि रायगड येथील ‘डॉ. बाबासाहेब आंबेडकर टेक्नॉलॉजिकल युनिव्हर्सिटी’ (बाटु) यांच्या संयुक्त विद्यमाने आयोजित करण्यात आलेल्या भव्य ‘करिअर मार्गदर्शन मेळाव्यात’ प्रमुख वक्ते म्हणून विवेक वेलणकर बोलत होते.

याप्रसंगी बाटुचे कुलसचिव डॉ. अमित शेष, ॲस्पायर नॉलेजचे संस्थापक व सीईओ डॉ. संजय गांधी, आयआयटी वाराणसीचे डॉ. शैलेंद्र शुक्ला, रिलायन्स जिओ प्लॅटफॉर्मचे उपव्यवस्थापक मंदार हलभावी, प्रख्यात उद्योजक मनोज देशमुख आणि प्रशांत पुंड आदी मान्यवर मंचावर उपस्थित होते.

विवेक वेलणकर यांनी पालकांना व विद्यार्थ्यांना भविष्यातील रोजगाराचा वेध घेण्याचे आवाहन केले. ते म्हणाले, “शिक्षण, शेती, उद्योग, सेवा, वैद्यकीय, वाणिज्य आणि कला अशा सर्वच क्षेत्रांमध्ये एआयचा वापर प्रचंड प्रमाणात वाढणार आहे. यामुळे केवळ पारंपारिक कोडिंग किंवा प्रोग्रॅमिंग करणाऱ्यांच्या नोकऱ्या धोक्यात येऊ शकतात. मात्र, एआयचे टूल्स विकसित करणारे आणि मशीन लर्निंग (ML) साठी काम करणाऱ्या तज्ज्ञांना बाजारात प्रचंड मागणी असेल. त्यामुळे पालकांनी आणि विद्यार्थ्यांनी कॉलेज निवडताना कॅम्पस प्लेसमेंट आणि प्रत्यक्ष इंटर्नशिपला सर्वाधिक महत्त्व दिले पाहिजे. यासाठी ‘ॲस्पायर नॉलेज’ ही संस्था एक उत्तम आणि सक्षम पर्याय आहे.”

बाटु विद्यापीठाचे कुलसचिव डॉ. अमित शेष यांनी विद्यापीठाच्या धोरणांची सविस्तर माहिती दिली. ते म्हणाले, “रायगड येथील डॉ. बाबासाहेब आंबेडकर तंत्रज्ञान विद्यापीठाने पुण्याच्या ‘ॲस्पायर नॉलेज’ संस्थेसोबत ‘आर्टिफिशियल इंटेलिजन्स आणि मशीन लर्निंग’ या विषयात ‘बीएससी (ऑनर्स)’ हा अभिनव पदवी अभ्यासक्रम सुरू करण्यासाठी सामंजस्य करार केला आहे. याशिवाय विद्यापीठाने ‘ट्रिपल आयटी, अलाहाबाद’ सारख्या राष्ट्रीय संस्थेसोबतही करार केले आहेत. विद्यार्थ्यांना केवळ पदवी न देता प्रत्यक्ष उद्योगांचा अनुभव मिळावा, यासाठी विद्यापीठ सातत्याने समन्वय साधत आहे. विद्यापीठाच्या मार्गदर्शनाखाली आतापर्यंत ९२ यशस्वी स्टार्टअप्स सुरू झाले आहेत. तसेच ‘नॅशनल इंक्युबेशन स्टार्टअप पॉलिसी’ (NISP) अंतर्गत विद्यापीठाने दरवर्षी २५ लाख रुपयांचा विशेष निधी राखीव ठेवला असून विद्यार्थ्यांनी याचा पुरेपूर लाभ घ्यावा.”

स्वागत आणि प्रास्ताविक करताना ‘ॲस्पायर नॉलेज’चे संस्थापक व सीईओ डॉ. संजय गांधी यांनी नवीन अभ्यासक्रमाचे महत्त्व पटवून दिले. ते म्हणाले, “पुण्यातील आमची संस्था केंद्र सरकारच्या ‘राष्ट्रीय शैक्षणिक धोरण’ (NEP) नुसार कार्यरत आहे. संस्थेने आतापर्यंत १०० पेक्षा जास्त स्टार्टअप्सना यशस्वी मार्गदर्शन केले आहे. बाटु विद्यापीठाच्या सहकार्याने सुरू होणारा हा ४ वर्षांचा ‘आर्टिफिशियल इंटेलिजन्स अँड मशीन लर्निंग, बीएससी (ऑनर्स)’ अभ्यासक्रम सावित्रीबाई फुले पुणे विद्यापीठाच्या टेक्नॉलॉजी विभागात सुरू करण्यात आला आहे. यामध्ये विद्यार्थ्यांना एआय सोबतच अत्याधुनिक ‘क्वांटम कॉम्प्युटर’चे विशेष ज्ञान मिळणार आहे. सर्वात महत्त्वाचे म्हणजे, चौथ्या वर्षी विद्यार्थ्यांना थेट उद्योगांमध्ये काम करण्याचा अनुभव (इंटर्नशिप) दिला जाईल, ज्यामध्ये त्यांना आकर्षक स्टायपेंड (मानधन) आणि अनुभवाचे प्रमाणपत्रही मिळेल. हा १२ अधिक ४ वर्षांचा शैक्षणिक पॅटर्न परदेशातील उच्च शिक्षणासाठी अत्यंत उपयुक्त ठरणार आहे.”

सदर कार्यक्रमाचे अत्यंत नेटके व बहारदार सूत्रसंचालन समिधा गांधी यांनी केले, तर उपस्थितांचे मनःपूर्वक आभार अमित गांधी यांनी मानले.

© २०२६ मॅक्स मंथन डेली न्यूज. सर्व हक्क राखीव.

आठवड्याभरात काँग्रेसची नवी धडाकेबाज कार्यकारिणी जाहीर करणार; शहराध्यक्ष नरेंद्र बनसोडे यांची घोषणा!

पिंपरी चिंचवड प्रतिनिधी लक्ष्मण प्रधान , १६ जून २०२६ मॅक्स मंथन डेली न्यूज:

पिंपरी: “पिंपरी-चिंचवड शहरात काँग्रेस पक्षाची संघटनात्मक बांधणी अधिक मजबूत करण्यासाठी आणि आगामी स्थानिक स्वराज्य संस्थांच्या निवडणुकांसाठी पक्षाला सज्ज करण्यासाठी पुढील आठवड्याभरात काँग्रेसची नवीन, धडाकेबाज आणि सर्वसमावेशक कार्यकारिणी अधिकृतपणे जाहीर केली जाईल. येणारा काळ हा काँग्रेस कार्यकर्त्यांसाठी अत्यंत परीक्षा बघणारा आणि कमालीच्या दक्षतेचा आहे. भाजपच्या दडपशाही आणि जनविरोधी धोरणांविरोधात आवाज उठवत असतानाच, आपल्याला सर्वात आधी मतदार यादी पुनर्परीक्षण मोहिमेकडे गांभीर्याने लक्ष द्यावे लागेल,” अशी घोषणा काँग्रेसचे शहराध्यक्ष नरेंद्र बनसोडे यांनी केली.

पिंपरी-चिंचवड शहर जिल्हा काँग्रेस अंतर्गत पदाधिकारी व क्रियाशील कार्यकर्त्यांची एक अत्यंत महत्त्वाची बैठक चिंचवड येथील संभाजीनगर परिसरातील हॉटेलमध्ये पार पडली. या बैठकीच्या अध्यक्षस्थानी शहराध्यक्ष नरेंद्र बनसोडे बोलत होते. बैठकीची सुरुवात ‘वंदे मातरम’च्या सामूहिक गायनाने करण्यात आली.

या बैठकीचे आणखी एक मोठे वैशिष्ट्य म्हणजे शहराच्या सामाजिक क्षेत्रात अत्यंत सक्रियपणे आणि उल्लेखनीय काम करणारे तीन मोठे चेहरे – नितीन सोनवणे, रितिका शर्मा आणि विल्यम साळवी यांनी शेकडो समर्थकांसह काँग्रेस पक्षामध्ये जाहीर प्रवेश केला. शहराध्यक्ष नरेंद्र बनसोडे आणि ज्येष्ठ नेत्यांनी तिरंगा उपरणे घालून त्यांचे पक्षात जाहीर स्वागत केले.

बैठकीदरम्यान पक्षीय पातळीवर दोन अत्यंत महत्त्वपूर्ण अभिनंदनाचे ठराव एकमताने मंजूर करण्यात आले: १) हर्षवर्धन सपकाळ यांचा गौरव: काँग्रेस पक्षाचे प्रांताध्यक्ष हर्षवर्धन सपकाळ यांच्या अफाट व उत्कृष्ट संघटनात्मक कार्याचे कौतुक केंद्रीय नेतृत्वाकडून करण्यात आले असून त्यांना पूर्ण ताकदीने पाठबळ देण्यात आले आहे. याबद्दल सपकाळ यांच्या अभिनंदनाचा मुख्य ठराव बैठकीत संमत झाला. २) राज्यसभा खासदारांचे अभिनंदन: राज्यसभेच्या विविध जागांवर नुकतेच अत्यंत दिमाखात निवडून आलेले काँग्रेसचे राष्ट्रीय अध्यक्ष मल्लिकार्जुन खरगे, पवन खेरा, मन्सूर अली खान, नीरज डांगी, प्रवीण चक्रवर्ती आणि प्रणव झा यांच्याही यशस्वी निवडीबद्दल अभिनंदनाचा ठराव मोठ्या उत्साहात मंजूर करण्यात आला.

कार्यकर्त्यांना मार्गदर्शन करताना शहराध्यक्ष नरेंद्र बनसोडे यांनी सत्ताधारी भारतीय जनता पक्षावर गंभीर राजकीय आरोप केले. ते म्हणाले, “आगामी निवडणुकांच्या पार्श्वभूमीवर सध्या सुरू असलेल्या मतदार यादी सखोल पुनर्परीक्षण मोहिमेमध्ये आपण सर्वांनी अत्यंत काळजीपूर्वक काम केले पाहिजे. निवडणूक आयोगाच्या स्थानिक यंत्रणेवर दबाव आणून भाजप हा आपल्याला विरोध करणाऱ्या मतदारांची, विशेषतः अल्पसंख्याक, मागासवर्गीय समाज आणि काँग्रेसच्या कट्टर पाठीराख्यांची नावे मतदार यादीतून जाणीवपूर्वक वगळण्याचे कारस्थान (षड्यंत्र) करू शकतो. या कुटिल धोरणाला निष्प्रभ करण्यासाठी प्रत्येक कार्यकर्त्यांने बूथ पातळीवर ‘बीएलओ’ (BLO) सोबत प्रत्यक्ष काम करून मतदारांची नावे सुरक्षित ठेवली पाहिजेत. ऑक्टोबर महिन्यापर्यंत हाच आपला एकमेव आणि सर्वोच्च अजेंडा असला पाहिजे.”

नुकतीच एनएसयूआय (NSUI) च्या पिंपरी-चिंचवड शहराध्यक्षपदी निवड झाल्याबद्दल तरुण तडफदार कार्यकर्ते सौरभ शिंदे यांचा महाराष्ट्र प्रदेश काँग्रेसचे सचिव अशोकराव मोरे यांच्या हस्ते विशेष सत्कार करण्यात आला.

बैठकीत काँग्रेस नेते अभिमन्यू दहितुले, गौतम आरकडे, समिता गोरे, स्वप्नील बनसोडे, बी. बी. शिंदे, शहाबुद्दीन शेख, विल्यम साळवी, आणि नितीन सोनवणे यांनी मनोगते व्यक्त करत मार्गदर्शन केले. तर पक्षाच्या पुढील रणनीतीसाठी आणि पक्ष वाढीसाठी युवराज पवार, बी. आर. माडगूळकर, शिल्पा गायकवाड, सुधाकर कुंभार, शाम भोसले आणि प्रवीण कांबळे यांनी अतिशय महत्त्वपूर्ण व दिशादर्शक सूचना मांडल्या.

या महत्त्वपूर्ण ऐतिहासिक बैठकीला काँग्रेसचे सर्व आघाड्यांचे प्रमुख आणि शेकडो पदाधिकारी उपस्थित होते. त्यांची नावे खालीलप्रमाणे आहेत:

शहराध्यक्ष नरेंद्र बनसोडे, प्रदेश सचिव अशोक मोरे, माजी सभापती अभिमन्यू दहीतुले, क्रीडा सेलच्या प्रदेशाध्यक्ष समिती गोरे, गौतम अरकडे, अशोक मंगल, अल्पसंख्याक विभागाचे अध्यक्ष शहाबुद्दीन शेख, युवक काँग्रेसचे अध्यक्ष कौस्तुभ नवले, एनएसयुआय अध्यक्ष सौरभ शिंदे, प्रदेश युवक काँग्रेस सरचिटणीस स्वप्निल बनसोडे, उमेश खंदारे, सेवादलाचे कार्याध्यक्ष पांडुरंग जगताप, ज्येष्ठ नेते बी. बी. शिंदे, माजी सरचिटणीस संदीप शिंदे, हिराचंद जाधव, हरीश डोळस, जितेंद्र छाबडा, अनुसूचित जाती विभागाचे माजी अध्यक्ष विजय ओव्हाळ, गांधी विचार प्रसारक बी. आर. माडगूळकर, इस्माईल संगम, कुणाल भोसले, पठाण चाचा, सुरज कुलकर्णी सर, युवराज पवार, मनीषा पवार, शिल्पा गायकवाड, प्रफुल्ला मोतलिंग, अनिता राठोड, विलास सकट, सुरज गायकवाड, अमरजीत सिंग पोथीवाल, फिरोज तांबोळी, नासिर चौधरी, रिजवान शेख, संदेश जगताप, डेनिस पॉल, राजन नायर, वामन अहिरे, भास्कर नारखेडे, महादेव वाळुंजकर, रोहित शेळके, आणि विशाल कांबळे आदी उपस्थित होते.

सदर बैठकीचे अत्यंत नेटके व सुव्यवस्थित सूत्रसंचालन जितेंद्र छाबडा यांनी केले, तर उपस्थितांचे मनःपूर्वक आभार विजय ओव्हाळ यांनी मानले. शेवटी सामूहिक राष्ट्रगीताने या यशस्वी बैठकीची सांगता करण्यात आली.

© २०२६ मॅक्स मंथन डेली न्यूज. सर्व हक्क राखीव.

“आधी गरिबांच्या मुलांसाठी मनपाची ‘CBSE’ शाळा उभारा, मगच जागा भाड्याने द्या!” पुनावळे-ताथवडे येथील भूखंड कराराला नगरसेविका श्रुतीताई वाकडकर यांचा कडाडून विरोध

पिंपरी चिंचवड प्रतिनिधी बालाजी नवले, १६ जून २०२६ मॅक्स मंथन डेली न्यूज:

पिंपरी: “पिंपरी-चिंचवड शहराच्या आणि पर्यायाने नागरिकांच्या सर्वांगीण प्रगतीमध्ये दर्जेदार शिक्षणाची भूमिका सर्वात महत्त्वाची आहे. ‘Education is the Foundation of Our Future Growth’ (शिक्षण हाच आपल्या भावी विकासाचा पाया आहे), हे लक्षात घेऊन महानगरपालिकेने आपल्या हक्काच्या आरक्षित जागा खाजगी संस्थांच्या घशात घालणे थांबवले पाहिजे. प्रभाग क्रमांक 25 मधील पुनावळे-ताथवडे येथील मौल्यवान भूखंड खाजगी संस्थेला भाडेतत्त्वावर देण्यापूर्वी प्रशासनाने स्थानिक कष्टकरी व मध्यमवर्गीय विद्यार्थ्यांच्या भवितव्याचा विचार करावा. वाकड येथे मनपाने ज्याप्रमाणे उत्कृष्ट ‘सावित्रीबाई फुले सीबीएसई शाळा’ उभारली आहे, अगदी त्याच धर्तीवर पुनावळे आणि ताथवडे येथेही महापालिकेची स्वतःची दर्जेदार सीबीएसई (CBSE) शाळा विकसित करण्यात यावी,” अशी ठाम आणि आग्रही भूमिका नगरसेविका तथा शिक्षण समिती सदस्य श्रुतीताई राम वाकडकर यांनी मांडली.

पिंपरी-चिंचवड महानगरपालिकेच्या आयोजित करण्यात आलेल्या सर्वसाधारण सभेमध्ये प्रभाग क्रमांक 25 मधील अतिशय संवेदनशील आणि कोट्यवधी रुपयांच्या आरक्षित भूखंडाच्या भाडेकराराच्या विषयावर बोलताना श्रुतीताई वाकडकर यांनी प्रशासनाला चांगलेच धारेवर धरले.

महानगरपालिका प्रशासनाने प्रभाग क्रमांक 25 अंतर्गत येणाऱ्या वाकड-पुनावळे-ताथवडे परिसरातील सुमारे 0.91 हेक्टर (अर्थात 9,100 चौ.मी.) एवढी अथांग आरक्षित जागा एका खाजगी शैक्षणिक संस्थेला तब्बल 30 वर्षांच्या दीर्घ मुदतीसाठी भाडेतत्त्वावर (Lease) देण्याचा प्रस्ताव सर्वसाधारण सभेसमोर मंजुरीसाठी आणला आहे. या प्रस्तावामध्ये वर्षाला सुमारे ₹7 कोटी एवढे भाडे महापालिकेला मिळणार असल्याचे प्रशासनाने निश्चित केले आहे. मात्र, या प्रस्तावामुळे स्थानिक गोरगरीब आणि मध्यमवर्गीय विद्यार्थ्यांच्या मोफत व दर्जेदार शिक्षणाच्या अधिकारावर गदा येणार असल्याने या प्रस्तावाला तीव्र विरोध सुरू झाला आहे.

सर्वसाधारण सभेत बोलताना श्रुतीताई वाकडकर यांनी स्थानिक पालकांची व्यथा सभागृहासमोर अत्यंत प्रभावीपणे मांडली. त्या म्हणाल्या, “वाकड, पुनावळे, ताथवडे आणि हिंजवडी आयटी पार्कच्या लगतच्या या परिसरात आज हजारो कष्टकरी, मध्यमवर्गीय आणि नोकरदार कुटुंबे वास्तव्यास आहेत. आपल्या मुलांना दर्जेदार, आधुनिक आणि परवडणारे शिक्षण मिळावे, ही या प्रत्येक पालकाची प्रामाणिक आणि न्याय्य अपेक्षा आहे. मात्र, आज खाजगी शाळांच्या अवाढव्य फी वाढीमुळे आणि वाढत्या शैक्षणिक खर्चामुळे सर्वसामान्य मध्यमवर्गीय कुटुंबांचे आर्थिक बजेट पूर्णपणे कोलमडून गेले आहे. अशा बिकट परिस्थितीत महापालिकेच्या स्वतःच्या सीबीएसई शाळा हाच या पालकांसाठी एकमेव आशेचा किरण आहे.”

नगरसेविका श्रुतीताई वाकडकर यांनी मनपा आयुक्त आणि प्रशासकीय अधिकाऱ्यांना थेट प्रश्न विचारत कोंडीत पकडले. त्यांनी विचारले की,

1. “जर पुनावळे-ताथवडे येथील ही आरक्षित जागा खाजगी संस्थेला दिली, तर स्थानिक विद्यार्थ्यांसाठी महापालिकेची स्वतःची सीबीएसई शाळा उभारण्यासाठी मनपाकडे दुसरी कोणती पर्यायी जागा उपलब्ध आहे का?”
2. “शहरात सरकारी भूखंड असतानाही गरिबांच्या मुलांना दर्जेदार शिक्षणापासून वंचित ठेवून खाजगी संस्थांचे खिसे भरण्याचे धोरण मनपा का राबवत आहे?”

“जोपर्यंत पुनावळे आणि ताथवडे परिसरातील विद्यार्थ्यांच्या शैक्षणिक हिताला सर्वोच्च प्राधान्य देऊन, त्या जागेवर महापालिकेची स्वतःची भव्य सीबीएसई शाळा उभारण्याचा अधिकृत निर्णय घेतला जात नाही, तोपर्यंत या जागेच्या लीजचा कोणताही प्रस्ताव मंजूर केला जाऊ नये. मी या वादग्रस्त प्रस्तावाला प्रभाग क्रमांक 25 मधील हजारो पालकांच्या वतीने जाहीर आणि संपूर्ण विरोध करत आहे,” असे श्रुतीताई वाकडकर यांनी सभागृहात अत्यंत आक्रमकपणे स्पष्ट केले. त्यांच्या या सडेतोड भूमिकेमुळे सभागृहात प्रशासनाची मोठी धावपळ उडाली असून स्थानिक नागरिकांमधून त्यांच्या या निर्णयाचे उत्स्फूर्त स्वागत केले जात आहे.

© २०२६ मॅक्स मंथन डेली न्यूज. सर्व हक्क राखीव.

पावसाळ्यापूर्वी आयुक्त डॉ. विजय सूर्यवंशी थेट ‘ॲक्शन मोड’वर! मुळा नदीपात्र व नाल्यांची प्रत्यक्ष पाहणी; नैसर्गिक प्रवाहात अडथळा ठरणाऱ्या अतिक्रमणांवर कठोर कारवाईचे निर्देश

पिंपरी चिंचवड प्रतिनिधी बालाजी नवले, १३ जून २०२६ मॅक्स मंथन डेली न्यूज:

पिंपरी: आगामी पावसाळ्याच्या पार्श्वभूमीवर पिंपरी-चिंचवड शहरातील मान्सूनपूर्व तयारीला कमालीची गती आली आहे. शहरातील विविध संवेदनशील नाले आणि नदीपात्राची महापालिका आयुक्त डॉ. विजय सूर्यवंशी यांनी आज प्रत्यक्ष मैदानावर उतरून पाहणी केली. “पावसाळ्यात शहरातील सखल भागात पाणी साचणार नाही आणि कोणत्याही प्रकारची पूरस्थिती निर्माण होणार नाही, यासाठी सर्व प्रतिबंधात्मक उपाययोजना वेळेत पूर्ण करा. तसेच नाल्यांच्या नैसर्गिक प्रवाहात अडथळा निर्माण करणाऱ्या अनधिकृत अतिक्रमणांवर तात्काळ कठोर कायदेशीर कारवाई करा,” असे सडेतोड निर्देश आयुक्त डॉ. विजय सूर्यवंशी यांनी संबंधित विभागाच्या अधिकाऱ्यांना दिले आहेत.

आयुक्त डॉ. विजय सूर्यवंशी यांनी आज वरिष्ठ अधिकाऱ्यांच्या गोतावळ्यासह पिंपळे निलख परिसरातील शिक्षक कॉलनी येथे भेट देऊन मुळा नदीपात्राची सविस्तर पाहणी केली. यावेळी त्यांनी नदी आणि शहरातील मुख्य नाल्यांच्या पाणी वहनक्षमतेबाबत (Water Carrying Capacity) अभियंत्यांकडून सविस्तर तांत्रिक माहिती घेतली.

अतिवृष्टीच्या किंवा पुराच्या काळात ज्या सखल भागांमध्ये पाणी शिरण्याची शक्यता असते, अशा संभाव्य संवेदनशील ठिकाणांची गंभीर दखल घेत आयुक्तांनी त्या ठिकाणी तात्काळ अतिरिक्त सुरक्षात्मक व प्रतिबंधात्मक उपाययोजना राबविण्याचे आदेश दिले.

पावसाळ्याच्या तीन ते चार महिन्यांच्या कालावधीत शहरातील सामान्य नागरिकांना तसेच वाहनधारकांना कोणत्याही प्रकारचा त्रास अथवा मनस्ताप सहन करावा लागू नये, यासाठी महापालिकेच्या सर्व आपत्कालीन यंत्रणांनी २४ तास सतर्क राहावे, असे आवाहन आयुक्तांनी केले. मुख्यत्वे आरोग्य विभाग, पर्यावरण विभाग, पाणीपुरवठा आणि जलनिस्सारण विभागाने परस्परांमध्ये चोख समन्वय ठेवून काम करावे, अशा सूचना त्यांनी दिल्या. नाल्यांच्या रुंदीकरणात आणि सफाईत अडथळा ठरणाऱ्या बांधकामांवर तात्काळ हातोडा मारण्याचे आदेश त्यांनी दिले आहेत.

आयुक्त डॉ. विजय सूर्यवंशी यांच्या या अत्यंत महत्त्वाच्या मान्सूनपूर्व पाहणी दौऱ्यात शहरातील सर्व प्रभागांचे क्षेत्रीय अधिकारी आणि प्रशासकीय प्रमुख उपस्थित होते. याप्रसंगी उपस्थित असलेले सर्व सन्माननीय अधिकारी खालीलप्रमाणे:

महानगरपालिकेचे अतिरिक्त आयुक्त कुलदीप जंगम, अतिरिक्त आयुक्त तृप्ती सांडभोर, उपआयुक्त डॉ. प्रदीप ठेंगल, प्रभाग क्षेत्रीय अधिकारी निवेदिता घार्गे, प्रभाग क्षेत्रीय अधिकारी अजिंक्य येळे, प्रभाग क्षेत्रीय अधिकारी पूजा दूधनाळे, प्रभाग क्षेत्रीय अधिकारी अश्विनी गायकवाड, सहाय्यक आरोग्य अधिकारी श्रीराम गायकवाड, सहाय्यक आरोग्य अधिकारी राजू साबळे, सहाय्यक आरोग्य अधिकारी योगेश फल्ले, सहाय्यक आरोग्य अधिकारी अंकुश झिटे आणि सहाय्यक आरोग्य अधिकारी शांताराम माने यांच्यासह महापालिकेचे सर्व संबंधित कार्यकारी अभियंता, सह अभियंता व इतर तांत्रिक विभागांचे अधिकारी मोठ्या संख्येने उपस्थित होते.

दरम्यान, महापालिका प्रशासनाकडून राबविल्या जाणाऱ्या या विविध स्तरांवरील मान्सूनपूर्व उपाययोजनांमुळे यंदा शहरातील सखल भागांतील नागरिकांना मोठा दिलासा मिळण्याची शक्यता आहे. नागरिकांची सुरक्षा आणि जीवित-वित्तहानी टाळणे यालाच प्रशासनाने सर्वोच्च प्राधान्य दिले असल्याचे महापालिकेने स्पष्ट केले आहे.

© २०२६ मॅक्स मंथन डेली न्यूज. सर्व हक्क राखीव.

सरकारी शाळांचा कायापालट करणारे ‘क्रांतिदूत’ वारे गुरुजींचा पीसीएमसीच्या वतीने गौरव! महापौरांच्या हस्ते मोरवाडीत रंगला देदिप्यमान सत्कार सोहळा

पिंपरी चिंचवड प्रतिनिधी बालाजी नवले, १३ जून २०२६ मॅक्स मंथन डेली न्यूज:

पिंपरी: “राष्ट्रीय पुरस्कार विजेते आदर्श शिक्षक दत्तात्रय वारे गुरुजी यांनी शासकीय शिक्षण व्यवस्थेमध्ये केलेले कार्य केवळ थक्क करणारे नसून ते संपूर्ण देशासाठी अत्यंत प्रेरणादायी आणि अनुकरणीय आहे. ग्रामीण व दुर्गम भागातील सरकारी शाळांमध्ये दर्जेदार शिक्षणाची गंगा पोहोचवून त्यांनी जिल्हा परिषदेच्या शाळांचा केलेला कायापालट थक्क करणारा आहे. वाबळेवाडी आणि जळिंदरनगर येथील शाळांमध्ये त्यांनी राबविलेले अभिनव प्रयोग आणि दृढ निश्चय यामुळेच आज या शाळांमध्ये प्रवेश मिळविण्यासाठी पालकांच्या रांगा लागत आहेत. शासकीय शाळाही जागतिक दर्जाचे शिक्षण देऊ शकतात, हा विश्वास त्यांनी समाजात निर्माण केला आहे,” असे भावोद्गार पिंपरी-चिंचवडचे महापौर रवि लांडगे यांनी काढले.

पिंपरी-चिंचवड महानगरपालिकेच्या वतीने मोरवाडी येथील दिव्यांग भवन फाउंडेशन येथे आयोजित ‘सी.एस.आर.’ (CSR) कक्ष अंतर्गत शहरातील विविध नामांकित उद्योगसमूहांच्या उच्चस्तरीय संवाद बैठकीत या सुवर्ण सोहळ्याचे आयोजन करण्यात आले होते. याप्रसंगी राष्ट्रीय पुरस्कार विजेते आदर्श शिक्षक दत्तात्रय वारे गुरुजी यांचा महापौर रवि लांडगे यांच्या शुभहस्ते विशेष नागरी सत्कार व सन्मान करण्यात आला.

या सोहळ्याला पिंपरी-चिंचवड शहर आणि प्रशासनातील अत्यंत जबाबदार अधिकारी व लोकप्रतिनिधी उपस्थित होते. यामध्ये महानगरपालिकेचे कर्तव्यदक्ष महापौर रवि लांडगे, मनपा आयुक्त डॉ. विजय सूर्यवंशी, स्थायी समितीचे कार्यक्षम सभापती अभिषेक बारणे, सह आयुक्त मनोज लोणकर, दिव्यांग भवन फाउंडेशनचे व्यवस्थापकीय संचालक ओमप्रकाश देशमुख, मुख्य कार्यकारी अधिकारी परेश गांधी, आणि जनता संपर्क अधिकारी (PRO) प्रफुल्ल पुराणिक यांच्यासह शहरातील विविध नामांकित राष्ट्रीय व आंतरराष्ट्रीय उद्योग समूहांचे सीएसआर (CSR) प्रमुख मोठ्या संख्येने उपस्थित होते.

१) जिल्हा परिषद प्राथमिक शाळा, वाबळेवाडी (शिरूर, पुणे):

• विद्यार्थी संख्येत विक्रमी वाढ: वारे गुरुजींनी कार्यभार स्वीकारला तेव्हा या जिल्हा परिषद शाळेची विद्यार्थी संख्या अवघी ३२ होती. मात्र, त्यांच्या अविरत प्रयत्नांमुळे आणि आधुनिक अध्यापन पद्धतीमुळे ही संख्या अवघ्या तीन वर्षांत थेट ७२१ वर पोहोचली.
• ५ हजार विद्यार्थ्यांची प्रतीक्षा यादी: या शाळेचा लौकिक एवढा वाढला की, एका सरकारी शाळेत प्रवेश मिळवण्यासाठी तब्बल ५,००० पेक्षा जास्त विद्यार्थ्यांची अथांग ‘वेटिंग लिस्ट’ (प्रतीक्षा यादी) तयार झाली.
• भारतातील पहिली ‘शून्य ऊर्जा’ शाळा: वाबळेवाडी शाळेला देशातील पहिली ‘शून्य ऊर्जा’ (Zero Energy) शाळा म्हणून मान मिळाला. तसेच महाराष्ट्र शासनाने २०१६ मध्ये या शाळेला अधिकृतपणे ‘आंतरराष्ट्रीय दर्जाच्या शाळेचा’ मान बहाल केला.
• ४.५ लाख शिक्षकांना प्रशिक्षण: वारे गुरुजींच्या या यशस्वी अध्यापन मॉडेलवर आधारित शासकीय शिक्षण पद्धती विकसित करून त्याद्वारे महाराष्ट्रातील तब्बल साडेचार लाख शिक्षकांना प्रत्यक्ष प्रशिक्षण देण्यात आले.

२) जिल्हा परिषद प्राथमिक शाळा, जळिंदरनगर (खेड, पुणे):

• दुर्गम भागातील शाळेचा जागतिक गौरव: जळिंदरनगर या अत्यंत दुर्गम आणि डोंगराळ भागातील शाळेत वारे गुरुजींनी केवळ दोन वर्षांत विद्यार्थी संख्या ३ वरून थेट १५० पर्यंत वाढवली. येथेही प्रवेशासाठी ५०० हून अधिक विद्यार्थ्यांची प्रतीक्षा यादी आहे.
• जगातील ‘टॉप १०’ मध्ये स्थान: ही शासकीय शाळा ‘वर्ल्ड्स बेस्ट स्कूल अवॉर्ड्स’ च्या माध्यमातून जगातील सर्वोत्तम शाळांच्या जागतिक स्पर्धेत थेट ‘टॉप १०’ मध्ये स्थान मिळवून देदिप्यमान ठरली आहे.

सत्कार प्रसंगी बोलताना महापौर रवि लांडगे म्हणाले, “दत्तात्रय वारे गुरुजींनी विकसित केलेली आणि अमलात आणलेली शिक्षण प्रणाली ही केवळ पाठांतरावर आधारित नसून ती बालकांच्या सर्वांगीण आणि कलागुणांच्या विकासाला चालना देणारी आहे. त्यांच्या अतुलनीय कार्यामुळे आज गरीब पालकांचा सरकारी शाळांकडे पाहण्याचा दृष्टिकोन पूर्णपणे आणि सकारात्मक बदलला आहे. राष्ट्रीय व आंतरराष्ट्रीय स्तरावरील अनेक अत्यंत प्रतिष्ठित पुरस्कार मिळवूनही वारे गुरुजींनी आपली नाळ मातीशी आणि विद्यार्थ्यांशी कायम ठेवली आहे. त्यांचा हा आदर्श घेऊन शहरातील प्रत्येक शासकीय शाळेने आपली शैक्षणिक उंची वाढवली पाहिजे.”

वारे गुरुजींनी भारतीय परिस्थितीला अत्यंत सुसंगत आणि जागतिक दर्जाच्या शिक्षण व्यवस्थेला समकक्ष अशी एक सक्षम व पर्यायी शिक्षण प्रणाली विकसित केली आहे. या महत्त्वपूर्ण शैक्षणिक मॉडेलच्या शास्त्रीय विकासासाठी आणि प्रसारासाठी देशातील अग्रगण्य संस्था ‘भारतीय व्यवस्थापन संस्था’ (IIM Ahmedabad) ही ‘ज्ञानसहभागी’ (Knowledge Partner) म्हणून काम करत आहे.

त्यांच्या या क्रांतीकारी शैक्षणिक योगदानाबद्दल त्यांना खालील ऐतिहासिक सन्मानांनी गौरविण्यात आले आहे. राष्ट्रीय शिक्षक पुरस्कार (२०१६): भारताचे तत्कालीन महामहीम राष्ट्रपती यांच्या हस्ते हा सर्वोच्च पुरस्कार बहाल करण्यात आला. सृष्टी सन्मान पुरस्कार, अहमदाबाद, वर्ल्ड्स बेस्ट स्कूल अवॉर्ड्स २०२५, कम्युनिटी चॉईस अवॉर्ड – बेस्ट ऑफ द बेस्ट स्कूल

सत्काराला उत्तर देताना वारे गुरुजी अत्यंत नम्रपणे म्हणाले, “गेली तीन दशके मी शिक्षण क्षेत्रात काम करत असून, शिक्षणाच्या माध्यमातून समाजपरिवर्तन घडवून आणणे हेच माझ्या जीवनाचे एकमेव ध्येय राहिले आहे. आजही देशातील ग्रामीण भागातील शिक्षण व्यवस्थेत खूप काम करण्याची गरज आहे. शासकीय शाळा जर पायाभूत आणि तांत्रिक सोयीसुविधांनी सज्ज झाल्या, तर कोणतीही खाजगी शाळा त्यांच्याशी बरोबरी करू शकणार नाही. हे कार्य माझ्या एकट्याचे नसून राज्यातील हजारो मुख्याध्यापक, शिक्षक आणि सुजाण पालकांच्या सामूहिक श्रमाची ही एक चळवळ आहे. शासकीय शिक्षण व्यवस्थेचा दर्जा उंचावण्यासाठी आणि प्रत्येक गरीब विद्यार्थ्याला विनामूल्य जागतिक दर्जाचे शिक्षण मिळवून देण्यासाठी मी माझ्या आयुष्याचा प्रत्येक क्षण या सामाजिक कार्यासाठी समर्पित करण्यास तयार आहे.”

© २०२६ मॅक्स मंथन डेली न्यूज. सर्व हक्क राखीव.

स्पोर्ट्स बाईकवरून धुमाकूळ घालणारा कुख्यात चैन स्नॅचर जेरबंद! बाणेरमध्ये थरारक पाठलाग करत पिंपरी-चिंचवड गुन्हे शाखेने आवळल्या मुसक्या

पिंपरी चिंचवड प्रतिनिधी बालाजी नवले, १३ जून २०२६ मॅक्स मंथन डेली न्यूज:

पिंपरी: पिंपरी-चिंचवड आणि पुणे परिसरातील शांतताप्रिय रस्त्यांवर वेगवान स्पोर्ट्स बाईकवरून येत महिलांच्या गळ्यातील सोन्याचे दागिने क्षणात ओरबाडून पळणाऱ्या एका अत्यंत सराईत आणि कुख्यात चैन स्नॅचरला गुन्हे शाखा, युनिट-१ च्या पथकाने अत्यंत थरारक, ‘फिल्मी स्टाईल’ पाठलाग करून बेड्या ठोकल्या आहेत. या धडक कारवाईत पोलिसांनी तब्बल १५ लाख रुपये किमतीचे सोन्याचे दागिने आणि गुन्ह्यात वापरलेल्या २ महागड्या स्पोर्ट्स बाईक जप्त केल्या आहेत. पोलिसांनी या कारवाईद्वारे सांगवी, दापोडी, तळेगाव, देहूरोड आणि भारती विद्यापीठ पोलीस ठाण्यांच्या हद्दीतील चैन स्नॅचिंगचे एकूण ५ गंभीर गुन्हे उघडकीस आणले आहेत.

या घटनेची सविस्तर पार्श्वभूमी अशी की, दिनांक ३ जून २०२६ रोजी सकाळी १०:०० वाजण्याच्या सुमारास सांगवी पोलीस ठाण्याच्या हद्दीत पिंपळे निलख येथील विशालनगर भागातील सुदर्शन पॅराडाईज, फेज-१ च्या मुख्य गेटसमोरून एक नागरिक पायी जात होते. त्यावेळी एका अज्ञात चोरट्याने अत्यंत वेगाने स्पोर्ट्स बाईकवरून येत त्यांच्या गळ्यातील सुमारे २ तोळे वजनाची सोन्याची चैन जबरीने खेचून धूम ठोकली होती. या धक्कादायक घटनेप्रकरणी सांगवी पोलीस ठाण्यात गु.र.नंबर २३७/२०२६ नुसार भारतीय न्याय संहिता (BNS) कलम ३०९(६) प्रमाणे जबरी चोरीचा गुन्हा दाखल करण्यात आला होता.

शहरात दिवसाढवळ्या घडलेल्या या गंभीर गुन्ह्याची दखल घेत पिंपरी-चिंचवडचे पोलीस आयुक्त श्री. विनयकुमार चौबे यांनी गुन्हे शाखेला तात्काळ समांतर तपास करून आरोपीला गजाआड करण्याचे आदेश दिले होते.

पोलीस आयुक्तांच्या आदेशानंतर सहाय्यक पोलीस आयुक्त (गुन्हे-१) डॉ. विशाल हिरे यांनी तात्काळ घटनास्थळाला भेट देऊन तपासाची चक्रे फिरवली. गुन्हे शाखा युनिट-१ चे प्रभारी वरिष्ठ पोलीस निरीक्षक अरविंद पवार यांच्या मार्गदर्शनाखाली सपोनि दत्तात्रय गुळीग, पोउपनि कर्मराज गावडे, पोहवा महादेव जावळे, पोहवा शिवा भोपे, पोशि विजय जानराव, पोशि तेजस भालचिम, पोशि सोहेल चिखलकर या तज्ज्ञ अधिकाऱ्यांची दोन पथके तयार करण्यात आली.

तपास पथकाने आरोपीच्या येण्या-जाण्याच्या मार्गावरील तब्बल १५० ते २०० सीसीटीव्ही (CCTV) कॅमेऱ्यांचे फुटेज अत्यंत बारकाईने तपासले. या तांत्रिक विश्लेषणात पोलिसांना संशयास्पद स्पोर्ट्स बाईक मिळून आली. तसेच आरोपी हा गुन्हे करण्यासाठी आणि पळून जाण्यासाठी पुणे-बंगलोर हायवेचा प्रामुख्याने वापर करतो आणि तो नेहमी बाणेर परिसरात फिरत असतो, अशी खात्रीशीर माहिती पथकाच्या हाती लागली.

मिळालेल्या माहितीनुसार गुन्हे शाखेच्या पथकाने पुणे येथील बाणेर परिसरात दोन ते तीन दिवस अहोरात्र पाळत ठेवून अत्यंत गोपनीय पद्धतीने सापळा रचला. अखेर ७ जून २०२६ रोजी रात्री २०:३० वाजण्याच्या सुमारास संशयित आरोपी पुन्हा एकदा चैन स्नॅचिंग करण्याच्या इराद्याने बाणेर परिसरात आपल्या वेगवान स्पोर्ट्स बाईकवरून येताना दिसला.

मात्र, तिथे दबा धरून बसलेल्या पोलिसांचा संशय आल्यामुळे त्याने आपल्या स्पोर्ट्स बाईकचा वेग वाढवून पळ काढण्याचा प्रयत्न केला. यावेळी गुन्हे शाखेच्या पथकाने जीवाची पर्वा न करता अत्यंत थरारक, ‘फिल्मी स्टाईल’ने पाठलाग करून मोठ्या धैर्याने व धाडसाने आरोपीला मटण गल्ली जवळ गाठले आणि त्याच्या मुसक्या आवळल्या.

तपास पथकाने पकडलेल्या या आरोपीचे नाव सुमित गोविंद इंगळे (वय ३१ वर्षे, सध्या राहणार: मामूर्डी गाव, तालुका हवेली, जिल्हा पुणे; मूळ पत्ता: मु. पो. श्रीपत पिंपरी, तालुका बार्शी, जिल्हा सोलापूर) असे आहे. तो एकटाच अत्यंत चलाखीने स्पोर्ट्स बाईक चालवून चैन स्नॅचिंगचे गुन्हे करत असल्याचे पोलीस तपासात निष्पन्न झाले आहे.

पोलिसांनी त्याला अटक करून कसून चौकशी केली असता, त्याच्याकडून गुन्ह्यातील एकूण ७६ ग्रॅम वजनाचे सोन्याचे दागिने (किंमत सुमारे १५ लाख रुपये) आणि चोरी करण्यासाठी वापरलेल्या २ महागड्या स्पोर्ट्स बाईक असा एकूण मौल्यवान मुद्देमाल जप्त करण्यात आला आहे.

तपास पथकाने आरोपीचा पूर्व इतिहास तपासला असता, त्याच्यावर पुणे शहर, ग्रामीण आणि पिंपरी-चिंचवडमध्ये खालीलप्रमाणे एकूण ८ गंभीर गुन्हे दाखल असल्याचे उघड झाले आहे: १) हिंजवडी पोलीस ठाणे (गु.र.नं. ५०९/२०१६, भा.दं.वि. कलम ३९२, ३४) २) हिंजवडी पोलीस ठाणे (गु.र.नं. ५२९/२०१६, भा.दं.वि. कलम ३९२, ३४) ३) सांगवी पोलीस ठाणे (गु.र.नं. ४१२/२०१६, भा.दं.वि. कलम ३९२, ३४) ४) शिरवळ पोलीस ठाणे (गु.र.नं. ११०/२०१६, भा.दं.वि. कलम ४२०, ४०६) ५) शिरवळ पोलीस ठाणे (गु.र.नं. १५०/२०१६, भा.दं.वि. कलम ४२०, ४०६) ६) सिंहगड पोलीस ठाणे (गु.र.नं. ७१/२०२४, भा.दं.वि. कलम ३९२) ७) सिंहगड पोलीस ठाणे (गु.र.नं. ९५/२०२४, भा.दं.वि. कलम ३९२) ८) सिंहगड पोलीस ठाणे (गु.र.नं. ९७/२०२४, भा.दं.वि. कलम ३९२)

सदरची अत्यंत उल्लेखनीय कामगिरी पिंपरी-चिंचवडचे मा. पोलीस आयुक्त श्री. विनयकुमार चौबे, मा. सह पोलीस आयुक्त श्री. शशिकांत महावरकर, मा. अप्पर पोलीस आयुक्त श्री. सारंग आव्हाड, मा. पोलीस उप आयुक्त (गुन्हे) श्री. रोहिदास पवार, मा. सहाय्यक पोलीस आयुक्त (गुन्हे-१) डॉ. विशाल हिरे यांच्या थेट मार्गदर्शनाखाली पार पडली.

तसेच या धडक कारवाईत गुन्हे शाखा युनिट-१ चे प्रभारी अधिकारी वरिष्ठ पोलीस निरीक्षक अरविंद पवार, सपोनि दत्तात्रय गुळीग, पोउपनि कर्मराज गावडे, शिवानंद स्वामी, सपोउपनि प्रमोद वेताळ, संतोष इंगळे, मपोहवा उषा दळे, पोहवा महादेव जावळे, देवा राऊत, शिवराम भोपे, अजय डगळे, सागर अवसरे, मारुती करचुंडे, विजय शेळकंदे, पोशि संदेश देशमुख, विजय जानराव, तेजस भालचिम, सोहेल चिखलकर आणि केशव चेपटे यांनी अत्यंत मोलाचे योगदान देऊन चोख कामगिरी बजावली.

© २०२६ मॅक्स मंथन डेली न्यूज. सर्व हक्क राखीव.