पिंपरी-चिंचवड शहराने दिलेल्या अतोनात प्रेमाचा कायम ऋणी; आयुक्त शेखर सिंह भावूक
कुंभमेळा आयुक्तपदी बदली झालेल्या शेखर सिंह यांचा ‘अभिजात मराठी भाषा सप्ताहा’त सन्मान; शहराचे सांस्कृतिक आणि विकासकामांचे योगदान कायम स्मरणात राहील, अशी भावना.
पिंपरी, प्रतिनिधी शाम सोनवणे, दि. ऑक्टोबर , मॅक्स मंथन डेली न्यूज:
पिंपरी-चिंचवड शहराने दिलेले अतोनात प्रेम हा माझ्या जीवनातील अमूल्य ठेवा असून, या शहराचा मी कायम ऋणी राहीन, अशा गहिवरलेल्या शब्दांत महापालिका आयुक्त शेखर सिंह यांनी आपल्या भावना व्यक्त केल्या.
नाशिकच्या कुंभमेळा आयुक्तपदी शासनाने नुकतीच त्यांची नियुक्ती केली आहे. पिंपरी-चिंचवड महापालिकेचे आयुक्त म्हणून केलेल्या उल्लेखनीय कामाबद्दल त्यांचा ‘अभिजात मराठी भाषा सप्ताहा’ मध्ये शहरवासियांच्या वतीने सन्मान करण्यात आला. या सन्मानाला उत्तर देताना आयुक्त सिंह बोलत होते.
शहर विकासाचे ‘रोल मॉडेल’
आयुक्त शेखर सिंह म्हणाले की, “पिंपरी-चिंचवड शहर विकासाचे रोल मॉडेल आहे. या शहराने आंतरराष्ट्रीय पातळीवर स्वतःची वेगळी ओळख निर्माण केली आहे. शहरात विकासाभिमुख उपक्रम आणि प्रकल्प राबवताना शहरवासियांनी दिलेली साथ आणि केलेले सहकार्य माझ्या या शहरातील प्रशासकीय कारकिर्दीमधील विशेष भाग आहे.”
- वारकरी संप्रदायाच्या सेवेचे समाधान: पिंपरी-चिंचवड ही संतांची आणि वारकरी संप्रदायाची भूमी आहे. संतश्रेष्ठ संत ज्ञानेश्वर महाराज आणि जगद्गुरू संत तुकाराम महाराज यांचा पालखी सोहळा शहरातून मार्गक्रमण करत असताना वारकऱ्यांची सेवा करण्याची संधी मिळाली, याचे मनस्वी समाधान आहे, असे त्यांनी सांगितले.
- सांस्कृतिक चळवळीला गती: केवळ भौतिक सुविधांवरच नव्हे, तर सांस्कृतिक चळवळीला चालना देण्यातही त्यांचे मोठे योगदान राहिले. शंभरावे अखिल भारतीय मराठी नाट्य संमेलनाचे यशस्वी आयोजन असो किंवा अभिजात मराठी भाषा सप्ताहाचे भव्यदिव्य आयोजन असो, त्यांच्या कामाची आठवण शहराच्या कायम स्मरणात राहील, अशी भावना भाऊसाहेब भोईर यांनी व्यक्त केली.
चिंचवड येथील प्रा. रामकृष्ण मोरे प्रेक्षागृहात अशोक हांडे निर्मित-दिग्दर्शित ‘मराठी बाणा’ या सांस्कृतिक कार्यक्रमादरम्यान हा सन्मान करण्यात आला. आमदार उमा खापरे, महापालिका अतिरिक्त आयुक्त तृप्ती सांडभोर यांच्यासह अनेक मान्यवरांच्या हस्ते आयुक्त सिंह यांना शहराचे प्रतीक असलेले भक्ती-शक्ती समूहशिल्प भेट देऊन पुढील वाटचालीसाठी शुभेच्छा देण्यात आल्या.
यावेळी आमदार उमा खापरे यांनी, “सिंह यांच्या माध्यमातून शहराला एका वेगळ्या उंचीवर नेणारे आयुक्त लाभले,” असा विश्वास व्यक्त केला.
या सन्मान सोहळ्यास महापालिका सह आयुक्त मनोज लोणकर, सहाय्यक आयुक्त अतुल पाटील, विशेष अधिकारी तथा मराठी भाषा समन्वय अधिकारी किरण गायकवाड, प्रशासन अधिकारी संगीता बांगर, स्मार्ट सिटीचे सहमुख्य कार्यकारी अधिकारी किरणराज यादव, पोलीस उपायुक्त बापू बांगर, अखिल भारतीय मराठी नाट्य परिषद पिंपरी चिंचवड शाखेचे अध्यक्ष भाऊसाहेब भोईर, महाराष्ट्र साहित्य परिषद पिंपरी चिंचवड शाखेचे अध्यक्ष राजेंद्र लाखे, माजी नगरसेवक केशव घोळवे, सामाजिक कार्यकर्ते रुपेश पटेकर, सीमा बेलापूरकर, ‘मराठी बाणा’ कार्यक्रमाचे निर्माते-दिग्दर्शक अशोक हांडे यांच्यासह अनेक मान्यवर उपस्थित होते.
© मॅक्स मंथन डेली न्यूज. सर्व हक्क राखीव.
