आरोग्य निरीक्षकांसाठी दहा दिवसीय पायाभूत प्रशिक्षणाला सुरुवात

घनकचरा व्यवस्थापन, प्रथमोपचार, नागरिक सेवा यांसह विविध विषयांवर मिळणार सखोल मार्गदर्शन

पिंपरी, प्रतिनिधी शाम सोनवणे, ०९ सप्टेंबर २०२५, मॅक्स मंथन डेली न्यूज:

पिंपरी चिंचवड महापालिकेच्या आरोग्य विभागातील नवनियुक्त आरोग्य निरीक्षकांना त्यांच्या कामासाठी अधिक सक्षम बनवण्यासाठी दहा दिवसीय पायाभूत प्रशिक्षण कार्यशाळेचे आयोजन करण्यात आले आहे. ऑल इंडिया इन्स्टिट्यूट ऑफ लोकल सेल्फ गव्हर्नमेंट आणि वेस्ट मॅनेजमेंट अँड रिसर्च सेंटर यांच्या संयुक्त विद्यमाने ही कार्यशाळा पिंपरी येथील ज्ञानज्योती सावित्रीबाई फुले सभागृहात सुरू झाली आहे.

महापालिका आयुक्त तथा प्रशासक शेखर सिंह आणि अतिरिक्त आयुक्त विजयकुमार खोराटे यांच्या मार्गदर्शनाखाली आयोजित या कार्यशाळेचे उद्घाटन उपायुक्त सचिन पवार यांच्या हस्ते झाले.

नागरिकांच्या समस्या सोडवण्यासाठी प्रशिक्षण आवश्यक

यावेळी बोलताना उपायुक्त सचिन पवार म्हणाले की, ‘प्रत्येक आरोग्य निरीक्षकाला घनकचरा व्यवस्थापन नियम २०१६, प्रथमोपचार, माहितीचा अधिकार आणि कायदेविषयक बाबींचे सखोल ज्ञान असणे आवश्यक आहे. या सर्व विषयांची उजळणी करून त्यांची काटेकोर अंमलबजावणी करणे गरजेचे आहे. या दृष्टीने पायाभूत प्रशिक्षण हा अत्यंत महत्त्वाचा टप्पा ठरतो.’

अखिल भारतीय स्थानिक स्वराज्य संस्थेचे विभागीय संचालक द. गा. मोरे यांनी आरोग्य निरीक्षकांची भूमिका स्पष्ट करताना सांगितले की, ‘आरोग्य निरीक्षक हा प्रशासन आणि नागरिकांमधील एक महत्त्वाचा दुवा आहे आणि तो समाजाचा कणा आहे. नागरिकांच्या समस्या सोडवून सक्षम आरोग्य सुविधा उपलब्ध करून देण्यात त्यांची भूमिका महत्त्वाची आहे.’ याप्रसंगी स्वच्छता निरीक्षक अभ्यासक्रम प्रमुख डॉ. हरिश रसानकर यांनीही आरोग्यविषयक सेवा आणि आरोग्य संवर्धनावर सविस्तर मार्गदर्शन केले.

प्रशिक्षणामध्ये सखोल मार्गदर्शन केले जाणारे विषय:

या दहा दिवसीय प्रशिक्षणामध्ये खालील महत्त्वपूर्ण विषयांवर सखोल मार्गदर्शन केले जात आहे, जेणेकरून नवनियुक्त आरोग्य निरीक्षकांची कार्यकुशलता वाढेल.

• आरोग्य प्रशासन
• जन्म-मृत्यू अधिनियम
• महापालिका अधिनियम १९४९ व त्याअंतर्गत अधिकार
• महापालिकेची रचना व विभागांचे कार्य
• नॅशनल इम्युनायझेशन प्रोग्राम
• नॅशनल न्यूट्रिशन प्रोग्राम
• माहितीचा अधिकार
• महाराष्ट्र नागरिक सेवा
• आरोग्य आजार व प्रथमोपचार
• घनकचरा व्यवस्थापन नियम २०१६
• टिपणी लेखन व पत्रलेखन

या प्रशिक्षण उपक्रमांच्या माध्यमातून आरोग्य निरीक्षकांची कार्यक्षमता वाढून नागरिकांना अधिक सक्षम आरोग्य सुविधा उपलब्ध होतील, असा विश्वास प्रशासनाने व्यक्त केला आहे.

© 2025 मॅक्स मंथन डेली न्यूज. सर्व हक्क राखीव.